’Yeta 28

Pauloni Melita angu i lipi miri ma aliaria

1Amani ama paria ’boria, ama isu angu nde i lipi miriari ma ru ovu Melita. 2#’Yeta 27:3; 2 Kor 11:27Juru yi ko ama aza onyiru tu ekile ’bani ’yele zuzu kurile, edu aci ra, a’i ama dria, a’disiku ozooni ’dile angu ambiza berisi. 3Te Paulo ka eja owu ’bo, ’ba aci dria, ’boroa efu acisi, ombe i drinia, ga eri ra. 4juru ’diyi ka ndre mini i ’iria eri ma dria keleru, yi ’yo yi ma eselia, nzo yo agu ’diri, di ’bani ada. Erini i pazu miri alia rari ti, e’yo liza kililiruri a’ini eri ma ovu idriru ku. 5#Mar 16:18Te eri ya uri nderi acia, ’yeni eri onzi ku. 6#’Yeta 14:11Yi te eri ruani piria, kani erini e’dezu va drazu mbele; ka te izu ti, ka ne e’yo ’yeni eri onzi ku, yi oja yi asisile, ’yo ra eri ovu Mungu azini yani.

7’Ba amboru angu i lipi miria nderiari, runi Pubulio’i, angu erini ovu ogogo pari nderia. Eri a’i ama wa’diru asi ndrizasi, lazu o’du na. 8Eri ovu ’dinile, Pubulio ati ovu azo be arika suzu ariru rua driza be; Paulo fi vunia, zi Mungu tia, ’ba dri drinia, ati eri ra. 9E’yo ’diri ka i ’ye ’bo, ’ba azini azo be angu i lipi miria ndeari ’diyi emu ra, eri ati yi ra. 10Yi fe ama dri inzita tu; ama ka dri ko zozu, yi o’ba afa amani lele ’diyi oguru alia kakau.

Pauloni cazu Rumiari

11Mba na ka aga ra, ama fi oguru Alegezandariani alia zozu; isu de oguru nderi te angu i lipi miria nderia mba egbeni ’diyisi; eceta erini ovu Agupianzi Ejoru. 12Ama ca Surakusaa, la ’daa o’du na. 13Engazu ’dale ama zo goligoliru cazu Regioa; o’du alu ka aga ra, oli onyiru enga alazaru, o’du iririsi ama ca Puteolia. 14’Dale ama isu adripi, yi omi ama ovuzu yi be o’du aziri. ’Dini ama ca Rumia ndo. 15Adripi nde ka ama e’yo eri ’bo, yi nga ’dale emuzu dri fuzu ama be, ecazu kpere pari Apioni ’bani afa jezuria, azini Omujo Na ’Diyia. Paulo ka yi ndre ’bo, eri fe awa’difo Mungu dri, asini isu okpo. 16#’Yeta 27:3Ama ka fi Rumia, yi fe Pauloni la a’dule, asikari eri ma agei tepiri be.

Pauloni e’yo oluzu Rumiari

17 # ’Yeta 23:1 Eri eca ’dini, o’du na ka aga ra, eri omve ’ba ambo ’ba Yahudini drilia ’diyi yi okuzu tualu; yi ka yi oku ’bo, ’yo yi tia, Ma adripi, ma ’yeni ndra onzi ’ba Yahudini vu kani azita ama a’bipini vu ku, te ti, engazu Yerusalemua fe ma aruru ’ba Rumia ’diyi dri. 18Yi ka ndra e’yo mani li ra, le ma tru ra, a’disiku yi isuni e’yo onzi mani drazuri ku. 19#’Yeta 25:11Te ’ba Yahudini ka ga si, e’yo ’di fe mani muzu Kaisari vu e’yo mani lizuni-te ma ovuni e’yo be suru mani esuzu ku. 20#’Yeta 26:6, 7E’yo ’disi ma omve emi mani emi nezu, e’yo ’yozu emi be, a’disiku asi teza Israelinisi ma ovu ombezaru anziriku ’dorisi. 21Yi ’yo eri tia, Ama isuni waraga engapi Yudiaa mi ma e’yo ecezuri aluni ku, azini adripi ecani ’doa aluni ku e’yo ’yozu onzi mi ma e’yosi. 22#’Yeta 24:14; Luk 2:34Te ama le te e’yo mini egaleri eri mi tia; te ama ni ra suruti ’dori ovu o’dazaru pari dri dria.

23Yi ka o’du pe eri dri ra, yi eca karakarau jo erini lazuria. Engazu o’bitisi cazu anguni biria ndrima ndrima ’dia ’di, eri ece yi dri suru Munguni ma e’yo, eri imba yi e’yo Yesunisi, iri tro azita Musani ma aliarisi, azini e’yo nabini silerisi. 24’Ba azini ’diyi a’i e’yo erini ’yoleri ra, ’ba azi ’diyi a’ini ku. 25’Dini yini agata garia yi eselia ceni ceni, yi ko dri muzu, Pauloni e’yo alu ’di ’yoria ’boria: Orindi Alatararu ’yo ’yeke emi a’bipi vu nabi Isaya ma tiarisi, kini:

26 # Isa 6:9-10 # Mat 13:14; Mar 4:12; Yoh 12:40 Mi mu ’ba mani ’diyi vu, mi ’yo ’dini,

Erizaruni emi nga eri ra,

te emi ngani va aluni ku,

nezaruni emi nga ne ra,

te emi ngani ama kilili ku.

27A’disiku asi ’ba ’diyini eca osoru tu,

bile yini ovu dirinyaru, obi yi mile ’bo;

yi kazu nezu yi milesi ku,

yi kazu erizu yi bilesi ku,

yi kazu e’yo nizu yi asisi ku,

yi kazu yi ojazu dika mani yi atizu ku.

28 # Zab 67:2; 98:3; Luk 3:6; ’Yeta 13:46 E’yo ’disi emi ma ni ra, Mungu pe pata ini ’dori ma ti ’ba Jururu ’diyi dri; yi’i yi nga eri ra. 29Eri ka e’yo ’diyi ’yo ’bo, ’ba Yahudini nga mvi yi vile, ri e’yo ozi yi ma eselia ceni ceni kakau.

30Eri la ’dale eli pi pi iri, i vile jo ini jeleniri ma alia, a’i ’ba dria ecapi eri vu ’diyi, 31#’Yeta 1:3; 28:23suru Munguni ma e’yo oluzu, azini Opi Yesu Kristo ma e’yo imbazu uri kokoru, te ’ba aluni ogani eri ku.

Currently Selected:

’Yeta 28: LB66

Highlight

Copy

Compare