2 Samueli 2

Daudini ’bazu opiru Yuda ma driliari

1 # Kal 27:21; Lip 1:1; 1 Sam 23:2-9; 30:7, 8; 1 Opi 2:11 ’Di ma vutia eri nga eca ’dini, Daudi nga zi Yehova tia kini, Onyiru ma ma tu aku azini Yudani ’diyia ra ya? Te Yehova ’yo eri tia, Mi mu tu. Daudi ’yo, Ma ma tu ngoa ya? Eri ’yo, Hebironia. 2#2 Sam 25:42-43’Dini Daudi tu ’dale, oku erini irii ’diyi be, Ahinoamu Yezireeli ezoruri pi Abigaili Nabali ’ba Karimeliari ma awuzi be. 3#1 Sam 27:2Te Daudi eji vini ’ba ovupi i be ’diyi, yi alu alu tualu ’ba ovupi yi ma joa ’diyi be; te yi ove i aku Hebironia ’diyi ma alia. 4#1 Sam 31:11-13; 2 Sam 5:5’Ba Yudani ’diyi eca, yi osu odu Daudi ma dria ovuzu opiru suru Yudani ma drilia. Yi ka olu Daudi tia kini, ’Ba Saulo ma avu sapi ’diyi yi ’ba Yabesigileadia ’diyi, 5#Zab 115:15Daudi nga ojio ti pe ’ba Yabesi-gileadia ’diyi vu ’yozu, Yehova ma fe asi ndriza emi dri, emini asi onyiru ’diri ecele opi emini Saulo vu, emini eri sazurisi! 6#2 Tim 1:16; Mat 5:44Curu’do Yehova ma ece yiki aleruri pi emi vu e’yo adaruri be! Te ma nga e’yo onyiru ofe emi vu emini e’yo onyiru ’dori ’yelerisi. 7’Dini curu’do emi ma dri ma ovu okporu, emi ma ovu asi be okporu uri kokoru, a’disiku opi emini Saulo dra ’bo, azini suru Yudani osu odu ma Idria ma ’bazu opiru yi ma drilia ’bo.

’Daudini omba ’bazu asikari Sauloni ’diyi beri

8 # 1 Sam 14:50; 17:55; E’do 32:2; 2 Sam 17:27 Isu Abineri Neri mvi, ambo asikari Sauloni ’diyi ma driliari, ’du Isiboseti Saulo mvini, ji eri Mahanaimua; 9’ba eri opiru Gileadi pi ma drilia, ’ba Asuriaa ’diyi pie, Yezireeli pie, Efiraimu pie, Benyamini pie, Israeli pie dria. 10Isiboseti Saulo mvi ovu eli be kali su erini e’dozu opi nyazu Israeli ma driliarisi, te eri nya opi eli iri. Te suru Yudani bi Daudi ma vuti. 11Eli Daudini opi nyazu Hebironia suru Yudani ma drilia ’diyi ovu eli aziri drinia mba azia.

12 # Yos 9:3; 18:25; Isa 28:21 Abineri, Neri mvi pi ati’ba Isibosetini ’diyi be, yi fu Mahanaimuasi muzu Gibeonia. 13#Yer 41:12Te Yoabu Zeruiya mvi pi ati’ba Daudini ’diyi be, yi fu mu dri fuzu yi be yi alio Gibeoniari ma tia; yi ori va, alu yi ti ega aluria, azini yi ti ega aziniria. 14#O’be 10:23; 13:10Te Abineri ’yo Yoabu ma tia, Ma zi mi tia, mi fe karile ma enga uru a’di o’bizu avitasi ama drilia. Te Yoabu kini, Yi ma enga uru. 15Te yi nga di enga uru, yi nga zo kalafe yini vusi, mudri drini iri Benyamini pi dri Isiboseti Saulo mvi be, azini ati’ba Daudini mudri drini iri. 16’Ba dria alu alu yi bi yi dri yi agupi be, yi so yi ejea seisi yi agupi be; ’dini yi o’de va tualu. E’yo ’disi yi e’da pari nderi ma ru Helikatihazurimu’i, eri ovu Gibeonia. 17#1 Opi 20:11A’di ovu okporu tu etu nderisi; te ati’ba Daudini yi aga Abineri pi ’ba Israelini ’diyi be ra.

