इफिसियों 4

मसीह कने एकता बिच इक्क नौई जिन्दगी

मसीह यीशु कने सरीर बिच इक्क बणना

1इधेरे तांइ मैं जे प्रभु री सेवा करणे री वजह कने कैद बिच है, तुसा रे छन्दे करदा कि जिस बुलाह्ट कने तुसा सद्दे गे थिये, तिस जोग्गी चालचलन बणाई रख्खो, 2मतलब कि सारी दीनता ते निम्तेपन कने, ते सबर रख्खी करी प्यार कने इक्क-दूज्जे री सहन करी लेयो। 3ते पवित्रात्मा रे पास्से का मिल्ले री सांती जो बणाई रखणे तांइ अप्पु-मिते मिली-जुली करी रेयो। 4असी इक्क ही सरीर रे हिस्से हिन, ते असा जो इक्क ही पवित्रात्मा भी मिल्ले रा है, से आस भी इक्क ही है जिस बिच तुसा जो परमेश्वर रे मणू बणने तांइ चुणेया गेया थिया। 5असा सारेयां रे इक्क ही प्रभु हिन, असी सारे मसीह यीशु बिच ही विश्वास करदे, असा सारेयां ने इक्क ही बपतिस्मा लित्ते रा है, 6असी सारे इक्क ही परमेश्वर री अराधना करदे जे असा सारेयां रे पिता हिन, जे सारेयां रे उप्पर राज करदे ते सबणा री जरिये कम्म करदे ते असा सबणा बिच रैहन्दे। 7पर मसीह यीशु ने असा सारेयां जो अपणे अनुग्रह रे हिसाब कने बखरे-बखरे दान दित्ते रे हिन। 8पवित्रशास्त्र बिच मसीह रे बारे बिच ए लिख्खे रा है,

“से ऊच्ची जगाह् पर चढ़ेया ते अपणे तिन्हा दुश्मणा जो लेई गेया जिन्हा जो तिसने जीत्ती लेया थिया,

ते तिन्हा ने मणूआं जो दान दित्ते।”

9जां पवित्रशास्त्र ए दसदा,

“से ऊच्ची जगाह् पर चढ़ेया”

तां इसेरा मतलब ए होया कि से धरती रे सबका थल्ले वाली जगाह् यानी पताल बिच भी उतरेया थिया। #4:9 इसेरा मतलब है कि से सुली पर कुर्बानी दैणे का बाद पताल बिच गे थिये, ते ए तिन्हेरे त्रिये दिन जिन्दे होणे का पैल्ले होया थिया। 10मसीह जे थल्ले उतरी गेया से ए ही है जे आसमान री सबका ऊच्ची जगाह् पर चुक्की लित्तेया गेया थिया ताकि से हर जगाह् मौजूद रेयो। 11मसीह यीशु ने ही ए बखरे-बखरे दान दित्ते, तिन्हा ने किच्‍छ जणेया जो प्रेरित ठैहराया, ते किच्‍छ जणेया जो भविष्यद्वक्ता ठैहराया, ते थोड़े जणेया जो सुब बसेख सुनाणे वाले ठैहराया, ते किच्‍छ जणेया जो पादरी ते उपदेस दैणे वाले ठैहराया रा है। 12तिन्हा ने ए दान इधेरे तांइ दित्ते ताकि से परमेश्वर रे लोक्कां जो तिन्हेरे तांइ कम्म करणे तांइ तैयार करी सकण, ते से मसीह रे सरीर रे रुप बिच पूरी तरह कने पकी जाण ते ताकतवर बणी सकण। 13असा सारेयां रा मकसद ए है कि असी विश्वास करणे रे जरिये इक्क बणी जाण ते परमेश्वर रे पुत्तर कने रिस्ता होणे री वजह कने असी पके रे विश्वासी बणी जाण, ते पूरे तरिक्के मसीह यीशु सांई बणी जाण, जे बिल्कुल सिद्व हिन। 14ताकि अग्गे जो असी बच्चेयां सांई ना रैह्ण, असी तिन्हा किस्तियां सांई नी रैह्णा जे लहरां ते हवा कने इत्ते-उत्ते डोलदी रेह्न्दी। इसेरा मतलब ए है कि चलाक ते ठग लोक्कां ने फिरी असा जो अपणी झूठ्ठी शिक्षा कने बेवकूफ नी बणाई सकणा। 15प्यार कने सच बोलणे रे जरिये असा जो हर इक्क गल्ल बिच मसीह यीशु सांई बणने तांइ पकदे जाणा चाएदा, जे असा रे प्रधान हिन। 16असी सारे जणे जे मसीह यीशु बिच विश्वास करदे, तिन्हेरे सरीर रे हिस्से सांई हिन। जिय्यां कुसकी मणू रा सरीर जोड़ां री वजह इक्क गठ्ठ होई करी रैह्न्दा, ते जां सरीर रा हर इक्क हिस्सा सही तरिक्के कने कम्म करदा, तां सरीर बदधा ते मजबूत बणदा जांदा, तिय्यां ही जां असा बिच का हर इक्क जणा सही तरिक्के कने से कम्म करदा जे मसीह ने असा जो दित्ते रा है, तां असा ने भी ताकतवर, परिपक्व होणा ते इक्क-दूए कने प्यार करणा।

