2 'Ba Korintoa 'Diyi 3

’Ba azi ngapi aziza o’dirusi ’diyi

1 # 2 Kor 5:12; Rum 16:1; ’Yeta 18:27 Ama e’do dika e’yo ama ngulupini ecezu ama ’ba onyiru ya? Kani ama le, ekile ’ba azini ’diyile, waraga e’yo amani ecezu, sile emi vu, kani emini sile ’diyi ya? 2#1 Kor 9:2Emi ovu waraga amani, ovupi sizaru asi amani alia, ’ba driani nile ra azini lale rari’i; 3#Efu 24:12; 31:18; 34:1; O’be 3:3; 7:3; Rum 15:16; Yer 31:33; Eze 11:19; 36:26te emi e’da ce ovuzu waraga Kristoni, amani azini ’yele, sile vino kokoru te Mungu idriruri ma Orindisi, afa ’barataru edele onisiri ma dria ku, te afa ’barataru ’ba ma asiari ma driari’i.

4Te Kristosi ama ovu a’ita i ’dinileri be Mungu vu. 5#2 Kor 2:6Ovuni kini ama fu dri ama ngulupisi, amani e’yo azini egazu kini eri efu ama ngulupisi, ’dini ku, te dri fuza amani enga Mungu vu; 6#Yer 31:31; 1 Kor 11:25; Rum 7:6; Yoh 6:63eri ’ba ama fudri ovuzu ’ba aziza o’diruri ma azi aza kopi ’diyiru, waraga efisi ku te Orindisi; isu waraga efini ’ba fu fu, te Orindini idri fe.

7 # Efu 34:29 Te azi ngaza dratani, opale waraga efisi oni driari ka ovu ndra diza be, ’dini econi anzi Israelini Musa ma mile luzaru ’dani eri mileni dilerisi ku, ka tro diza nde ’ye i de de ti, 8#Gal 3:2, 5ka’dini azi Orindiniri ngani ovu diza be tunini ku ya? 9#Azi 27:26; Rum 1:17; 3:21’Dinile azi e’yo liza ’ba ndezuriniri ka ovu diza be, azi ’ba lazu kililiruri agani diza be amboru tu ku ya? 10#Efu 34:29Te ada, afa nde ndra ovupi dizaruri eca ovu diza kokoru, diza agapi turi ma e’yosi. 11’Dini afa ’yepi i depi rari ka emu ndra diza be, afa ovupi ’dani ’daniri ovuni diza be tunini ku ya?

12E’yo ’dirisi amani ovuria asi teza ’dinileri be, ama e’yo ’yo mgba a uri kokoru, 13#Efu 34:33, 35azini ama ovuni lekile Musale leu, erini bongo ’bale i mile a’buzu anzi Israelini kazu mile ’bazu diza nde ’yepi i depi deri luzu kpere erini i deria kurile. 14#Rum 11:25Te asisile yini mba kongolokoru; te ecazu kpere o’du andru ’dorisi, ’bani aziza okuri laria, a’buza ’diri ovu ’dani ayukokoru, te bongo a’buza ’diri de i Kristo alia. 15Te ecazu kpere andru, ’bani azita Musani laria yi dri, bongo a’bu yi ma asi ’dani; 16#Efu 34:34; Rum 11:23, 26te ’ba ka i asi oja Opi vu, bongoni i ’du ra. 17#Yoh 7:39; 8:36; Efu 16:7; 24:17; Rum 8:2Te Opi ndeni Orindi, pari Opi ma Orindini ovuzuria, trutani ’daa indi. 18Te ama dria, mile a’bukokoru be, diza Opini e’dapi ekile mandara ma aliarile ’diyi, ama ama oja ovuzu wura eriniru, engazu diza vu kpere diza vu drile drile; te e’yo ’diri enga Opi ovuni Orindi’iri vu.

Currently Selected:

2 'Ba Korintoa 'Diyi 3: LB66

Highlight

Copy

Compare