18 # 1 Sur 2:16; 12:8; Zab 18:33; Ong 2:17; 8:14 Te Zeruiya ma anzipi na ovu ’dale indi, yi Yoabu pi, Abisai pi, Asaheli pi. Te Asaheli ma pa ovu perepere onguru ekile eba ma pale; 19te Asaheli dro Abineri ma vuti, erini nzuria ojani i dri ndia kani dri ejia ku erini Abineri ma vuti droria. 20Abineri nga di i oja, lu i vutia, ’yo, i Asaheli, ’di mi’i? Eri omvi e’yo kini, ’Do ma’i. 21#1 Sam 17:42Abineri ’yo eri tia, Mi oja mi dri ndia kani dri ejia, mi bi karilau alu, mi pa afa erini ombani ’diyi. Te Asaheli leni i oja eri vuti kuzu ku. 22Te Abineri nga ’yo, dika Asaheli tia, kini, Mi oja mi kalaa kuzu ma vuti bizu ja; te ma ma fu mi va a’di e’yosi ya? Ka’dini ma eco mi adri Yoabu ma mile nezu ngoni ngoni ya? 23#2 Sam 3:27; 4:6Te eri ga i ojako si; e’yo ’disi Abineri so eri ma ale aju luresi, ’dini aju nde fu eri ngukua; eri e’de ’daa, dra vini pari nde ma vua ’daa. Te ’ba dria ecapi pari Asahelini e’dezu drazuria ’diyi, yi so pa e’yere.

24 # Yos 9:3; 10:2 Te Yoabu pi Abisai be, yi dro Abineri ma vuti; etu ’ de yini ecaria oni Ama ovupi Gia ma driliaria, geri mupi roko Gibeoniari ma tia. 25Te ’ba Benyaminini yi oku yi tualu Abineri ma vutia, yi eca ongulumu alu, yi so pa oni dria. 26#Yob 18:2; 19:2; Zab 4:2; ’Yeta 7:26Abineri nga di oyu Yoabu vu ’yozu kini, Seini nga nya ’dani ’dani ya? Mi nini ku, kalatini asizuri nga ovu oji drazani ya? Eri nga ovu mi drilia izu ngopi ya, de nga mi feni azita ’bani yi ojazu adripi yini ma vuti drozu kuzu ja ku ya? 27#O’be 17:14; 20:18; Luk 14:31, 32Te Yoabu kini, Ekile Munguni ovule idrirurile, te’do mi ka ’yo ku, adaru anguni te ati o’bitisi, ’ba dria alu aluni te nga ku yi adripi ma vuti droko ja ndo. 28’Dini Yoabu vu guka; yi so pa, yi droni Israeli ma vuti dika ku, ’dini a’di dika ku indio 29#Ong 2:17; E’do 32:2; Yos 21:38; 2 Sam 17:24Te Abineri pi ’ba erini ’diyi be aci ini nderisi rra Araba ma eselia; yi zo Yoridanini ra, yi aga Bitironi ma eseliasi dria, ca Mahanaimua. 30Te Yoabu emvi, erini Abineri ma vuti drozu kuzu jari ma vutia; te erini ’ba dria okuzu tualu ’boria, Asaheli pi ’ba mudri drini oromi ati’ba Daudini ma eselia ’diyi be, Yi ovuni ’daa ku. 31Isu ati’ba Daudini ofu ’ba turu na drini kali azia ’ba Benyaminini pi ma eselia ’ba Abinerini be. 32#E’do 47:29, 30; 49:29; Lip 8:32; 2 Sam 17:23; 19:37Yi ’du Asaheli, yi sa eri ’bile i atini ovupi Betelehemuari ma alia. Te Yoabu ’ba erini ’diyi be, yi aci ini ndesi rra, yi ca Hebironia etuni ’baria efuria.

Currently Selected:

2 Samueli 2: LB66

Highlight

Copy

Compare