1 Timoteo 4

E’yo ’bani ngazu a’ita kuzuri ecezuri

1 # 2 Tim 3:1; 2 Pet 3:3; Yud 1:18; 1 Yoh 2:18 Te Orindi ’yo ocikokoru, kinicwu vilerisi ’ba azini yi nga asi vile a’ita kuzu, asi ’bazu orindi ’ba icipi ’diyi ma e’yo erizu, imbata orindi onzi ’diyini be, 2lokiri ’ba e’yo ’yopi inzoru ’diyinisi, yi ngulupi ma asisile e’yo onzi nizuri otru i diridiriru ekile vele acisirile; 3#E’do 9:3; 1 Kor 10:30, 31yi azi ’ba ma bi oku ku, azini ’ba ma ku nyaka azini Munguni ndra ’bale ’ba a’ita be e’yo adaru nipi ra ’diyini nyazu awa’difosiri ja. 4#E’do 1:31; ’Yeta 10:15Te afa dria Munguni o’bale ’diyi ovu onyiru, afa aluni ma ovu gazaru ku, eri ka ovu a’izaru awa’difosi; 5a’disiku eri ovu ’bazaru alaru e’yo Munguni pisi Mungu ziza be.

’Ba azi Yesu Kristoni ma aza kopi onyiruri

6Mi ka e’yo ’diyi ece adripi dri, mi nga ovu ’ba azi Kristo Yesuniri ma aza kopi onyiruri, mini okpo isuria e’yo ’yoza a’ita pinisi imbata, onyiru mini vutini bileri be. 7#1 Tim 1:4; 6:20; 2 Tim 2:16, 23; Tit 1:14; 3:9Te, mi ma ga e’yo ’yoza onzi oku dezaru ’diyini o’yolerile ’diyi si.Azini mi ma o’bi mi edezu okporu adriza ’bani i ani Mungu inzizuri ma alia; 8#1 Tim 6:6a’disiku e’yo okpo ruani isuzuri ovu orodriru ewu were, te adriza ’bani ani Mungu inzizuri ovu orodriru e’yo driasi, te eri azi idri curu’dori pi fezu, ngapi emupi ndori be. 9#1 Tim 1:15E’yo ’yoza ’diri eri adaru, azini eri fu dri ’ba driani a’izu asi alusi. 10#1 Tim 2:3, 4E’yo ’dirisi ama ama ecandi, azi ngazu okposi, amani asi teza amani ’bale Mungu idriru, ’ba dria tuni ’ba a’ita be ’diyi opapiri ma driarisi.

11Mi ma azi e’yo ’diyi, mi imba,yi indi. 12#Tit 2:15’Ba aluni ma ’ba mi, aparakaru eli minini ovule wererisi ku, te mi ma ovu ecetaru ’ba a’ipi ’diyi dri, ’yota pisi, adriza pie, leta pie, a’ita pie, asi alaruri pie dria, 13De nga ma emuni ku, mi ma ’ba mi asi buku laze, ’ba ma asi omizu, ’ba imbazu indi. 14#1 Tim 5:22; 2 Tim 1:6; ’Yeta 6:6; 8:17Mi ma ku feta ovupi mi alia, ndra fele mi dri e’yo ondrizasi ’ba ’wari ’diyini yi ma dri tiria mi driariari ku. 15Mi ’ba mi asi e’yo ’diyi ma dria, mi ma ovu yi ma alia asi driasi, e’yo mini agazu drileri ma e’da i ’ba dria ma milia; beni, 16#Rum 11:14Mi ma ndre onyiru mi ngulupi ma agei tezu imbata mini be; mi ma ovu ’dani e’yo ’diyi ma alia, ka’dini mini ’yeria ’dinile mi ilia mi ngulupi pa ’ba mi eripi ’diyi be.

Currently Selected:

1 Timoteo 4: LB66

Highlight

Copy

Compare