1 Samueli 5
5
Sandukuni ovuzu ’ba Filisitiaa ’diyi ma anguari
1’Ba Filisitiaa ’diyi ka sanduku Munguniri ’du ’bo, yi ji eri engazu Ebenezeria cazu Asidodia, 2’Ba Filisitiaa ’diyi ’du sanduku Munguniri ji eri jo Dagoni vileria, ’ba eri Dagoni ma ageia ogogo. 3#Efu 12:12; 18:11; Lip 16:23; 1 Sur 16:24-26; Zab 95:3; 97:9; Isa 19:1; 46:1, 2, 7; Nah 1:14’Ba Asidodia ’diyi ka enga dru ’dini o’biti drio drio, mi lu, Dagoni e’de andreti dria nyakua sanduku Yehovani ma drilia. Te yi ’du Dagonini, yi ’ba eri eri ma paria dika. 4#Isa 40:18; Yer 50:2; Eze 6:4, 6; Mik 1:7Te yi ka vini enga dru ’dini o’biti drio drio, mi lu, Dagoni ma dri pi dri erini ’diyi be iri tro onyo yi ra, la jotilea; Dagoni ma rua aceni a’dule. 5#Zef 1:9E’yo ’disi atalau Dagonini, kani ’ba fipi Dagoni vile joa ’diyi dria, yi ’bani yi ma pa jotile Dagonini Asidodiaria ku, ecazu kpere curu’do. 6#Efu 9:3; Zab 7:11; 9:17; 32:4; Isa 31:3; Dan 4:35; ’Yeta 13:11; 1 Sam 6:5; Azi 28:27Te dri Yehovani ovu ndra nzizaru ’ba Asidodia ’diyi ma dria, azini eri ja yi ma dri ra, eri ofu yi Asidodi alia angu eri ma ageia ’diyi pie azo apipinisi. 7Te ba Asidodia ’diyi ka ndre e’yo ovu ’dini ’bo, yi yo ra kini Sanduku Mungu Israelinirini ngani andri ama vu ’doa dika ku;eri ma drini ovule curu’do nzizaru ama vu dria, azini adrou amani Dagoni ma dria indirisi. 8E’yo ’disi yi pe di ’ba ti opi Filisitiaa ’diyi okuzu dria yi vu, kini, Ama nga ’ye sanduku Mungu Israelinirinisi i ngoni ya? Te yi omvi e’yo kini, ’Ba ma ’du sanduku Mungu Israelinirini ji Gatua. ’Dini yi ’du sanduku Mungu Israeliniri jizu ’dale. 9#Azi 2:15; 1 Sam 7:13; 12:15; Zab 78:66Te eri ovu ’dini, yini eri ’duzu ’boria, dri Yehovani ovu a’di ’dizu aku nderi ma ruaa onzi, candi amboru ’ba sipi tairuri fezu, eri ofu ’ba alenia ’diyi, ’dini apipi opi anzi ’ba ’wara be dria. 10E’yo ’disi yi pe sanduku Munguni ma ti Ekironia. Eri nga eca ’dini, sanduku Mungunirini ecaria Ekironia, ’ba Ekironia ’diyi yi otre uru, kini, Yi eji sanduku Mungu Israelinirini ama vu ama ofuzu ’ba amani ’diyi be. 11E’yo ’disi yi pe vini ’ba ti muzu opi Filisitiaa ’diyi okuzu dria, te yi ’yo kini, Emi pe sanduku Mungu Israelinirini ma ti ’dale, eri ma mu dika pari eri ngulupiniria, ’dini eri kazu ama ofuzu ’ba amani ’diyi pie ku beni, A’disiku candi drata nderini ’ba aku nderi ma alia dria ’diyi sile tairurisi. Dri Munguni ovu ’daa nzizaru tu. 12#Efu 11:6; O’be 21:13; Isa 15:3; Yer 25:34; Amo 5:17; Yak 2:13Te ’ba odrapi ku ’diyi apipi ecandi yi, azini awu aku amboru nderini tu kpere ’bua.
Currently Selected:
1 Samueli 5: LB66
Highlight
Copy
Compare
Share
Want to have your highlights saved across all your devices? Sign up or sign in
Bible in Lugbara © United Bible Societies, 1966.
