1 Opi 12

Israelini mbuzu amveri

1 # 2 Sur 10:1 Rehoboamu mu Sekemua, a’disiku Israeli dria ca Sekemua eri ’bazu opiru. 2#1 Opi 11:26, 40Eri eca ’dini, Yeroboamu Nebati mvi ka e’yo nderi eri ra (a’disiku eri ovu ndra nga Misiria pari erini apazu nzuzu opi Sulemani ma miliarisi, Yeroboamu nde adri Misiria, 3te yi pe ’ba ti eri omvezu), Yeroboamu emu ’ba ongulumuru Israelini be dria, yi ’yo Rehoboamu tia kini, 4#1 Sam 8:11-18; 1 Opi 4:7, 22; 9:15; Yob 20:19-23; O’be 3:31; Ekl 5:8; Isa 58:6; Eze 45:8; Amo 4:1, 2; Mik 2:1, 3; Mal 3:5; 1 Tes 4:6Mi ati ’ba ndra kulumbu ewaru ama dria, ’dini curu’do mi ’du azi ewaru mi atini, azini kulumbu nzizaru erini ’bale ama driari ma nziza fo, te ama nga azi nga mi dri beni. 5Eri ’yo yi tia, Emi mu nga te pale na, emi emu ma vu dika. ’Ba nde ’diyi mu di ra. 6#Yob 12:12; 32:7; O’be 27:10; Ekl 10:4; Yer 42:2-5; 43:2Opi Rehoboamu nga di e’yo nderi ama tualu ’ba mbazaru pa sopi ndra i ati Sulemani drilia ewu erini ovuzu nga idrirurisi ’diyi be, kini, Emi ama e’yo ngoni ya, emini ngale fele ma driri omvizu ’ba ’doyi ma tia ya? 7#2 Sur 10:7; O’be 15:1Yi nga di e’yo omvi eri tia kini, Mi ka nga ovu ’ba ’diyi ma ati’boru andru, azi ngazu yi dri, e’yo omvizu yi tia, e’yo onyiru ’yozu yi be, ka’dini yi nga ovu ati’ba mini ’dani ’dani. 8Te eri ku e’yo amaza ’ba mbazaru ’diyini yini amale fele eri driri, te eri ama e’yo tualu karile zopi tualu eri be, pa sopi eri drilia ’diyi be. 9Eri zi yi tia kini, Emi fe e’yo amaza ngoni ya, ama ma omvi e’yo ’ba ’doyi tia ya? Yi ’yo ma tia kini, Mi ’du kulumbu mi atini ’bale ama driari ma nziza fo! 10#1 Opi 3:7; 14:21; 2 Sur 10:10, 11; 22:4; Zab 7:16; 140:11; O’be 18:6, 7; Isa 47:6Te karile aziru zopi eri be ’diyi omvi e’yo eri tia kini, Mi ma ’yo ’dini ’ba e’yo ’yopi mi be ’diyi ma tia. ’Ba ’diyi ’yo ra, Mi ati ’ba ndra kulumbu nzizaru ama dria, te mi ’du nzizani ama dri fo! ’Ba e’yo ’yopi ’dini ’diyi ma tia mi ma ’yo ’dini, Drimva gana maniri ovu oseru aga ma ati ma o’du ra. 11Ma ati ’ba ndra kulumbu nzizaru emi dria, te ma nga kulumbu emini ma nziza adro drinia dika curu’do. Ma ati co ndra emi enyirikosi, ma di nga emi co otunukuasi. 12’Dini Yeroboamu piyi eca Rehoboamu vu ’ba ongulumuru be o’du narisi, ekile opini azilerile kini, Emmi emu dika ma vu o’du narisi, 13Te opi omvi e’yo ’ba ’diyi tia ti okporusi, eri ku e’yo amaza ’ba mbazaru ’diyini amale eri driri ja, 14eri ’yo yi tia ekile karileni amalerile, kini, Ma ati ’ba ndra kulumbu nzizaru emi dria, te ma nga kulumbu emini ma nziza adro drinia dika; ma ati co ndra emi enyirikosi, te ma nga emi co otunukuasi. 15#Lip 14:4; 1 Opi 22:23; 2 Sur 10:15; 22:7; Zab 5:10; Amo 3:6; 1 Opi 11:11’Dini opi erini e’yo ’ba nde ’diyini ku; e’yo nde eca ’dini Yehovani ’yelerisi, e’yo Yehovani ’yole Ahiya ’ba Siloari ma tisi Yeroboamu Nebati mvi ma tiari ma so pa ani beni. 16#2 Sam 20:1Te Israeli dria ka ndre opi erini e’yo yini ku, ’ba nde ’diyi omvi, e’yo opi tia kini, E’yo ama eselia Daudi pieri ngoni ya? Ama ovuni awuruso Yese mvini be aluni ku. Israeli la, emi mu hema eminia fo! Daudi, mi te mi ngulupi ma jo agei curu’do. ’Dini Israeli yi mu di hema yinia. 17#1 Opi 11:13; 2 Sur 10:17; 11:13-17Te Rehoboamu ovu opiru anzi Israelini adripi aku amboru Yudani ma alia ’diyi ma drilia. 18#2 Sam 20:24; 1 Opi 4:6; 5:14; 2 Sur 10:13Opi Rehoboamu pe Adoramu ovupi opiru ’ba yini okule azi ngazu ’diyi ma driliari, te Israeli dria o’be eri onisi, dra ra, Te opi Rehoboamu nzu mbele fizu gari erini ma alia, apazu Yerusalemua. 19#1 Sam 10:19; 2 Opi 17:21; 2 Sur 10:19’Dini Israeli yi mbu suru Daudini ma ruaa amve ecazu kpere andru. 20#1 Opi 11:13Te Israeli dria ka eri ra kini Yeroboamu emvi ’bo, yi pe ’ba ti eri omvezu fizu ’ba ongulumuru ma eselia, yi ’ba eri opiru Israelia dria ma drilia. ’Ba aluni bini suru Daudiniri ma vuti ku, pe kiri suru Yudaniri a’dule, 21#2 Sur 11:1Te Rehoboamu ka eca Yerusalemua, eri oku suru Yudaniri dria, azini suru Benyamininiri, adaru ’ba opele ombani ’diyi alifu pale turu alu kali aro, a’di ’dizu suru Israeliniri be, opi nyaza omvizu Rehoboamu Sulemani mvi ma dria. 22#2 Sur 11:2Te e’yo Munguni eca Semaya ’ba Munguni vu, ’yozu kini, 23Mi ma ’yo Rehoboamu Sulemani mvi opi Yudani ma tia, azini ’ba dria ovupi suru Yudani pi Benyaminini be ’diyi, azini ’ba acepi ’diyi ma tia dria kini, 24#O’be 16:9Yehova ’yo ’dini, Emi ma tu a’di ’dizu adripi emini anzi Israelini ’diyi be ku. ’Ba dria ma mvi jo yinia, a’disiku e’yo ’dori fu ma vu. ’Dini yi eri e’yo Yehovani, yi mvi yi mu geri yinia ekile Yehovani ’yolerile.

