रोमियों 6
6
पाप तांइ मुर्दे: मसीह यीशु तांइ जिन्दे
1तां फिरी, कै असा जो पाप करदे रैह्णा चाएदा ताकि परमेश्वर जादा का जादा अपणा अनौखा अनुग्रह करदे रैह्ण? 2नी! बिल्कुल भी नी, असी जे पाप तांइ मरी गेरे हिन तां फिरी अग्गे जो पाप बिच जिन्दगी नी बिताई सकदे। 3असी जाणदे कि जां असा ने मसीह यीशु रा बपतिस्मा लित्ता, तां असी तिय्यां ही मरी गे जिय्यां मसीह यीशु मरे थिये।
4जां असा ने बपतिस्मा लित्तेया, तां ए इदेया थिया कि जिय्यां असी मसीह यीशु कने मरी गे, ते तिन्हा कने दब्बी दित्ते गे, ते जिय्यां पिता परमेश्वर री अनौखी महिमा ने मसीह यीशु जो जिन्दा कित्ता, तिय्यां ही असी भी तिन्हेरे सांई नौई जिन्दगी जीण। 5किजोकी जे अगर असी बपतिस्मा लेई करी तिन्हेरे सांई मरी गे, तां जिय्यां से फिरी जिन्दे कित्ते गे तिय्यां ही असी भी फिरी जिन्दे कित्ते जाणे। 6किजोकी असी ए जाणदे कि असा रा पापी स्वभाव मसीह यीशु कने ही सुली पर चढ़ाई दित्तेया गेया थिया, ताकि असा रे सरीर बिच जे पापी स्वभाव है, से मुकी जाओ, ते असी अग्गे जो पाप रा गुलाम ना बणी रैह्ण। 7जां असी मसीह यीशु कने मरी गे, तां असी पाप रे काबू का अजाद करी दित्ते गे थिये। 8इधेरे तांइ जे अगर असी मसीह यीशु सांई मरी गे, तां असा रा विश्वास है कि असी तिसेरे कने जीणा भी। 9किजोकी असी जाणदे मसीह यीशु मरे रे लोक्कां बिच का जिन्दा होए, ते तिन्हा ने फिरी कदी नी मरणा। मौत रा तिन्हा पर कोई काबू नी है।
10किजोकी मसीह जे मरी गेया तां असा रे पाप्पां तांइ इक्क ही वरी मरेया, पर अवे जे जिंदा हिन, तां परमेश्वर री महिमा तांइ जिंदा हिन। 11इय्यां ही तुसा जो अप्पु जो पाप रे काबू तांइ ता मरे रा ते मसीह यीशु रे जरिये परमेश्वर री महिमा तांइ जिन्दा समझणा चाएदा। 12इधेरे तांइ तुसा पाप करणे री इच्छां जो अपणी जिन्दगी पर काबू मत करणा देयो, ताकि तुसा पाप री मर्जी रे हिसाब कने जिन्दगी ना जियो। 13अते अपणे जिस्म रे कुसकी भी अंग जो बुरे कम्मां री सेवा करणे तांइ हवाले मत करो, बल्कि, अप्पु जो पूरे तरिक्के कने परमेश्वर रे हवाले करी देयो। किजोकी तुसा मरी गे थिये, पर अवे तुसा का नौई जिन्दगी है। इधेरे तांइ अपणे पूरे जिस्म जो इक्क औजार रे तौर पर परमेश्वर री महिमा तांइ इस्तेमाल करो। 14तुसा पर पाप रा कोई काबू नी है, किजोकी तुसा मूसा रे कानून रे हेठ नी पर परमेश्वर रे अनुग्रह बिच जिन्दे।
धार्मिकता रे दास
15किजोकी असी जाणदे कि असी मूसा रे कानून रे हेठ नी पर परमेश्वर रे अनुग्रह बिच जिन्दे, इधेरे तांइ असा जो पाप बिच जिन्दगी नी जीणी चाएदी। 16तुसा जाणदे कि जां तुसा अप्पु जो कुसकी रा गुलाम बणने तांइ सौंप्पि दिंदे, तां से मणू तुसा रा मालिक बणी जांदा। जे अगर तुसा चाओ ता पाप रे गुलाम बणी सकदे जे मौत दिंदा, या तुसा अप्पु जो परमेश्वर रे हुकम मनणे तांइ सौंप्पि सकदे जे तुसा जो धार्मिक ठैहरांदे।
17पर परमेश्वर रा शुकर हो, कि तुसा जे पाप रे गुलाम थिये, अवे मन कने तिन्हा शिक्षां जो मनणे वाले बणी गेरे हिन, जे मैं तुसा जो मसीह रे बारे बिच सिखाई थी। 18परमेश्वर ने तुसा जो पाप रे काबू का अजाद कित्तेया, ते अवे तुसा धार्मिक कम्म करणे तांइ परमेश्वर रे गुलाम बणी गेरे हिन।
19तुसा री आत्मिक गल्लां जो समजणे री कमी री वजह कने मैं आमतौर री जिन्दगी बिच का ए उदारण देया करदा है, कि जिय्यां तुसा अपणे जिस्म रे हिस्सेयां जो गलत ते अधार्मिक कम्म करणे तांइ गुलाम्मां सांई सौंप्पि दित्तेया थिया, तिय्यां ही अवे अप्पु जो धार्मिकता रे कम्म करणे तांइ सौंप्पि देयो, ताकि तुसा पवित्र जिन्दगी जी सको। 20किजोकी जां तुसा पाप रे गुलाम थिये तां तुसा धार्मिकता रा कोई कम्म नी करी पांदे थिये। 21तुसा पैल्ले बुरे कम्म कित्ते पर अवे तिन्हा पर शर्मिंदा हिन। तुसा जे से कम्म करी के कोई फायदे नी होया किजोकी तिन्हा कम्मां रा अंजाम सिर्फ मौत है। 22पर अवे तुसा पाप रे काबू का अजाद होई गेरे हिन ते परमेश्वर रे गुलाम बणी गेरे हिन। तुसा अवे पवित्र कम्म करदे जिस कने तुसा जो हमेसा री जिन्दगी मिलदी। 23किजोकी पाप री मजदूरी ता मौत है, पर परमेश्वर री दान कने असा जो प्रभु यीशु मसीह रे जरिये हमेसा री जिन्दगी मिलदी।
Currently Selected:
रोमियों 6: CDHNT
Highlight
Share
Compare
Copy
Want to have your highlights saved across all your devices? Sign up or sign in
Chambeali Bible (चम्बयाळी बाइबिल) 2020 by The Love Fellowship is licensed under a Creative Commons Attribution-ShareAlike 4.0 International License.
