1 Opi 21

Ahabuni amvu Nabotini pazu iniruri

1 # Lip 6:33; 1 Sam 29:1 E’yo ’diyi ma vutia eri eca ’dini, Nabotu ’ba Yezireelini ovu nga zabibuni be, eri ovu Ahabu opi Samariaari ma opijo ageia ogogo. 2#E’do 3:6; Efu 20:17; Azi 5:21; Hab 2:9; Luk 12:15; 1 Tim 6:9, 10; Yak 1:14, 15; 1 Yoh 2:16; 1 Sam 8:14Te Ahabu ’yo Nabotu tia kini, Mi fe ma dri mi vile amvu zabibuniri, ’dini eri ma ovu mani amvu tibiniriru, erini ovule ma vile aperitia ogogorisi; te ma nga eri ele amvu zabibuni onyiru eri agapirisi; te ka onyiru mi milia, ma nga mi dri silingi fe ekile ajenini ovulerile. 3#Lev 25:23; Kal 36:7; Eze 46:18Te Nabotu ’yo Ahabu tia, Yehova ma milia ma econi angu ma a’bipini kule ma dri awurusoruri fezaru mi dri ku. 4Ahabu fi i vile joa asi nziza be azini aoko be i asia, e’yo Nabotu ’ba Yezireelinirini ’yole eri tiarisi; a’disiku eri ’yo ra, Ma ngani angu ma a’bipini kule ma dri awurusoruri fe mi dri ku. Eri la va gbolo erini dria, co ti kalaa, ga nyaka nyako si.

5Te Yezebeli oku erini eca eri vu, ’yo eri tia, Asi mini ovu candisi tu ’dini a’di e’yosi ya, mini nyaka nyazu kuri? 6Eri ’yo eri tia, A’disiku mani e’yo ’yole Nabotu ’ba Yezireeliari berisi, ma ’yo eri tia kini, Mi fe ma dri mi vile amvu zabibuniri silingisi; ka’dini yo, ka onyiru mi milia, ma nga eri ele amvu zabibuni azinirisi; te eri omvi ma tia, Ma ngani mi dri amvu mani zabibuniri fe ku. 7#1 Sam 8:14; Yer 6:7; Mik 2:1; 7:3Oku erini Yezebeli ’yo eri tia, Mi curu’do opi Israelini nya mi’i ku ya? Mi nga, mi nya nyaka, asi mini ma ovu avikosi; ma nga amvu zabibuni Nabotu ’ba Yezireeliariniri fe mi dri.

8’Dini eri si waraga Ahabu ma rusi, eri ekpa yi afa ecetaru Ahabunirisi, eri pe waraga ’diyi ma ti ’ba ’wara azini ’ba amboru ovupi aku Nabotunia ovupi eri be tualu ’diyi vu. 9Eri si waraga nde ’diyi ma alia kini, Emi azi ’ba tia nyaka ’dazu, emi ’ba Nabotuni uru ’ba ongulumuru ma eselia; 10#Azi 13:13; Lip 19:22; 1 Sam 2:12; 2 Sam 20:1; 23:6; 2 Kor 6:15; Efu 22:28; Lev 24:15, 16; ’Yeta 6:11; Lev 24:14emi ’ba ’ba iri inzoru eri drilia, emi fe yi ma su asu ruania inzosi, ’yozu, Mi o’da ndra Mungu pi opi be. Vutinia emi ji eri amve, emi o’be eri onisi, ma dra ra. 11Te ’ba aku erinia ’diyi, ’ba ’wara azini ’ba amboru ovupi aku erini alia ’diyi, yi ’ye ekile e’yo Yezebelini tini pele yi vurile. Ekile e’yo sizaru waraga erini tini pele yi vu ’diyi ma aliarile, 12#Yob 15:34; 34:30; O’be 11:9; 29:12; Isa 9:16, 17; 32:6, 7; 1 Tim 4:2yi azi ’ba tia nyaka ’dazu, yi ’ba Nabotuni uru ’ba ongulumuru ma eselia. 13#Kal 15:36; Yos 7:24; 2 Sur 24:21; Mar 15:20; ’Yeta 7:58, 59; Ebra 11:37’Ba inzoru iri nde ’diyi yi efi ri eri drilia; ’ba inzoru iri ’diyi su asu eri ruaa, adaru Nabotu ruaa, ’ba ongulumuru ma milia, ’yozu kini, Nabotu o’da ndra Mungu azini opini indio Yi ofu di eri akuasi amve, o’be eri onisi, dra kai ra. 14’Di ma vutia yi pe ’ba ti Yezebeli vu ’yozu, o’be di Nabotuni onisi, eri dra ’bo. 15Eri eca ’dini, Yezebeli ka eri kini yi o’be Nabotuni onisi, eri dra ’bo, Yezebeli ’yo Ahabu tia, Mi nga, mi ’du amvu zabibuni Nabotu ’ba Yezireeliariniri miniru, erini ndra gale feko mi dri silingisi siri; te Nabotu ovuni idriru ku, eri dra ’bo. 16Eri eca ’dini, Ahabu ka e’yo Nabotuni drazu ’bori eri ra, Ahabu nga mbele, eri si va amvu zabibuni Nabotu ’ba Yezireeliariniri ’duzu iniru.

