फिलिप्पियों 1

नमस्ते ते प्रार्थना

1मसीह यीशु रे दास पौलुस ते तीमुथियुस रे पास्से का, सबणी पवित्र मणूआं जो, जे मसीह यीशु अन्दर होई करी फिलिप्पी सहर अन्दर रैह्णे वाले कलीसिया रे सारे मुखिया ते सेवक जो ए चीठ्ठी लिख्खेया करदे हिन। 2असा रे पिता परमेश्वर ते प्रभु यीशु मसीह रे पास्से का तुसा जो अनुग्रह ते सांती मिलदी रेयो।

पौलुस री प्रार्थना ते धन्यवाद

3मैं जिस बेल्ले भी तुसा जो याद करदा, तां-तां अपणे परमेश्वर रा शुक्रिया करदा। 4ते जां भी कदी तुसा सबणी जणेया तांइ प्रार्थना करदा, तां हमेसा खुसी कने प्रार्थना करदा। 5किजोकी तुसा रे मसीह यीशु बिच विश्वास करणे रे पैल्ले दिन का लेई करी अज्ज तांइ तुसा मसीह यीशु रा सुब बसेख जो फलाणे अन्दर मेरे कने बराबर रे। 6मेरे जो इस गल्ल रा भरोस्सा है कि जिस परमेश्वर ने तुसा अन्दर भला कम्म सुरु कित्ते रा है ते तिस्सी परमेश्वर ने ही तिस कम्म जो मसीह यीशु रे हटणे रे समय तिकर पूरा करणा। 7खरा होणा कि मैं तुसा सबणी तांइ इदेय सोच रख्खां, किजोकी मैं तुसा कने बड़ा वरी प्यार रखदा, किजोकी तुसा मेरे कने ए सौभाग्य परमेश्वर रे अनुग्रह कने हासिल कित्ते रा है, अब्बे भी जां मैं कैद बिच है ते मसीह रे सुब बसेख पर उठणे वाले सवाल्लां रा जवाब दैणे ते तिसजो साबित करणे बिच भी। 8इस अन्दर परमेश्वर मेरे गवाह हिन कि मैं मसीह यीशु सांई दाह करी के तुसा सबणी जणेया कने मिलणे री चाह करदा रेयां। 9मैं ए प्रार्थना करदा कि इक्क दूए तांइ तुसा रा प्यार बदधा जाए, ते जिन्दगी बिच सही चीजां जो चुनणे तांइ तुसा री ज्ञान ते सही ते गलत री समझ लगातार बदधी रेयो। 10ताकि तुसा जिन्दगी बिच अप्पु तांइ सही चीजां जो चुणी सको ताकि तुसा मसीह यीशु रे हटणे रे दिन तांइ निर्मैल ते बेकसूर रेयो। 11तुसा री जिन्दगी मसीह यीशु रे जरिए परमेश्वर री धार्मिकता रे कम्मां कने भरदी जाए जिस कने परमेश्वर री बड़ाई ते तारीफ हुंदी रे।

पौलुस री जिन्दगी रा मतलब

पौलुस री कैद का खुशखबरी री तरक्की

12ओ संगी विश्वासियों, मैं चाह्‍ंदा कि तुसा जो ए पता लग्गी जाओ कि मेरे कने बीत्ती, तिस कने सुब बसेख लोक्कां बिच होर जादा फैल्लेया। 13इत्ते तक कि सम्राट रे राजभवन री सारी सैना रे दल ते बाकि सबणी मणूआं अन्दर पता लग्गी गेया कि मैं मसीह यीशु री सेवा करणे री वजह कने कैद है। 14ते मेरे कैद होणे री वजह कने बाकि रे विश्वासियां की हिम्मत बधी गे री है। से निडर होई करी हिम्मत कने परमेश्वर रा बसेख सुणाया करदे हिन। 15ए सच है कि किच्‍छ मणू जलन ते दुश्मणी री वजह कने मसीह रा बसेख सुणांदे। पर किच्‍छ मणू सही ईरादे कने मसीह रा बसेख सुणांदे। 16से मणू इधेरे तांइ मसीह रा सुब बसेख सुणांदे किजोकी से मेरे जो प्यार करदे ते से जाणदे कि मैं मसीह रे बसेख पर उठणे वाले सवाल्लां रा जवाब दैणे तांइ चुणेया गे रा है। 17पर जे मणू जलन रखदे, से अपणे फायदे तांइ मसीह रा बसेख सुणांदे, ताकि मेरे जो मेरी कैद बिच होर जादा तकलीफ देई सकण। 18पर इस कने कोई फरक नी पैन्दा भले ही तिन्हेरे ईरादे ठीक होण या बुरे, मसीह रा सुब बसेख कुसकी ना कुसकी तरिक्के कने सुणाया जांदा, ते मैं इस बिच ही खुस है, ते मैं इस गल्ल बिच इय्यां ही खुस रैह्णा।

