रोमियों 1
1
पौलुस ते उसेरे जरिये दित्तेया गेया सुब-बसेख
1मैं पौलुस, मसीह यीशु रा दास है, ते परमेश्वर ने मेरे जो प्रेरित बणने तांइ चुणे रा है। ते तिन्हा ने तिस सुब बसेख रा प्रचार करणे तांइ अलग कित्ते रा है, 2जिसेरा वादा तिन्हा ने मसीह यीशु रे आणे का बड़े पैल्ले ही पवित्रशास्त्र बिच अपणे भविष्यद्वक्तां रे जरिये कित्ता थिया। 3ए सुब बसेख असा रे प्रभु, मसीह यीशु रे बारे बिच है। से शारीरिक तौर पर राजा दाऊद रे खानदान बिच पैदा होए थिये।
4ते जां से पवित्रात्मा री ताकत कने मरे रे लोक्कां बिच का फिरी जिन्दे कित्ते गे, तां से परमेश्वर रे पुत्तर ठैहरे। 5ते मसीह रे जरिये, परमेश्वर ने असा जो प्रेरित बणने रा अनुग्रह ते हक दित्तेया, ताकि असी जगाह्-जगह गैर यहूदी लोक्कां जो से गल्लां दस्सी सकण, जे परमेश्वर ने तिन्हा लोक्कां तांइ कित्ते री हिन, ताकि से मणू मसीह पर विश्वास करण, ते तिन्हेरी शिक्षा जो मन्ने। 6तुसा रोम सहर बिच रैह्णे वाले विश्वासी तिन्हा लोक्कां बिच गिणे जांदे जिन्हा जो परमेश्वर ने मसीह यीशु रा होणे तांइ चुणे रा है। 7मैं ए चीठ्ठी रोम सहर बिच रैह्णे वाले तुसा सारे विश्वासियां जो लिख्खेया करदा है, जिन्हा जो परमेश्वर प्यार करदे ते जिन्हा जो तिन्हा ने अपणे मणू बणने तांइ चुणे रा है।
परमेश्वर पिता ते मसीह यीशु तुसा जो अनुग्रह ते सांती दैण।
धन्यवाद री प्रार्थना
8पैल्ले मैं तुसा सारे वास्ते मसीह यीशु रे जरिए अपणे परमेश्वर रा शुक्रिया करदा, किजोकी जगाह्-जगह मसीह बिच तुसा रे विश्वास री गल्लां होया करदी हिन। 9परमेश्वर, जिन्हेरी सेवा मैं अपणे पूरे दिल कने, तिन्हेरे पुत्तर रे सुब बसेख जो सूणाई करी करदा, से ही परमेश्वर मेरा गवाह हिन, कि मैं तुसा जो हमेसा याद करदा रैह्न्दा, 10ते लगातार अपणी प्रार्थना बिच बिनती करदा कि जे अगर परमेश्वर चाह्ण, तां मैं जरुर तुसा कने मिलणे जो आं। 11किजोकी मैं तुसा का मिलणे री इच्छा करदा ताकि मैं तुसा जो आत्मिक आशीषां देयां, जिस कने तुसा विश्वास बिच होर मजबूत होई जाओ, 12मेरे बोलणे रा मतलब ए है कि जां असी मिलणा, तां तुसा जो तुसा रे विश्वास बिच उत्साहित करणा चाह्ंदा, पर मैं ए भी चाह्ंदा कि तुसा रे विश्वास रे जरिये मैं भी उत्साहित होई जां। 13ओ संगी विश्वासियों, मैं चाह्ंदा कि तुसा इस गल्ल जो जाणो, कि मैं मती वरी तुसा का आणा चाएया, कि जिय्यां मैं गैर यहूदी लोक्कां जो आत्मिक रीति कने बद्दणे बिच मदद कित्ती, तिय्यां ही तुसा जो आत्मिक रीति कने बद्दणे बिच मदद करां, पर हल्ले तांइ मैं रुके रेया। 14किजोकी मैं मसीह रा सुब बसेख सुनाणे तांइ सभ्य लोक्कां#1:14 यूनानी मणू तिस जमाने बिच सभ्य मन्ने जांदे थिये। रा ते असभ्य लोक्कां रा कर्जदार है, मैं पढे-लिख्खे लोक्कां रा ते अनपढ़ां रा भी कर्जदार है। 15अते मैं तुसा का रोम सहर बिच आई करी मसीह रा सुब बसेख सुनाणे तांइ उत्सुक है।
मसीह यीशु री खशुखबरी री ताकत
16किजोकी मैं मसीह रा सुब बसेख सुनाणे बिच गर्व करदा। ए सुब बसेख परमेश्वर री से ताकत है जिनिए पैल्ले यहूदी लोक्कां जो छुटकारा दित्तेया, ते अवे गैर यहूदियां जो भी छुटकारा देया करदे हिन। 17किजोकी सुब बसेख रे जरिये परमेश्वर तिस हर इक्क मणू जो धार्मिक बणांदे, जे पूरे तरिक्के कने सुब बसेख पर विश्वास करदे। जिय्यां कि भविष्यद्वक्ता ने पवित्रशास्त्र बिच भी लिख्खे रा है,
“परमेश्वर जिस मणू जो धार्मिक बणांदे, से ही विश्वास रे जरिये जिन्दा।”
सारे लोकां दोसी ठैहरणा
मणूआं रे पाप