मसीह बिच नौई जिन्दगी

17इधेरे तांइ मैं परमेश्वर का मिल्ले रे अधिकार कने ए बोलदा कि जिय्यां परमेश्वर बिच विश्वास ना करणे वाले मणू बेकार गल्लां बिच जिन्दगी जिन्दे, तुसा अज्ज का बाद तिय्यां मत जिन्दे। 18किजोकी तिन्हेरी समझ पर न्याहरा छाई गे रा है, ते से मणू अपणी अज्ञानता ते ढिटपणे री वजह कने तिस जिन्दगी का दुर हिन जे परमेश्वर दिंदे। 19किजोकी से मणू बड़े वरी बेशर्म होई गे हिन इधेरे तांइ से अय्याशियां करणे बिच लग्गी रैह्‍न्दे। से मणू हर तरिक्के रे गंदे कम्म करदे ते से मणू इसका होर भी जादा अय्याशी करणा चाह्‍ंदे। 20पर जां तुसा जो मसीह यीशु रे बारे बिच सिखाया गेया थिया तां तुसा ने ए सारी गल्लां नी सिख्खी। 21मेरे जो इस गल्ल रा पक्के तौर पर पता है कि जां तुसा ने मसीह यीशु रे बारे बिच सूणेया थिया तां तुसा तिन्हा का सच्ची शिक्षां जो सिख्खेया थिया। 22कि तुसा जो दस्सेया गेया थिया कि तुसा री बेवकूफी भरी मर्जियां ने तुसा जो बर्बाद करी छडणा ते तुसा जो अपणी जिन्दगी जीणे रे पुराणे तरिक्के जो ते अपणी सारी गलत आदतां जो छड्डी दैणा चाएदा। 23ते पवित्रात्मा जो तुसा रे स्वभाव ते तुसा री सोच जो नौआ बणाणे देयो। 24ते जिय्यां परमेश्वर ने तुसा जो नौआ स्वभाव ते जीणे रा नौआ तरिक्का दस्से रा है जे तिन्हेरे अपणे स्वभाव जदेया ही है। इधेरे तांइ तिस्सी स्वभाव ते तरिक्के कने जिन्दगी बिताओ ते हकीकत बिच पवित्र ते धार्मिक बणो। 25इधेरे तांइ झूठ बोलणा छड्डी करी सब जणे अपणे संगी विश्वासी कने सच बोल्लेया करो, जिय्यां कि असी इक्क ही सरीर रे अंग हिन। 26जे अगर तुसा गुस्सा भी होई जांदे ता ध्यान रख्खो कि कोई पाप ना करो, ते ध्यान रख्खो कि रात्ती सोणे का पैल्ले-पैल्ले ही अपणे गुस्से जो सांत करी लेया करो। 27ते शैतान जो मौक्का मत दिंदे कि से तुसा जो धोख्खा देई सको। 28चोरी करणे वाला फिरी चोरी ना करो, पर नेक कम्म करणे तांइ मैहनत करेया करे, ताकि जिस जो जरुरत हो तिसेरी मदद करी सके। 29कोई गंदी गल्ल तुसा रे मुँह का ना निकले पर जे भी तुसा बोल्लो से गल्ल ठीक ते दूज्जेयां तांइ मददगार हो ताकि सुनणे वालेयां जो सुणी करी होंसला मिल्ले। 30अपणे कम्मां री वजह कने पवित्रात्मा जो दुखी मत करो जिन्हेरे जरिये छुटकारे वाले दिन तांइ तुसा पर मौहर लाई गे री है। 31सबणी किस्मे री कड़वाट, ते गुस्से ते लैहर-र ते कहला, ते बेजती, सारे बैर भाव समेत तुसा का दुर कित्ते जान् 32हमेसा इक्क-दूए तांइ कृपालू ते दयावान बणो, इक्क-दूए जो माफ करो, जिय्यां परमेश्वर ने मसीह यीशु बिच तुसा जो माफ कित्ता।

Currently Selected:

इफिसियों 4: CDHNT

Highlight

Compare

Copy