Yeroboamuni Israeli ma dri cezu e’yo onzi ma aliari

25 # E’do 12:6; Lip 9:45; E’do 32:30, 31; Lip 8:17 Ewu nderisi Yeroboamu si Sekemu angu oniru Efiraimuniria, eri adri ’dale; eri fu ’dale eri si Penueli. 26#Zab 14:1; Rum 8:7Te Yeroboamu ’yo i asia, Te opi nyazani nga emvi be suru Daudiniri vu; 27#Azi 12:5; 16:2, 6’ba ’diyi ka nga tu edeta edezu jo Yehovani Yerusalemuari ma alia, ka’dini ’ba ’diyi yi nga asi yini oja dika opi yini vu, adaru Rehoboamu opi Yudaniri vu, te yi nga ma fu, nga mvi Rehoboamu opi Yudaniri vu. 28#2 Opi 10:29; 17:16; Hos 8:4-7; Efu 32:4’Dini opi ama e’yo, eri ede koanzi iri melesi. Eri ’yo ’ba nde ’diyi ma tia, Tuzu Yerusalemuari eri emi dri ewaru. Israeli la! Emi ne adrou emini, emi ofupi angu Misiriniasi ’diyi. 29#E’do 28:19; Hos 4:15; Lip 18:29Eri ’ba wura kojani alu Betelia, aziniri eri ’ba Dania. 30#1 Opi 13:34; 2 Opi 17:21E’yo nderi eca ezataru, a’disiku ’ba nde ’diyi mu inzizu kojaa alu ma drilia, cazu kpere Dania. 31#1 Opi 13:32, 33; Kal 3:10; 2 Opi 17:32; 2 Sur 11:14; Eze 44:7Eri si jo pari uruleru ’diyia, eri ope vini kuhani ’ba toko anzi Leviniru ku ’diyi ma eselia dria. 32#Lev 23:33; Kal 29:12; 1 Opi 8:2, 5; Amo 7:13Te Yeroboamu ede omu amboru mba aro ma o’du mudri drini towisi, ekile omu Yudaarile, eri tu pari edeta edezuria; eri ’ye ’dini Betelia, edeta edezu koanzi erini edele ’diyi dri. Azini eri ’ba Betelia kuhani erini opele pari uruleru ’diyi ma agei tezu ’diyi ra. 33#Kal 15:39; 1 Opi 13:1Eri tu pari edeta edezu Beteliaria mba aro ma o’du mudri drini towisi; mba erini pele i ma asia i drisi ceniri; eri azi omu anzi Israelini ’diyi dri, eri tu pari edeta edezuria obiese vele veri vezu.

Currently Selected:

1 Opi 12: LB66

Highlight

Copy

Compare