18परमेश्वर स्वर्ग का अपणा गुस्सा तिन्हा लोक्कां पर दिखांदे, जे अपणी सारी दुष्टता ते अधार्मिक रे कम्मां कने परमेश्वर री सच्चाई जो नक्कारी दिंदे। 19पर ए गल्ल सारी दुनिया रे मणू जाणदे कि परमेश्वर कदेय हिन, किजोकी परमेश्वर ने अप्पु ही सारे लोक्कां पर इस गल्ल जो ज़ाहिर कित्ते रा है। 20परमेश्वर री ताकत ते स्वभाव दिख्खे नी जाई सकदे, पर दुनिया रे रचणे री सुरुआत का ही, परमेश्वर ने अप्पु ही इन्हा सारे गुण जो अपणे कम्मां रे जरिये ही दिखाए रा है, इधेरे तांइ इन्हा लोक्कां का अपणे तांइ कोई बहान्ना नी है कि से परमेश्वर जो नी जाणदे। 21इधेरे तांइ कि तिन्हा ने परमेश्वर जो जाणदे होए भी ना ही तिन्हेरी महिमा कित्ती, ते ना ही तिन्हेरा शुक्रिया कित्ता, पर से मणू इदेइ बेवकूफी री गल्लां सोचणा लग्गी पे कि परमेश्वर कदेय दिसदे होणे। इसेरा अंजाम ए होया कि तिन्हेरी समझ पर पर्दा पेई गेया। 22से अपणे आप जो समजदार दस्सी करी बेवकूफ बणी गे, 23ते हमेसा-हमेसा तिकर रैह्णे वाले परमेश्वर री महिमा जो, इक्क मुकी जाणे वाले मणूआं, चिड़ी-पखेरुआं, डगंरा ते साप्प-किड़ेयां री मूर्तां री बराबरी बिच बदली करी तिन्हेरी अराधना कित्ती। 24इस तरिक्के कने परमेश्वर ने तिन्हा जो तिन्हेरे मन री गलत इच्छा रे मुताबक अपणे सरीर कने गलत कम्म करणे ते व्यभिचार रे कम्म करणे तांइ छड्डी दित्तेया, कि से मणू तिन्हा कम्मां जो करणे कने आपस बिच अपणे शरीरां रा अनादर करण। 25तिन्हा ने परमेश्वर रे बारे बिच सच्चाई जो नक्कारी दित्तेया, ते से झूठ्ठी गल्लां बिच विश्वास करदे, ते तिन्हा ने परमेश्वर री बणाए री चीजां री अराधना ते सेवा कित्ती, ना की तिन्हा चीजां जो बणाणे वाले परमेश्वर री, जिन्हेरी बड़ाई हमेसा हो! आमीन।
26इस तांइ परमेश्वर ने तिन्हा जो अपणे गंदे कम्म करणे री इच्छा पर छड्डी दित्तेया, इत्ते तिकर की जनानियां ने आदमियां कने अपणे कुदरती रिश्ते जो छड्डी करी दूज्जी जनानियां कने शारीरिक सम्बध बणाया। 27तिय्यां ही आदमियां ने भी जनानियां कने अपणे कुदरती रिश्ते जो छड्डी करी, दूए आदमियां कने शारीरिक सम्बध बणाणे री इच्छा रखदे। तिन्हा ने अप्पु-मिते बेशर्मी रे कम्म कित्ते, ते तिन्हा जो तिन्हेरे बेवकूफी रे कम्मां री सजा मिल्ली। 28जां तिन्हा ने सोच्चेया कि परमेश्वर जो जाणना तिन्हा तांइ बेवकूफी री गल्ल है, तां परमेश्वर ने भी तिन्हा जो गलत कम्म करणे तांइ तिन्हेरे निकम्मे मन पर छड्डी दित्तेया। 29इस तांइ से हर तरह रे अधर्म, ते दुष्टता, ते लालच, ते नफरत कने भरी गे। ते जलन, ते खून, ते झगड़े, ते धोखा, ते हिर्स कने भरी गे, ते चुगलखोर, 30बदनाम करणे वाले, परमेश्वर कने नफरत करणे वाले, दूज्जेयां री बेजती करणे वाले, दुष्ट, घमंडी, डिगां मारणे वाले, बुरी-बुरी गल्लां बणाणे वाले, मां-प्यो री गल्लां नी मनणे वाले बणी गे। 31ते से नासमझ, धोखेबाज, प्यार ना करणे वाले ते तरस नी खाणे वाले बणी गे। 32से ता परमेश्वर रे इन्हा धार्मिकता रे नियमां जो जाणदे कि इदेय-इदेय कम्म करणे वाले मौत री सजा रे जोग्गे हिन, ते फिरी भी ना सिर्फ इदेय कम्म करदे, पर इदेय कम्म करणे वालेयां का खुस भी हुदें। से ता जाणदे कि परमेश्वर इंसाफ करणा चाह्ंदे, ते इदेय कम्म करणे वाले मणू तिन्हेरी नजर बिच मौत री सजा रे जोग्गे हिन।
Currently Selected:
रोमियों 1: CDHNT
Highlight
Share
Compare
Copy
Want to have your highlights saved across all your devices? Sign up or sign in
Chambeali Bible (चम्बयाळी बाइबिल) 2020 by The Love Fellowship is licensed under a Creative Commons Attribution-ShareAlike 4.0 International License.
