Azita Amvizu 30

Geri asi ojazu asi ndriza isuzuri

1 # Lev 26:40; Azi 28:1-68; 1 Opi 8:47; Eze 18:28; Luk 15:17 Eri nga eca ’dini, e’yo ’diyi dria ka nga eca mi dria, asi ndriza pi otrita be mani ’bale mi milia ’diyi, mi ka nga yi ma e’yo ega dika mini ovuria suru dria Yehova Mungu minirini mi drole yi vu ’diyi ma eselia, 2#Neh 1:9mi ka nga mvi Yehova Mungu miniri vu, o’duko erini erizu mi asi driasi azini mi orindi driasi, ekile e’yo dria mani azile mi tia o’du andru ’dorisi ’diyile, mi’i mi anzipi be; 3#Zab 106:45; 126:1, 4; Yer 29:14; Imv 3:22; Zab 147:2; Yer 32:37; Eze 34:13ka’dini Yehova Munguminiri nga mi omvi ofuzu ati’boarisi, nga yiki ’ba mi vu, nga emvi mi okuzu suru dria Yehova Mungu minirini mi erezu yi vu ’diyi ma aliasi. 4#Azi 28:64; Neh 1:9’Ba mini, ’bani o’bele amve ’diyi ma azi ka ovu ’bu ma kalati asizuria ti, Yehova Mungu miniri nga mi oku engazu kpere ’daa, engazu ’daarisi eri nga vini mi eji ra; 5Yehova Mungu miniri nga mi cii angu ovupi ndra mi a’bipiniri ma alia, mi ma ’du ani eri miniru; eri nga vini mi ’ye onyiru, nga fe mini ezuzu kakau aga mi a’bipi ra. 6#Azi 10:16; Eze 11:19Te Yehova Mungu miniri nga mi ma asi li agele lilerile, mi anzipi ma asi be, mi ma le ani Yehova Mungu miniri mi asi driasi, azini mi orindi driasi, mi ma ovu ani idriru. 7Yehovani nga otrita ’diyi o’ba ari’ba mini piyi ma dria, ’ba mi ngupi onzi ndra mi inzapi ’diyi be. 8Mi nga mvi Yehova Mungu miniri ma ti erizu ra, nga azita erini mani azile mi dri o’du andru ’dorisi ’diyi ’ye dria. 9#Eze 34:27; Yer 32:41; 33:9; Zef 3:17; Luk 15:6, 10, 32; Yoh 15:11Yehova Mungu miniri nga mi ’ba drilebaru e’yo onyiru isuzu azi mini ’yele drisiri pi ma alia dria, ori efupi mi ruaari pie, anyapa mini ma ori pie, afa nyaku minirini kaleri pie; Yehovani nga ovu ayikosi dika mi ’yezu onyiru, ekile erini ovule ndra ayikosi mi a’bipi ma e’yosirile, 10mi ka nga Yehova Mungu miniri ma ti eri ra, azita erini yini sile buku azitani ’dori ma alia ’diyi pi ma ta mbazu e’yo aziza ’diyi be, mi ka mi oja Yehova Mungu miniri vu mi asi driasi, azini mi orindi driasi raria. 11#Isa 45:19A’disiku azita mani azile mi tia o’du andru ’dorisi ’diri ovuni ewaru tu mi ndezu ’dini ku, eri ovuni vini mi be ziri ku. 12#Rum 10:6-8; O’be 30:4; Yoh 3:13Eri ’bua yo, mini ani ’yozu kini, A’dini nga tu ama dri ’bua eri ejizu ama vu, fezu amani eri erizuni ya, ama ’ye eri beni? 13Eri ovuni vini miri ma tia ’aa’daaleruria ku, mini ani ’yozu kini, A’dini nga ama dri mirini zo eri ejizu ama vu, fezu amani eri erizuni ya, ama ’ye eri beni? 14Te e’yo nde ovu mi vu inyia tu, mi tilia, azini mi asia, mini ani eri ’yezu beni. 15#Azi 11:26; Mar 16:16; Yoh 3:16; Gal 3:13, 14; 1 Yoh 3:23Mi ne, ma ’ba idri pi mi milia andru onyi be, azini drata pi onzi be, 16mani mi azizu o’du andru ’dorisi kini mi ma le Yehova Mungu miniri, ma aci geri erini ma alia, ma mba azita erini piyi ma ta, e’yo aziza erini ’diyi pie, e’yo liza erini ’diyi pie, mi ma ovu ani idriru, ezuzu tre.Yehova Mungu miniri ma ’ba ani asi ndriza mi vu angu mini muzu vunia eri ’duzu miniruri ma alia beni. 17Te asi mini ka i oja kalaa, mi ka le e’yo eri ku, te ka mi se kalaa adrou ma azi ngazu yi inzizu, 18#Azi 4:26; 8:19; Yos 23:15, 16; Isa 63:17, 18ma li emi bilendu andru ’di, kini emi nga dri ja ecekokoru; emi ngani ovu idriru o’du kakau angu emini Yoridanini zozu, fizu eri ’duzu eminiruri ma alia ku. 19Ma omve ’bu pi nyaku be, e’yo eti nzezu emi ruaa andru ’do, kini ma ’ba mi milia idri pi dra be, asi ndriza tekari pi otrita be; e’yo ’disi mi ma pe idri’i, mi ma ovu ani idriru, emi’i ori mini pie, 20#E’do 12:7; 13:15; 15:18; 26:3; 28:13; Yob 12:10; Zab 27:1; 66:9; Dan 5:23; Yoh 11:25; ’Yeta 17:25, 28; ’Yeta 7:5Yehova Mungu miniri lezu avasi, 0’duko erini erizu ’yezu, mi ebizu eri ruaa; a’disiku eri idri miniri’i, azini ewu mini ovuzu idriru izuri’i, mi ma adri ani angu Yehovani oyoni sole mi a’bipi Iburahimu pi ma tia, Isaka pie, Yakobo pie, fezu yi driri ma alia beni.

Currently Selected:

Azita Amvizu 30: LB66

Highlight

Copy

Compare