17 # Zab 9:12 Te e’yo Yehovani eca Eliya ’ba Tisibini vu, ’yozu kini, 18#1 Opi 13:32; 2 Sur 22:9Mi nga, mi si va dri fuzu Ahabu opi Israelini ovupi Samariaari be; mi ne, eri ovu amvu zabibuni Nabotuniri ma alia, pari erini eluzu muzu eri ’duzu iniruria. 19#E’do 4:9-11; 2 Sam 12:9; 1 Opi 22:38Mi ’yo eri tia, Yehova ’yo ’dini, Mi ’di ’bo, mi ’du afa eri vileri miniru indi ya? Te mi ’yo eri tia, Yehova ’yo ’ dini: Pari oceni ari Nabotuni mbezuria, oceyi nga ari mini mbe, adaru mi ngulupiniri’i. 20#1 Opi 18:17; Isa 29:21; Amo 5:10; 2 Opi 17:17; Rum 7:14Ahabu ’yo Eliya tia, Ari’bo mani la, mi isu ma ra ya? Te eri omvi eri tia, Ma isu mi ra, a’disiku mi je mi ngulupi e’yo ovupi onzi Yehova ma miliari ’yezu, mi’i. 21#1 Opi 14:10; Azi 32:35; 2 Opi 9:8; Zab 94:1-23; 1 Sam 25:22Mi ne, ma nga e’yo onzi eji mi dria; ma nga mi ini teketeke ra,ma nga agupianzi dria dri ja Ahabu vusi alu alu ra, ombele ati’baru ’diyi ’ba kari’baru Israelia ’diyi be iri tro; 22#1 Opi 15:29; 16:3, 11te ma nga suru mini ’ba ekile suru Yeroboamu Nebati mvinile, indi vini ekile suru Baasa Ahiya mvinile, a’disiku e’yo onzi minini aoko engale ma asiarisi, mini fele Israelini e’yo onzi ’yelerisi indi. 23#2 Opi 9:36; Zab 7:16; 9:15, 16Te Yehova ’yo Yezebelimae’yosi indi kini, Oceyi nga Yezebelini nya kali abi be izuru Yezireeliari ma ageia. 24#1 Opi 14:11; 16:4’Ba Ahabuni odrapi akua ’diyi, oceyi nga nyani, odrapi nyamua amve ’diyi, aria ’bua ’diyi nga nyani.

25 # 1 Opi 16:30, 31; 11:1, 4; E’do 6:2-5 Agu azini ekile Ahabuleni yo, i ngulupi jepi e’yo ovupi onzi Yehova ma miliari ’yezu, oku erini Yezebelini eri ma asi engale ’yezuniri. 26#E’do 15:16; 2 Opi 21:11Eri ’ye onzikanyaru tu, erini wura toko inzizaru ’diyi ma vuti bizurisi, ekile e’yo dria ’ba Amorini Yehovani ofule anzi Israelini ma drilia ’diyini ’yelerile. 27#E’do 37:34Eri eca ’ dini, Ahabu ka e’yo ’diyi eri ra, eri osi bongo ini ra, eri su koliba i ma ruaa’i, eri ga nyaka nyako si, la koliba be i ruaa ’dani, eri aci e’yere taisi. 28E’yo Yehovani eca Eliya ’ba Tisibini vu kini, 29#Zab 66:33; 78:34-37; 2 Opi 9:25Mi ne Ahabuni i ngulupi ’bazu va ma drilia afu kokoru ’dori ra ya? Erini i ’bale va afu kokoru ma driliarisi, ma ngani drileonzi nderi eji ewu erinisi ku; te ewu mvi ngaresi ma nga drileonzi nderi eji suru erini dria.

Currently Selected:

1 Opi 21: LB66

Highlight

Copy

Compare