E’doza 41

Yusufuni Farau ma arabi ma efi ecezuri

1Eri nga eca ’dini eli pi pi iri ma vutia, orobi nga Farauni obi ra; mi ndre, eri so pa yi raza ma tia. 2Te mi ndre, ti nga efu aziri yi raza ma alia, yi ti a’buza onyiru ’diyi, yi awi a’i nya omi talaa. 3Te mi ndre, ti azini aziri nga efu yi vutia yi raza ma alia, yi ti oyiza onzikanyaru ’diyi, yi nga pa so ti azi ’diyi ma ageia yi tia ’daa. 4Te ti oyiza onzikanyaru ’diyi nga ti a’buza onyiru ’diyi nya teketeke ra. ’Dini Farau nga enga o’duarisi ra. 5Eri nga o’du ko ra, orobi nga eri obi pale iri dika; te mi ndre, kaka ’ya aziri kaka pati alu ma ruaa, a’buzaru onyiru. 6Te mi ndre, kaka azini, aziri odizaru oli engapi kala etuni efuzurialerurini vele ’diyi nga enga yi ma vutia. 7Kaka odizaru ’diyi nga kaka a’buzaru efi be tre tre ’diyi oki ra. Farau nga enga ra, te mi ndre, eri de orobini. 8#Dan 1:20; 2:2; 4:5; Efu 7:11; Isa 29:14; Mat 2:1Eri nga eca ’dini, o’bitisi asini nga oti oti tu; eri nga ’ba ti pe ’ba dria ojouru Misiria ’diyi pi omvezu ’ba dria onduouru angu ndea ’diyi be; Farau nga orobi ini ma e’yo olu yi tia, te ’ba aluni ecopi yi ma efi ecepi Farau drini yo.

9’Ba ’ba nyaka fepi ’diyi ma driliari nga di ’yo Farau tia kini, Ma ezata mani ma e’yo ega andru 10#E’do 39:20; 40:2, 3Farau ovu ndra aokosi ati’bai erini be, nga ma ombe aruru ’ba asikari opi agei tepi ’diyi ma driliari ma joa, ma’i ’ba ’ba nyaka a’dipi ’diyi ma driliari be; 11#E’do 40:5te orobi obi ama ini alusi eri be, orobi ama obipi ’dayi nde ma efi ndu ndu. 12#2 Opi 5:4; E’do 37:36; 40:12Isu de karilau Ebraniouru ’ba asikari opi agei tepi ’diyi ma driliari ma ati’bo indi; ama olu e’yo amani eri ma tia, eri nga di orobi amani ma efi ece, eri ece e’yo ’ba alu alu tia orobi erini ma efi vusi. 13#E’do 40:22Te eri nga eca ’dini, ekile erini efini ecele ama dririle, e’yoni ’ye i ’dini tro tro; ma’i, omvi ma azi mani ma alia dika, eri’i, ti eri ra.

14 # Zab 105:20; 113:7, 8; Dan 2:25; 1 Sam 2:8 Farau nga di ’ba ti pe Yusufuni omvezu, yi nga eri eji mbele mbele bile gale arujoruriasi; eri nga i ma dribi fa, nga bongo o’diru su, nga fi Farau vu. 15#Zab 25:14; Dan 5:16Farau nga ’yo Yusufu ma tia, Orobi obi mani, te ’ba ecopi efini ecepini yo; te ma eri e’yo mini, kini, mi ka adri orobi ma e’yo eri ra, mi eco kini efini ecezaru ra. 16#Zab 25:14; O’be 3:32; Dan 2:30; 4:2; Amo 3:7; Yoh 15:15; ’Yeta 3:12; 2 Kor 3:5; Azi 29:29Te Yusufu nga e’yo omvi Farau tia kini, Eri ma’i yo; Munguni nga e’yo anzururi omvi Farau drini. 17Farau nga e’yo ’yo Yusufu ma tia kini, Orobi mani ma alia, mi ndre, ma so pa yi ara ma tia; 18te mi ndre, ti aziri nga efu yi ara ma aliarisi, yi ti a’buza onyiru ’diyi, yi nga awi a’i nya omi talaa; 19te mi ndre, ti azini aziri nga efu yi ma vutia, yi ti gorulioru oyipi kai onzikanyaru, ekile oku mani ndrele gorulioru angu Misiriari ma alia dria nga ku ’diyi. 20Ti oyiza onzikanyaru ’diyi nga ti oko aziria’buzaru’diyi nyara, 21te yi ka yi nya ’bo, ’ba econi nizare kini nya yi ra ’dinini ku, te yi ovu onzikanyaru ’dani ekile okorile. ’Dini ma nga enga o’duarisi ra. 22Ma nga ndre orobi mani ma alia, te mi ndre, kaka aziri nga ’ya kaka pati alu ma ruaa, efi be tre tre onyiru tu; 23te mi ndre, kaka aziri ’wipi ’bo, odizaru oli engapi kala etuni efurialerurini vele ’diyi nga enga yi ma vutia, 24#Zab 60:11; 118:8; Isa 8:19; Dan 4:7kaka odizaru ’diyi nga kaka aziri onyiru ’diyi oki ra. Ma nga di e’yo nde ece ojou piyi vu, te ’ba aluni ecopi efini ecepi ma drini yo.

