2 Samueli 6

Daudini muzu sanduku ejizuri

1Daudi oku ’ba opele Israeli eselia ’diyi dria dika, alifu kali na. 2#Efu 25:22; 1 Sur 13:5; 1 Sam 4:4; Zab 80:1Te Daudi pi nga enga, ’ba ovupi eri be ’diyi be dria, mu Baale-yudaa, sanduku Munguni, runi ’dale Yehova asikari ongulumuruni ripi kerubi eseliari ma ru vusiri ejizu. 3#1 Sam 7:1-2; Kal 7:9Yi ’ba sanduku Munguni gari o’diru dria, yi ofu eri jo Abinadabu ovupi oni driariasi; te anzi Abinadabuni, yi Uza pi Ahio be, yi gari o’diru nde jini. 4Yi ofu eri sanduku Munguni be jo Abinadabu ovupi oni driariasi; te Ahio mu sanduku drilia. 5Te Daudi pi suru Israelini be dria yi ’ye e’yo ayikosi. Yehova ma drilia, suruti afani driasi, o’di pisi, zaburi ngoza be, arimva pisi aiyoro pie, aya wupiri pie.

6 # Kal 4:15 Yi ka ca pari anya cozu Nakoni vileria; Uza eju dri erini sanduku Munguni elozu, tini ’yele e’delerisi. 7#1 Sam 6:19Adra Yehovani di Uza vu ani; Mungu fu eri ’dale e’yo erini ’yelerisi; eri dra sanduku Munguni ageia ’dale. 8Te Daudi ovu aokosi Yehovani Uzani ’yele ’dinirisi; yi ’da pari nde ma ru Perezi-uza ecazu kpere andru. 9#Kal 17:12, 13; 1 Sam 5:10, 11; Zab 119:120; Luk 5:8O’du ndesi Daudi ovu urisi Yehovasi; te eri ’yo, Sanduku Yehovani nga eca ma vu ngoni ngoni ya? 10’Dini Daudi leni sanduku Yehovani ejizu i vu aku Daudinia ku; te Daudi ji eri kalaa Obedi-edomu ’ba Gitiari ma joa, 11#1 Sur 26:4-5; E’do 30:27; 39:5; O’be 3:9, 10; Isa 61:9Te sanduku Yehovani ovu Obediedomu ’ba Gitiari ma jo alia mba na; te Yehova fe drileba Obedi-edomu dri, ori’ba erini be dria.

Sanduku Munguni ejizu Yerusalemuari

12Te yi olu opi Daudi tia kini, Yehova fe drileba ori’ba Obediedomuni pi dri afa erini be dria, ’sanduku Munguni ma e’yosi. ’Dini Daudi mu sanduku Munguni ejizu engazu Obedi-edomu ma joasi cazu uru aku Daudinia ayikosi. 13#Kal 4:15; Yos 3:3; 1 Sur 15:2, 15; 1 Opi 8:5; 2 Sur 5:6Eri ovu ’dini, ’ba sanduku Yehovani jipi ’diyi ka pa ’du pale azia ’bo, eri nga ti fu alu anyapa osoruri be edetaru. 14#Efu 15:20; Lip 11:34; 21:21; Zab 30:11; 1 Sam 2:18; 1 Sur 15:27Te Daudi tu, ongo Yehova ma drilia okpo erinisi dria; te Daudi su koti alina bongo mile be nyiriari i ruaa. 15’Dini Daudi pi suru Israelini be dria, yi eji sanduku Yehovani uru otrena be, guka awu be.

16Eri eca ’dini, sanduku Yehovanini efiria aku Daudini ma alia, Mikali Saulo zi lu derisasi amve, eri ne opi Daudini omburia azini ongo turia Yehova drilia; te eri ’onzo eri asi erini ma alia. 17#1 Sur 15:1; Zab 132:8; 1 Opi 8:5Te yi ofi sanduku Yehovani, ’ba eri pari erini ovupi hema Daudini asole eri driri ma aliaria; te Daudi ede edeta vezaru ’diyi piyi edeta asi anzuruni ’diyi be Yehova drilia. 18Te Daudini edeta vezaru piyi feria edeta asi anzuruni ’diyi be ’boria, eri fe asi ndriza ’ba ongulumuru dri, Yehova asikari ongulumuruniri ma rusi. 19#1 Sur 16:43Eri awa ’ba dri dria, adaru ’ba Israelini ongulumuru ’diyi dri dria, agupi dri azini oku dri indi, ’ba dria alu alu dri, enya olemi pi, za awaza pie, zabibuefi a’wi a’wi ekpazaru ngulu aluri pie. ’Di ma vutia ’ba dria alu alu mvi yi vile joa.

20 # Ekl 7:16; Isa 59:15; 1 Sam 19:24; Lip 9:4 ’Di ma vutia Daudi nga mvi asi ndriza ’bazu ’ba eri vile joa ’diyi ma dria. Te Mikali Saulo zi efu dri fuzu Daudi be, ’yo ra, Opi Israeliniri ovu te inzita be andru ’doni, erini bongo erini truria ati’ba erini ma ati’ba okuru ’diyi ma milia, ekile ’ba saaruni bongo mi trule drinza kokorurile 21#1 Sam 13:14; 15:28Te Daudi ’yo Mikali tia kini, Te eri ovu Yehova drilia, eri’i ma pepi mi ati pi agazu ra, suru erini pie dria, ma pezu ovuzu opiru Israeli ’ba Yehovani ’diyi ma driliari’i-e’yo ’disi ma nga ayiko ’ba Yehova ma milia ani. 22Ma nga ma ’ba teko aga ’diri ra, ma nga ovu toko ma ngulupi ma milia; te ati’ba okuru mini te yi ma e’yo ’yole ’diyi yi nga ma inzini, 23#1 Sam 15:35; Isa 22:14Te Mikali Saulo zi tini mva ku cazu kpere erini drazuria.

Currently Selected:

2 Samueli 6: LB66

Highlight

Copy

Compare