जिंदा रैह्णा मसीह हिन

19किजोकी मैं जाणदा कि तुसा जे मेरे तांइ प्रार्थना करेया करदे हिन, तिसेरे जरिए, ते मसीह यीशु री पवित्रात्मा री मदद कने मेरे जो छुटकारा मिलणा। 20मेरी तां ए ही दिल का लालसा ते आस है कि मैं कुसकी गल्ल अन्दर शर्मिंदा ना होआं, पर जिय्यां मेरे हिम्मत कने मसीह रा बसेख सुनाणे री वजह कने मसीह यीशु री बड़ाई मेरे जरिए हमेसा हुंदी आए री है, तिय्यां ही अब्बे भी हो, चाए मैं जियां या मरी जां। 21किजोकी जे अगर मैं जियां तां से मसीह यीशु री बड़ाई करणे तांइ होणा, ते जे अगर मैं मरी भी जां तां से भी फायदेमंद है किजोकी तां मैं मसीह कने रैह्णा। 22पर जे अगर मैं जिन्दा रेयां तां मैं मसीह यीशु तांइ होर भी कम्म करी सकदा, इधेरे तांइ नी जाणदा जीणा खरा है या मरणा? 23किजोकी मैं इन्हा दोन्नां इच्छा बिच उलझी गे रा है: मैं तां चाह्‍ंदा कि मैं इस जिन्दगी जो छड्डी करी मसीह यीशु कने रैह्णे तांइ चली जां, 24पर तुसा री मदद करणे रे खातिर मेरा जीणा जरुरी है। 25ते इधेरे तांइ मेरे जो भरोस्सा है ते मैं जाणदा भी कि मैं जीणा, बल्कि मैं तुसा सारेयां कने भी रैह्णा ताकि मैं तुसा जो विश्वास बिच मजबूत होणे ते तिस बिच खुस रैह्णे बिच मदद करी सकां। 26ते जां मैं तुसा का आणा तां तुसा का मसीह यीशु बिच तिस कम्म तांइ घमंड करणे रा होर भी वजह होणी जे से मेरे जरिए करेया करदे हिन। 27सिर्फ इन्ना ही करो कि मसीह रे सुब बसेख रे हिसाब कने जिन्दगी जियो। ते भले ही मैं तुसा जो आई करी मिलां या ना भी मिलां, वस तुसा रे बारे बिच ए ही सूणेया कि तुसा इक्क-मन होई इक्क ही मकसद तांइ इकठ्ठे होई करी तिस विश्वास तांइ कड़ा संघर्ष करदे रैहन्दे जे मसीह यीशु रा सुब बसेख है। 28कुसकी भी तरिक्के कने अपणे दुश्मणा का मत डरो, तुसा री हिम्मत तिन्हेरे विनास री निशानी है, पर ए तुसा तांइ छुटकारे री निशानी है ते ए परमेश्वर रे पास्से का है। 29किजोकी मसीह यीशु री वजह कने तुसा पर ए दया होई कि नां सिर्फ तुसा तिन्हा पर विश्वास करो पर तिन्हा तांइ दुख भी सही सको। 30ते तुसा जो तैसा ही संघर्ष करणा पैणा, जदेई तुसा ने मेरे जो तां भी करदे दिख्खे रा है जां मैं तुसा कने फिलिप्पी सहर बिच थिया, ते अब्बे भी सूणदे कि मैं तिय्यां ही इत्ते कैद बिच संघर्ष करेया करदा।

Currently Selected:

फिलिप्पियों 1: CDHNT

Highlight

Compare

Copy