’Yeta 26

Pauloni e’dozu i ma e’yo eti nzezu Agiripa ma driliari

1Agiripa ’yo Paulo tia, Mi eco e’yo mi ma ngulupini nzezu. Paulo eju i ma dri, ’ba e’yo ini nze kini:

2Ma drileba, mani emule e’yo nzele andru mi drilia, Opi ambo Agiripa, e’yo dria ’ba Yahudiniri ma esulerisi, 3agapiri mini adriza ’ba Yahudini zita yini ’diyi be nile rarisi; e’yo ’disi ma matu ’ba mi vu mi eri nga ma asi e’yeresi.

Adriza Pauloni oku Farisairuri

4Adriza mani engazu trua mvaasi Isuru mani eselia Yerusalemuari, ’ba Yahudini dria ni ra. 5#’Yeta 23:6; Fil 3:5Yi ni e’yo mani gbudrio, yi ka le e’yo mani ma eti nze, kini, ma Farisaiouni, suru inzita amani Mungu inzizuri ma vuti dropi asi driasiri’i. 6#’Yeta 28:20Curu’do ma pa so ’doa emini e’yo mani lizu, mani ovule asi teza be e’yo Munguni azile ama a’bipi vuri a’ile rarisi. 7#’Yeta 24:15Suru amani mudri drini iri yi ovu asi teza be aziza ’diri tezu, azi ngazu Mungu dri inisi etusi dria okposi. Opi la, ’ba Yahudini yi esu ma curu’do asi teza nderisi! 8E’yo Munguni ’ba draza engazuri ovu emi dri ewaru a’izu a’di e’yosi ya?

Pauloni ndra ’ba Kristoni ’diyi inzazuri

9 # ’Yeta 8:3; 22:4-5 # ’Yeta 9:1-29; 22:3-21 Adaru, ma ngulupi ega ndra ma ma ’ye e’yo kakau Yesu Nazaretiari ma ru ezazu. 10Ma ’ye ’dini indi Yerusalemua; ma obi ’ba alatararu I’diyi ma azi kakau ofizu arujoa, ’ba kuhani amboru ’diyini ma dri okpo felerisi, te ’bani yi o’diria ma a’i yi o’dizu indi. 11Ma inza yi pale kakau jo ’ba Yahudiniri yi okuzu ’diyia dria, ma omi yi okposi Munguni o’dazu; azini mani yi ngule onzi asi drazasirisi ma inza yi cazu kpere aku ambo ambo amve ’diyia indi.

Pauloni i tria asi ojaca ecezuri

12’Dini ma mu ndra Damasikia kuhani amboruni okpo fele ma dririsi, azini yini azi nde kule ma dririsi. 13Opi la, mani ovuria geria etu agaa, ma ne diza etu agapiri dizu ma ageia, azini ’ba acipi ma be ’diyi ma ageia indi. 14Amani ama ecoria dria va nyakua ’bo, ma eri o’duko ’yozu ma be Ebrania tisi ’dini kini, Saulo, Saulo, mi ma inza a’disi ya? Eri ewaru mini afa pa osopiri ma si otuzu mi pasi. 15Ma ’yo ra, Opi, mi a’di’i ya? Opi ’yo ra, Ma Yesu mini inzaleri’i. 16#Eze 2:1, 3Te mi nga, mi so pa uru; te ma ece ma ngulupi mi dri a’disiku ma pe mi azi ngazu ma dri, azini ojiou maniru e’yo mini nele azini e’yo mani ngale ecele mi dri ’diyi ma eti nzezu. 17#Yer 1:7; 1 Sur 16:35Ma nga mi pa ’ba Yahudini dri, azini ’ba Jururu mani mi ti pele vunia ’diyi dri indi. 18#Azi 33:3; Isa 35:5; 42:7, 16; ’Yeta 20:32; Efe 2:2; Kol 1:13Ma pe mi ma ti yi ma mile zizu, ’dini yi ma enga ini aliasi ma oja yi diza vu, azini engazu okpo Satanini ma alia cazu Mungu vu, yi ma isu ani e’yo onzi wuza, azini awuafa ma nyaza ’ba ovupi alatararu yini ma a’ilerisi ’diyi ma eselia.

Eceta ’buari ma e’yo inzizu

19 # Gal 1:16 ’Dini, Opi ambo Agiripa, ma: gani eceta nde engapi ’bua efupi ma: miliari ku, 20#’Yeta 9:20, 28-29; Mat 3:8te ma e’do e’yo eluzu Damasikia, azini Yerusalemua vutinia angu Yudiaaria dria, azini ’ba Jururu ’diyi vu indi, kini, yi ma ku e’yo onzi yi ojazu Mungu vu, ma ’ye ’yeta yi sipi ’ba asi ojapi ’bo ’diyisi ’diyi. 21#’Yeta 21:30, 31E’yo ’disi ’ba Yahudini yi bi ma hekalua, o’bi ma ’dizu indi. 22#Luk 24:44-47Mani aza koza engapi Mungu vuri isule rarisi, ma pa so ani ecazu kpere andru ’do, e’yo mani ma eti nzezu ’ba were ’diyi dri azini ’ba ambo ’diyi dri indi, Ma ’yoni e’yo aluni ku pe e’yo nde nabi pini ndra ’yole Musa be, eri nga eca rari: 23#Isa 42:6; 49:6; 1 Kor 15:20kini Kristo ma nya candi, azini eri’i engapi ’ba draza ma eselia okori nga e’yo dizani olu suru nde dri, azini ’ba Jururu dri indi.

Pauloni matu ’bazu lezu Agiripa ma a’i rari

24Erini e’yo i ma ngulupini nzeria ’dini, Fesito ’yo o’duko urusi, Paulo, mi aza aza; e’yo mini onile kakau ’diyi fe mi dri azani! 25Te Paulo kini, Ma azani ku fo, Fesito inzile turi, te ma ’yo e’yo adadaru ovupi ondua kililiru beri’i. 26#Yoh 18:20Opi ambo mani e’yo ’yozu drilenia uri kokoruri ci e’yo ’diyi ra; a’disiku ma ni ra e’yo ’diyi dria e’da yi eri ma milia ’bo peni aluni ku, e’yo ’diyini ovule ’yezaru zizaru kurisi. 27Opi ambo Agiripa, mi a’i e’yo nabini sileri ra ya? Ma ni ra mi a’i ra. 28#’Yeta 11:26; 1 Pet 4:16Te Agiripa ’yo Paulo tia, E’yo weresi mi le ma ojazu ’ba Kristoniru ka! 29Te Paulo ’yo, Ka ovu e’yo wereasi kani kakausi ti, ma Munguni zi kini mi’i a’dule ku, te ’ba e’yo mani eripi andru ’diyi dria, ma ovu tro tro male-kuni bani anziriku, diyi kokoru.

30Opi ambo nderi nga di enga ra, gavena pi, Berinike pie, ’ba dria ripi tualu yi be ’diyi pie; 31yi ka fu ’bo, yi ’yo yi ma eselia kini, ’Ba ’dori ’yeni e’yo erini ecozu drazu, kani eri ’izu ku. 32#’Yeta 25:11Te Agiripa ’yo Fesito tia, Agu ’dori ka ndra ’yo i le mu Kaisari vu kuni, te’do ama tru eri ’bo.

Currently Selected:

’Yeta 26: LB66

Highlight

Copy

Compare