Azita Amvizu 27

Azita sizu oni Ebali ma driari I

1Musa pi ’ba ’wara Israelini ’diyi be nga di e’yo azi ’ba tia kini, Emi ma mba azita mani azile emi tia o’du andru ’dorisiri ma ta dria. 2#Yos 4:1; 8:30-32Eri nga ovu ’dini, o’du emini ngazu Yoridanini zozu cazu angu Yehova Mungu minirini fele mi dririarisi, mi ma odro oni ambo ambo ’diyi, ma e’bura yi ma rua ivisi; 3mini zoria ’boria mi ma si azita ’diri ma e’yo dria yi ma ruaa, mi ma fi ani angu Yehova Mungu minirini fele mi driri ma alia, angu lesu pini gazu alenia anyuoso be treri’i, ekile Yehova Mungu mi a’bipinirini azile mi tia ’borile. 4#Azi 11:29; Yos 8:30Eri nga ovu ’dini, emi ka Yoridanini zo ’bo, emi ma odro oni nde mani yi ma e’yo azile mi tia andru ’diyi oni Ebalia, mi ma e’bura yi ma rua ivisi. 5#Efu 20:25; Yos 8:31Mi ma si pari edeta edezu Yehova Mungu miniri dri ’daa, pari edeta edezu sile onisiri’i; mi ma ’du afa ayaru azi ngazu yi ma ruaa aluni ku. 6Mi ma si pari edeta edezu Yehova Mungu miniri dri oni yi ma rua opale ku ’diyisi; mi ma ede di edeta vezaru drinia Yehova Mungu miniri dri;

7mi ma ede vini edeta asi anzuruni ’diyi, nyazu ’daa; mi ma ovu ayikosi Yehova Mungu miniri ma drilia. 8#Hab 2:2Mi ma si azita ’dori ma e’yo dria oni nde ’diyi ma ruaa kililiru, ma e’da ce. 9Musa pi ’ba Levini kuhaniru ’diyi be nga ’yo Israeli dria ma tia kini, Emi ovu ciri, emi eri fo, emi Israeli la: o’du andru ’dorisi mi ofu Yehova Mungu miniri ma ’baru ’bo. 10E’yo ’disi mi ma eri Yehova Mungu miniri ma ti, azita erini piyi ’yezu e’yo aziza erini ’diyi be, mani azile mi dri o’du andru ’dorisi ’diyi.

E’yo triza trile oni Ebalia ’diyi

11Musa nga e’yo azi ’ba nde ma tia o’du nderisi kini, 12#Azi 11:29; Yos 8:33-35; Lip 9:7’Ba ’diyi nga pa oso oni Gerizimu ma dria asi ndriza fezu ’ba dri, emini Yoridanini zozu ’boria: Simeoni pi, Levi pi, Yuda pi, Isakari pi, Yusufu pi, Benyamini pie. 13Te ’doyi nga pa oso oni Ebali ma dria ’ba otrizu: Rubeni pi, Gadi pi, Aseri pi, Zebuluni pi, Dani pi, Nafutali pie. 14#Azi 33:10; Yos 8:33; Neh 8:7, 8; Dan 9:11; Mal 2:7-9’Ba Levini nga e’yo omvi, ’yozu ’ba Israelini ’diyi ma tia dria o’duko urusi kini: 15#Efu 20:4; 34:17; Lev 19:4; 26:1; Azi 4:15-18; 5:8; Isa 44:9; Hos 13:2; Kal 5:22; Yer 11:5; 1 Kor 14:16’Ba wura opale opari edepi, kani wura edele aya rap acisirisi, afa Yehovani ngule onzi, on duou ma dri pamvururi edepi, eri edrepi uru ndindiruri, ma ovu trizaru. ’Ba dria ma omvi e’yo, ma ’yo, Amena. 16#Efu 20:12; Azi 5:16; Lev 19:3’Ba i ati pi ’bapi i andri be tokori ma ovu trizaru. ’Ba dria ma ’yo, Amena.

17 # Azi 19:14; O’be 22:28 ’Ba ’ba i jo ejeleari ma afa lokiri ecezuri ojapiri ma ovu trizaru. ’Ba dria ma ’yo, Amena.

18 # Lev 19:14; Yob 29:15; O’be 28:10; Mat 15:14; Eceza 2:14 ’Ba ’ba mile kokoruri ebabapi, fepi erini geri ini avizuri, ma ovu trizaru. ’Ba dria ma ’yo, Amena.

19 # Efu 22:21; 23:9; Lev 19:33-34; Azi 10:18; 24:17-18; Mal 3:5 ’Ba ani’bo pi ma e’yo lipi onzi, imvoanzi pie, awuziou pieri ma ovu trizaru. ’Ba dria ma ’yo, Amena.

20 # Lev 18:8; 20:11; Azi 22:30; 1 Kor 5:1 ’Ba fipi i ati ma oku vuri ma ovu trizaru, a’disiku eri otru i ati ma afa pililiru ’bo. ’Ba dria ma ’yo, Amena.

21 # Efu 22:19; Lev 18:23; 20:15 ’Ba lapi anyapasiri, ka ovu anyapa ngoni ngori ti, ma ovu trizaru. ’Ba dria ma ’yo, Amena.

22 # Lev 18:9; 20:17; 2 Sam 13:1 ’Ba lapi i amvisi, kani ata ma mvani ya, kani ayiamvani yaniri ma ovu trizaru. ’Ba dria ma ’yo, Amena.

23 # Lev 18:17; 20:14 ’Ba fipi i edri vuri ma ovu trizaru. ’Ba dria ma ’yo, Amena.

24 # Lev 24:17; Kal 35:31 ’Ba ’ba i ma jo ejeleari ’dipi ndindiruri ma ovu trizaru. ’Ba dria ma ’yo, Amena.

25 # Efu 23:7; Azi 10:17; 16:19; Zab 15:5; Eze 22:12 ’Ba afa feza ’ba ti razu ’ba e’yo kokoruri fuzuri a’ipiri ma ovu trizaru. ’Ba dria ma ’yo, Amena.

26 # Gal 3:10; Zab 119:21; Yer 11:3 ’Ba azita ’dori ma e’yo ’bapi okporu yi ’yezu kuri ma ovu trizaru. ’Ba dria ma ’yo, Amena.

Currently Selected:

Azita Amvizu 27: LB66

Highlight

Copy

Compare