Efuza 1
1
’Ba Israelini inzazu Misiriari
1 #
E’do 46:8-27; Efu 6:14 Te anzi Israelini ecapi angu Misirini alia ’diyi ma ru ovu ’dini (’ba ’diyi dria eca ’ba yi vile joa ’diyi be, tualu Yakobo be): 2Rubeni, Simeoni pie, Levi pie, Yuda pie, 3Isakari pie, Zebuluni pie, Benya-mini pie, 4Dani pi Nafutali be, Gadi pi Aseri be. 5#E’do 46:26; Azi 10:22Anzi dria efupi Yakobo ma ruaa ’diyi ovu kali aziri; te Yusufu eca ndra angu Misirini ma alia oko. 6#E’do 50:26; ’Yeta 7:15; Ekl 1:4Te Yusufu pi odra, adripi ini pie, a’bianzi efipi ’da ’diyi be dria. 7#’Yeta 7:17; E’do 46:3; Azi 26:5; Zab 105:24Te anzi Israelini yi ti tu, yi ezu tre; eca o’biru, eca okporu tu aga ra; yi ga angu nderia tre.
8 #
’Yeta 7:18
Te yi ’ba opi o’diru Yusufuni nipi kuri angu Misirini ma drilia. 9#Zab 105:24Eri ’yo ’ba erini tia, Emi ne, suru anzi Israelini yi ovu kakau okporu aga ama ra. 10#’Yeta 7:19; Zab 10:2; 83:3; Yob 5:13; O’be 28:16Emi emu, ama ’ye yi vu onduasi, yi kazu ezuzu dika ku, azini omba ka efu ’bo, yi kazu juru amani ma aza kozu a’di ’dizu ama be indi ku, yi kazu ngazu apazu angu ’doriarisi ku. 11#E’do 15:1; Efu 2:11; 3:7; 5:4; O’be 27:3; Zab 81:6; E’do 47:11E’yo ’disi yi ’ba ’ba yi drilia yi ecandizu teri yini ojizu. Yi si Farau dri aku afa ta mbazu ’diyi, yi ru Pitomu pi Ramasesi be. 12Te ewu yini yi ecandizu aga rarisi yi ezu tre aga ra, yi ere yi aga ra indio Te asi yini oti oti anzi Israelini ma e’yosi. 13Te ’ba Misiria ’diyi yi ecandi anzi Israelini azi okporusi, 14#Efu 2:23; 22:21; Lev 25:14, 17; Kal 20:15; Yob 20:19; O’be 14:31; 22:22; ’Yeta 7:19, 34; Zab 10:17, 18; 81:6yi fe yi dri ocoko okporu ayuna ewarusi, odri tuzu, biriki ’bezu, azini azi ndu ndu nga alia ’diyi be; azi nde ma alia dria yi ecandi yi okposi.
15Te opi Misiriari ’yo oku Ebraniani, oku ma aza kopi ewu ositanisi ’diyi ma tia, oku nde ’diyi ma ru Sifira pi Pua be, 16eri ’yo, Emi ka oku Ebraniani ’diyi ma aza ko yini osiria, emi ka yi ne pari anzi osizuri ma dria, yi ka mva osi agupimvani emi fu eri ra; ka ovu zamvani ma adri yi. 17#O’be 16:6; Dan 3:16, 18; 6:13; ’Yeta 5:29Te oku nde ’ba osipi ’diyi yi ru Mungu, yi ’yeni ekile opi Misiriarini azile yi dririle ku, te yi ku agianzi nde ’diyi idriru. 18Te opi Misiriari omve oku nde ’ba osipi ’diyi, zi yi tia kini, Emi ’ye ’dini, agupianzi kuzu idriru a’disi ya? 19#Yos 2:4; 2 Sam 17:19, 20Te oku ’ba osipi ’diyi omvi e’yo Farau tia ’dini, A’disiku oku Ebraniani ’diyi yi ovuni ekile oku Misirini ’diyile ku; yi okpo be anzi osizu mbele de nga ’ba ’ba osipi ’diyi ecani yi vu ku. 20#O’be 11:18; Ekl 8:12; Isa 3:10; Ebra 6:10Te Mungu ’ye oku’diyi onyiru; te suru nderi ezu tre, yi eca okporu tu. 21#1 Sam 2:25; 2 Sam 7:11, 13, 27, 29; 1 Opi 2:24; 11:38; Zab 127:1Te eri nga eca ’dinile oku ’diyini Mungu rulerisi, eri fe jo yini so pa ra. 22#’Yeta 7:19Farau fe azita ’ba erini dri dria kini, Agupianzi dria yini osile ’diyi emi o’be yi ara Nilini ma alia, te ezoanzi dria emi ku yi idriru.
Currently Selected:
Efuza 1: LB66
Highlight
Copy
Compare
Share
Want to have your highlights saved across all your devices? Sign up or sign in
Bible in Lugbara © United Bible Societies, 1966.