25 # Dan 2:28, 29, 45; Eceza 4:1 Yusufu nga ’yo Farau ma tia, Orobi Farauni obipiri eri alu; Mungu ece Farau dri e’yo erini mule ’yeleri. 26Ti onyiru aziri ’diyi yi eli azirini, kaka onyiru aziri ’diyi yi vini eli azirini; orobini alu. 27#2 Opi 8:1Ti aziri oyiza onzikanyaru etupi yi ma vutia ’diyi yi eli azirini, azini kaka aziri pirini oli etuni efurialerurini vele ’diyi yi vini tro tro, yi nga ovu eli aziri likini ’diyi. 28E’yo taka mani ’yole Farau tiari eri ’di: Mungu ece Farau dri e’yo erini mule ’yeleri ’bo. 29Mi ndre, eli aziri nyakani ngazu kazu tu ’diyi nga ovu angu Misiriaria dria, 30#E’do 47:13; Zab 105:16; 1 Opi 17:1te yi ma vutia eli aziri likini ’diyi nga emu ra, nyaka kapi turi ma e’yoni nga avi ani angu Misiriariasi ra; likini nga angu ’du dria, 31nyaka kapi turi ma e’yo ’ba ngani ni angu nde ma alia ku, liki emupi vutiniari ma e’yosi, a’disiku eri nga ovu nzizaru tu. 32E’yo oro bini Farauni obizu pale irisiri ece kini Mungu fe e’yo ’dirini pa soni, azini Munguni nga fe e’yo ma ’ye i mbele. 33E’yo ’disi Farau ma nda ’ba e’yo vaza be onduaru, eri ma ’ba eri angu Misiriari ma drilia. 34Farau ma ’ye e’yo ’diri, eri ma ’ba ’ba e’yo ’diri ndrepi ’diyi angu Misiriaria dria, yi ma oku nyaka angu Misiriarini kaleri ma esele towi ma azi aluri, eli aziri nyakani kazu tu ’diyi ma alia. 35Yi ma oku nyaka dria eli onyiru ngapi emupi ’diyi ma alia, yi ma oku anya aku amboru vusi nyakaru aziza Faraunisi, yi ma mba eri ma ta ci, 36Nyaka nde nga ovu anya ta mbale kule eroari angu dri eli aziri likini ngazu ovuzu angu Misiriaria ’diyi tezu, angu kazu dri jazu likisi ku.

