गलातियों 1

इक्क सच्चा प्रेरित ते सच्चा बसेख

पौलुस री तरफ का नमस्ते

1-2मैं पौलुस, जे इक्क प्रेरित है, गलातिया प्रदेश री कलीसिया जो ए चीठ्ठी लिख्खेया करदा है। ते जिन्ने भी विश्वासी मेरे कन्ने हिन, तिन्हेरे पास्से का तुसा जो नमस्कार। मेरे जो प्रेरित होणे तांइ सद्देया गेया है। पर मेरे जो किच्‍छ लोक्कां री मडंली ने प्रेरित नी बणाया, या कुसकी मणू ने मेरे जो प्रेरित बणने तांइ नी भेज्जेया। ए मसीह यीशु ते पिता परमेश्वर री वजह कने ही होया, जिन्हा ने मसीह यीशु जो मुर्देयां बिच का फिरी जिन्दा कित्तेया थिया। 3असा रे पिता परमेश्वर, अते प्रभु यीशु मसीह रे पास्से #1:3 पास्से का तुसा जो अनुग्रह अते सांती मिलदी रे। 4असा रे परमेश्वर ते पिता री मर्जी रे हिसाब कने मसीह यीशु ने असा रे पाप्पां तांइ अप्पु जो कुर्बान होणे तांइ देई दित्तेया, ताकि असा जो अज्ज रे इस बुरे दुनिया रे असर का बची रैह्ण। 5तिन्हेरी महिमा हमेसा-हमेसा तांइ हून्दी रे। आमीन। सिर्फ इक्क ही सुब बसेख है।

कोई दूज्जी खुशखबरी नी है

6परमेश्वर पिता ने तुसा जो मसीह यीशु रे अनुग्रह रे जरिये चुणी लित्ते रा है। पर मेरे जो हैरानी हुंदी कि तुसा मणू इतणी तौले कुसकी बखरे सुब बसेख जो मनणा सुरु करी के परमेश्वर का दुर होई गेरे हिन। 7सिर्फ इक्क ही सुब बसेख है, पर किच्‍छ इदेय मणू हिन जे तुसा जो गलत बसेख देई करी भटकाया करदे हिन, ते मसीह यीशु रे सुब बसेख बिच हेर-फेर करणे री कोसीस करेया करदे हिन। 8पर चाये असा हो या कोई स्वर्गदूत, जे कोई असा रे सुणाये रे सुब बसेख का बखरे तरिक्के रा बसेख सूणान्दा, तां परमेश्वर ने तिसजो सजा दैणी। 9जिय्यां असी पैल्ले बोल्ली बैठ्ठे रे हिन, तिय्यां अब्बे भी बोलदा, कि चाये असा हो या कोई स्वर्गदूत, जे कोई असा रे सुणाये रे सुब बसेख का बखरे तरिक्के रा बसेख सूणान्दा, तां परमेश्वर ने तिसजो सजा दैणी। 10मैं लोक्कां री नी पर परमेश्वर री सहमती जितणे री कोसीस करेया करदा है। मैं लोक्कां जो खुस करणे री कोसीस नी करेया करदा है, किजोकी जे अगर मणूआं जो खुस करणा मेरा मकसद हुंदा, तां मैं मसीह रा दास नी हुंदा।

परमेश्वर पौलुस जो इक्क प्रेरित रे रुप बिच चुणेया

11ओ संगी विश्वासियों, मैं तुसा जो जताणा चाह्‍ंदा कि से सुब बसेख जिसेरा उपदेस मैं तुसा जो दित्ती है, से मणूआं री मनघड़ंत गल्ल नी है। 12किजोकी मेरे जो से असा रे मणू का नी मिल्लेया, ते कुसकी धर्म गुरु ने मेरे जो इसेरी शिक्षा नी दित्ते री है, पर मेरे जो से यीशु मसीह रे जरिये मिल्लेया, जां से मेरे पर प्रकट होए थिये। 13तुसा जाणदे कि मैं यहूदी नियमां जो किन्ना जादा मनदा थिया, कि मैं मसीह री शिक्षा पर चलणे वालेयां पर बड़ा वरी जुल्म करदा थिया, ते परमेश्वर री कलीसिया जो नास करणे री कोसीस करदा रैहन्दा थिया। 14मैं अपणी उमर रे बाकि मणूआं का बदिया यहूदी मणू थिया, ते मैं अपणे पूरखां री परम्परा जो सिखणे ते मनणे बिच हमेसा बड़े जोस बिच हुंदा थिया। 15-17पर तां परमेश्वर अपणे पुत्तर जो मेरे पर प्रकट करणे जो खुस होए, ताकि मैं यीशु रे बारे बिच सुब बसेख रा प्रचार करां। परमेश्वर ने ही मेरे जो मेरे पैदा होणे का पैल्ले ही चुणेया, ते अपणे अनुग्रह कने मेरे जो अपणी सेवा करणे तांइ सद्दी लित्तेया। यीशु रे अप्पु जो मेरे पर ज़ाहिर करणे का बाद, ना ता मैं कुसकी का सलाह मंगणे तांइ गेया, ते ना ही मैं यरुशलेम बिच मेरे का पैल्ले वाले प्रेरितां का गेया। पर मैं अरब देस जो गेया, ते बाद बिच तित्ते का दमिश्क सहर जो हटी आया। 18फिरी त्रै सालां बाद मैं कैफा जो, जिस जो पतरस भी बोलदे, मिलणे तांइ यरुशलेम जो गेया, अते पन्द्रां रोज्जां तांइ तिन्हा का रेया। 19पर मैं इक्क ही प्रेरित कने मिली सकेया, जे प्रभु यीशु रे भ्याल याकूब हिन। 20परमेश्वर मेरा गवाह है कि जे किच्‍छ मैं तुसा जो लिखदा, तिस बिच किच्‍छ भी झूठ नी है। 21यरुशलेम सहर का निकलणे रे बाद मैं सीरिया अते किलिकिया रे प्रदेशां बिच गेया। 22पर यहूदियां प्रदेश बिच मसीह यीशु जो मनणे वाली कलीसिया रे लोक्कां ने मेरे जो कदी दिख्खे रा नी थिया, 23पर से मणू ए सूणदे रैह्‍न्दे थिये कि जे पैल्ले असा पर जुल्म करदा थिया, से अवे यीशु मसीह रे सुब बसेख रा प्रचार करेया करदा है। 24अते परमेश्वर ने जे कम्म मेरे तांइ कित्ते रा है तिस वजह कने से परमेश्वर री महिमा करणा लगे।

Currently Selected:

गलातियों 1: CDHNT

Highlight

Compare

Copy