’Yeta 23

1 # ’Yeta 22:1; 24:16 Te Pauloni ’ba e’yo amapi ’diyi ma mile garia okporu; eri ’yo ra, Ma adripi, ma asi otini ku e’yo dria mani ’yele Mungu drilia ’diyisi ecazu kpere andrurisi. 2#Yoh 18:22, 23Anania kuhani ambo agapiri azi ’ba pa sopi eri ageia ’diyi dri eri ma ti sazu. 3#Mat 23:27-28; Eze 13:10-15; Lev 19:15Paulo ’yo di eri tia, Munguni nga mi sani, mi abi cole evisirile te alealeru onzikanyaruri’i! Mi ri va e’yo mani lizu ekile azitani ’yolerile, te mi azi ’ba ma sa ma azita nderini ’yole kurile a’disi ya? 4’Ba pa sopi eri ageia ’diyi yi ’yo, Mi kuhani Munguni amboru agapiri 0’da ya? 5#Efu 22:28Paulo ’yo, Ma nini eri kuhani amboru agapi rari’i ’dinini ku, adripi; te e’yo siza kini, Mi ma ’yo e’yo onzi ’ba suru mini ma driliari ma ruaa ku.

6 # ’Yeta 4:2; 22:3; 26:5; Fil 3:5 Te Pauloni varia esele aluri Sadukayoni, esele aziniri Farisaini, eri oyu uru ’ba e’yo amapi ’diyi ma eselia kini, Adripi mani, ma ’ba Farisaini, Farisaiou mvi’i indi; yi e’yo mani li mani engata ’ba draza eseliari a’ile rarisi. 7Eri ka ’yo ’dini ’bo, awata eca ’ba Farisaini ma eselia ’ba Sadukayoni be; ’ba ongulumuru co yi esele ra. 8#Mat 22:23; Mar 12:18; Luk 20:27A’disiku ’ba Sadukayoni yi a’ini engaza ’ba draza eseliari ku, kani malaika, kani orindi ku indi; te ’ba Farisaini yi adri a’i yini yi iri tro. 9#’Yeta 25:25; 5:39Otrena efu ambo; ’ba waraga sipi ’ba Farisainiru ’diyi ma azi enga pa oso agata gazu kini, Ama isuni e’yo onzi ’ba ’dirini ku. Kani orindi kani malaika ka ’yo eri beni? 10Awatani fule okporurisi, opi asikarini azi asikari ma si va eri arizu yi eseliasi, eri jizu ofizu kali asikarinia, a’disiku co ovu urisi ’ba ongulumuru ka mu eri osizu ku.

11 # ’Yeta 18:9; 19:21; 28:16, 23 Ini nderisi Opi so pa eri ageia, ’yo ra, Mi ti asi ku; ekile mini e’yo mani ma eti nzele Yerusalemuarile, mi ma nze e’yo mani ma eti Rumia indi.

E’yo otuzu Pauloni fuzuri

12Angu ka ati ’bo, ’ba Yahudini yi efi ti yi eselia oyo sozasi, kini yi ngani nyaka nya ku, kani yi mvu ku, de yi funi nga Pauloni ku. 13’Ba oyo sopi ’diyi yi aga kali su ra, 14#Yoh 16:2, 3Yi mu kuhani amboru vu ’ba ’wara vu indi, kini, Ama otri ama ngulupi oyo amborusi ra, ama ngani nyaka nya ku de ama funi nga Pauloni oko ku. 15E’yo ’disi emi’i, tualu ’ba e’yo amapi ’diyi be, emi omve opi asikarini eri ejizu emi vu ekile emini lele e’yo erini ndazu kilili aga rarile. Te ama ovu ngonde eri fuzu de eri ecani ogogo ku.

16Te Paulo amvipi ma mva eri e’yo yini eri mbazuri ra; e’yo ’disi eri mu fi kali asikarinia, e’yoni oluzu Paulo tia. 17Paulo eri omve ’ba asikari turu alu driliari alu i vu, kini, Mi ji karilau ’diri opi asikarini vu, eri le e’yo olu eri tia. 18Eri ’du eri ji opi nderi vu, kini, Paulo arururi omve ma i vu, zi ma ma eji karilau ’dori mi vu, a’disiku eri ovu e’yo ’yoza be mi vu. 19Opi asikarini bi eri dria, mu eri be kalaa, zi eri oyokolosi, Mi le ma be a’di e’yo ’yo ya? 20Eri ’yo, ’Ba Yahudini ede e’yo yi eselia mi zizu Pauloni ejizu ’ba e’yo amapi ’diyi ma drilia dru, ekile yini lele e’yo erini ndale kilili aga rarile. 21Te mi a’i e’yo yini zileri ku; a’disiku ’ba yini kali su dri be ’dipi yi eri mba geria. ’Ba ’diyi otri yi yi eselia oyosi kini, yi ngani nyaka nya ku, ngani yi mvu ku, de yi funi nga Pauloni ku; curu’do yi ede yi ngonde, aziza mini tezu, 22’Dini opi asikarini fe karilau nderi dri geri ra, eri azi kini, Mi ece ’ba aluni dri kini mi olu e’yo ’diri ma dri ra ’dini ku.

Paulo ti pezu gavena Felike vuri

23Eri omve ’ba asikari turu alu drilia ’diyi iri i vu, ’yo ra, Emi oti asikari turu iri ngonde, dri kozu sawa na inisi muzu Kaisariaa, asikari akanya dria ’diyi kali aziri, aju be ’diyi turu iri. 24Emi ede akanya azini Pauloni jizu, emi ji eri onyiru gavena Felike vu. 25Eri si waraga ekile ’dinile:

26 # Luk 1:3 Kilaudio Lusia zi gavena Felikeni Inzile Turi ci ci. 27#’Yeta 21:33; 22:25’Ba Yahudini bi ’ba ’dori, te yini ’yezu eri fuzurisi ma ca yi vu asikari be eri pazu, a’disiku ma eri eri ’ba Rumini. 28#’Yeta 22:30Te mani lele e’yo eri esuzuri a’dini yari nizurisi, ma ji eri ’ba e’yo amapi ’diyi drilia. 29#’Yeta 6:9; 18:14, 15Te ma isu yi esu eri agatu, yini gale azita yini ma e’yosirisi, te esuza nde funi i dri erini drazu kani eri ’izu jo aruma ku. 30#’Yeta 24:8Ma ka e’yo yini agu ’dori mbazuri eri ra, coti ma pe eri ti mi vu, ma azi ’ba eri esupi ’diyi yi ma nze e’yo yini eri esuzuri mi drilia. Ma zi di mi ci ci.

31’Dini asikari, ekile erini yi azilerile, ’du Pauloni ji eri inisi Antipatria. 32Dru yi ku asikari akanya dria ’diyi muzu eri beni, te yi mvi kali asikarinia. 33’Ba ’diyi ka ca Kaisariaa ’bo, yi fe waraga gavena dri, yi e’da Pauloni eri ma milia indi. 34#’Yeta 22:3Erini waraga nderi laria, eri zi eri enga angu ngoa ya. Eri ka e’yo erini engazu Kilikiaari eri ra, 35eri ’yo ra, Ma nga e’yo mini nzeleri eri dria ra, ’ba mi esupi ’diyi ka eca ra. Eri azi yi ma te eri ma agei jo amboru Herodeniri ma alia.

Currently Selected:

’Yeta 23: LB66

Highlight

Copy

Compare