1 Samueli 27
27
Daudini ovuzu ’ba Filisitiaa ’diyi ma eseliari
1Daudi ’yo i ma asia, Ma nga dri ja o’du azinisi Saulo ma dria ra; e’yo onyiru agapi mani apazu angu ’ba Filisitiaa ’diyiniria rari yo; Saulo ma asini nga ande ma ndruzu angu Israelini ma alia dria, ’dini ma nga ma pa eri ma dria ra. 2#1 Sam 25:13; 21:10Te Daudi enga ra, eri aga ’aa’dale, eri’i ’ba erini turu azia ovupi eri be ’diyi be, cazu Akisi Maoki mvi, opi Gatuari vu. 3Te Daudi adri Akisi be Gatua, eri’i ’ba erini ’diyi pie, ’ba dria alu alu ’ba i vile joa ’diyi be, adaru Daudi oku erini iri Ahinoamu Yezireeli zaaruri pi Abigaili Karimeli zaaruri ovupi ndra Nabali ma okururi be. 4Yi olu Saulo tia e’yo Daudini apazu Gatuari; te eri ndruni eri dika ku.
5Te Daudi ’yo Akisi ma tia, Ma ka curu’do asi ndriza isu mi milia ’bo, mi fe yi ma fe ma dri pari aku amboru angu amveri ma alia, ma ma adri ’daa; a’disiku ati’bo miniri ma adri mi be aku opiniria ’dani a’di e’yosi ya? 6#Yos 15:31; 19:5Akisi fe di eri dri aku Zikilagi o’du ’dasi; e’yo ’disi Zikilagi awu di angu opi Yudani ’diyiniru kpere curu’do. 7Te o’du Daudini adrizu ’ba Filisitiaa ’diyi ma angua ma kalafe ovu eli alu pi drinia mba su.
8 #
Yos 13:2; Lip 1:29; Efu 17:16; 1 Sam 15:7, 8; E’do 25:18 Daudi pi tu ’ba ini ’diyi be; yimu fi angu ’ba Gesuriniri pi ma alia, ’ba Girizini pie, ’ba Amalekini pie, omba ’bazu yi be; te engazu gbudrio suru ’diyi yi ovu kari’baru angu ndea, cazu Suria kpere Misiria. 9Daudi ja angu nderi ma dri, eri kuni agupi kani oku idriru aluni ku, azini eri o’du kabilo pi, ti pie, akanya gaaru ’diyi pie, ngamia pie, bongo suza pie, eri emvi ra, eca Akisi vu. 10#Zab 141:3; O’be 29:25; 1 Sur 2:9Te Akisi ka ’yo ra, Emi mu te andru ombaa ’ba a’diko be ya? Daudini adri omvi ra kini, Kala, uruleru Yudaniri ma dri aruzu, kani kala uruleru ’ba Yerameelia ’diyiniri ma dri aruzu, kani kala uruleru ’ba Kenia ’diyiniri ma dri aruzu. 11Te Daudi kuni ’ba azini agupi kani oku idriru aluni ejizu Gatua ku, kini, Yi kazu ’yozu ama ma e’yosi ku kini, Daudi ’ye ’dini. Azini adriza erini o’du dria erini adrizu angu ’ba Filisitiaa ’diyiniria ovu ’dini. 12Akisi a’i e’yo Daudini, kini, Eri fe ’ba ini Israelini ’diyi ma ngu i onzi tu; ’dini eri nga ovu ati’bo mani ’dani ’dani.
Currently Selected:
1 Samueli 27: LB66
Highlight
Copy
Compare
Share
Want to have your highlights saved across all your devices? Sign up or sign in
Bible in Lugbara © United Bible Societies, 1966.