Yusufuni ovuzu opiru Misiriari

37E’yo ’diri ovu onyiru Farau pi ma milia ati’ba erini pie dria. 38#Kal 27:18; O’be 2:6; Yob 32:8; Dan 4:8; 5:11Farau nga ’yo ati’ba erini ma tia’i Ama eco agu ’diri ma azi, ovupi orindi Munguni be i ma aliari, isu ra ya? 39Farau nga ’yo Yusufu ma tia, Munguni e’yo ’diri ecele mi dri driarisi, ’ba azini e’yo vaza be kani onduaru mileni yo; 40#’Yeta 7:10mi nga ovu jo mani ma driliani, mi nga ’ba mani ma dri ce dria e’yosi mi’i; e’yo oguna opinirisi a’dule ma nga mi aga ra. 41#Zab 105:22; O’be 14:35; Ekl 4:13, 14; Dan 6:3; ’Yeta 7:10Farau nga ’yo Yusufu ma tia, Mi ndre, ma ’ba mi opiru angu Misiriari ma drilia dria ’bo 42#Dan 5:29; Esi 3:10; 8:2Farau nga driadriamva eceta beri nze i ma driarisi, nga eri su Yusufu ma dria, nga afa suza edele bongo mile be nyiriarisiri su eri ma ruaa, nga nyoro edele mele alarusiri su eri ma ombelea; 43eri fe eri ma nzu gari erini iriri ma alia; yi nga oyu eri ma drilia ’dini: Emi osi kumuti va yo ’Dini eri nga eri ’ba angu Misiriari ma drilia dria. 44Farau nga ’yo Yusufu ma ria, Farau’i, te mi ti kokoru ’ba aluni ma enga i dri kani i pa angu Misiriari ma alia dria ku. 45Farau nga Yusufu ma ru ’da Zafenati-panea’i; nga eri dri Asenati, Potifera kuhani Oniari ma zi fe eri dri okuru. ’Dini Yusufu nga fu aci ovuzu angu Misiriari ma drilia dria.

46 # 1 Sam 16:21; 1 Opi 12:6, 8; Dan 1:19 Yusufu ma eli de kali na, erini pa sozu Farau opi Misiriari ma driliarisi. Yusufu nga fu Farau ma miliarisi amve, nga aci angu Misiriari ma eselia dria. 47Eli aziri nyakani ovuzu tu ’diyi ma alia nyaku nga nyaka ka tu aga ra, 48eri nga nyaka kapi eli aziri ndesiri oku angu Misirinia, nga nyaka nde ma ta mba aku amboru vusi; eri nga nyaka kapi amvu aku alu alu ma ageiarini ma ta mba aku nde ma alia. 49#E’do 22:17; Lip 7:12; 1 Sam 13:5; Zab 78:27Yusufu nga anya ma ta mba karakarau tu cinya miri tiarile, eri ku kalafeni lazu ja, erini lale tirisi.

50 # E’do 46:20; 48:5 Yusufu dri, oti agianzi iri de nga eli likini ecani ku, Asenati Potifera kuhani Oniari ma zi oti yini. 51Yusufu nga mva okori ma ru ’da Manase’i, a’disiku eri ’yo ’dini, Mungu fe ma dri avi ocoko mani pi ma e’yosi ’ba ma ati vile joa ’diyi be dria. 52Mva iriri ma ru eri ’da Efiraimui, kini, Mungu ’ba ma efi kazu angu mani inzata isuzuria ’bo.

53Eli aziri nyakani kazu tu angu Misiriaria ’diyi nga yi de ra. 54#’Yeta 7:11; Zab 105:16Eli aziri likini ’diyi ’ba di emu ra, ekile Yusufuni ndra ’yolerile. Liki nga ’ba ’de angu dri dria; te angu Misiriari ma alia dria nyaka indi. 55#Yoh 2:5Likini ’deria angu Misiriaria, ’ba nga wu Parau vu nyaka e’yosi; Farau nga ’yo ’ba Misiria ’diyi ma tia dria, Emi mu Yusufu vu; emi ’ye ekile erini ’yole emi tiarile. 56#E’do 42:6; 47:14, 24; O’be 11:26Liki ’de angu wudrikuru dria ma alia, Yusufu nga di ero nyaka ta mbazu ’diyi ma ti zi, fezu nyaka jezu ’ba Misiria ’diyi dri, te liki abiri angu Misiriari eri nzizaru tu. 57#Azi 9:28; E’do 12:10; 26:1; 43:1; 2 Opi 8:1Suru dria dria nga emu Misiria Yusufu vu nyaka jezu, liki ndeni ovule nzizaru angu wudrikuru dria ma aliarisi.

Currently Selected:

E’doza 41: LB66

Highlight

Copy

Compare