प्रेरितां रे कम्म 9
9
शाऊल रा मन बदलणा
1शाऊल जे हल्ले तिकर प्रभु यीशु रे चेल्लेयां जो मारणे ते धमकाणे री धुन बिच थिया, प्रधान पुरोत्त का गेया। 2ते तिसका दमिश्क कस्बे रे सभास्थल रे नां पर इस गल्ल पर चीठ्ठियां मगीं कि कै मर्द ते कै जनानी, जे भी मसीह यीशु रे पंथ #9:2 यीशु री शिक्षा पर चलणे वाले लोक।पर चलदे, तिन्हा जो कैद करी के यरुशलेम सहर लेई आए। 3पर जां शाऊल ते तिसेरे साथी चलदे-चलदे से दमिश्क कस्बे रे नेड़े पूज्जेया, ते चाणचक्के ही आसमान का चारो पास्से रौसनी चमकी, 4ते से जमीन पर पेई गेया, ते प्रभु जो ए बोलदे सूणेया, “ओ शाऊल, ओ शाऊल, तू मेरे जो किजो तगं करेया करदा है।” 5तिसने पूच्छेया, ओ प्रभु जी, तुसा कुण हिन? तिन्हा ने बोल्लेया, मैं यीशु है, जिस जो तू तगं करेया करदा है 6पर अवे उठी करी कस्बे बिच जा, अते जे तेरे जो करणा है से तेरे जो दस्सी दित्तेया जाणा, 7जे मणू तिस कने थिये से हैरान रेई गे, किजोकी तिन्हेरे जो अवाज तां सुणिदीं थी पर किच्छ दिस्सेया नी करदा थिया। 8तां शाऊल जमीन का उठेया ते जां हाख्खियां खोल्ली तां तिसजो किच्छ भी नी दिस्सेया, ते से मणू तिसेरा हत्थ पकड़ी करी दमिश्क जो लेई गे 9से त्रै दिनां तिकर किच्छ भी नी दिखि सकेया ते ना किच्छ खाया पित्ता 10दमिश्क कस्बे बिच हनन्याह नां रा इक्क चेल्ला थिया तिसजो प्रभु यीशु ने दर्शन देई करी बोल्लेया, ओ हनन्याह तिसने बोल्लेया हाँ, प्रभु जी 11तां प्रभु यीशु ने तिसजो बोल्लेया, उठ ते सीद्दा नां री गली बिच यहूदा रे घरे जा, तित्ते शाऊल नां रे इक्क तरसुस रे रैह्णे वाले मणू जो तोप, किजोकी से प्रार्थना करेया करदा है, 12अते तिसजो दर्शन बिच दिखाए रा है कि हनन्याह नां रे इक्क मणू आंदा ते तिसेरे पराल्ले हत्थ रखदा ताकि तिसेरी हाख्खियां री रौसनी ठीक होई जाए। 13हनन्याह ने जवाब दित्तेया, ओ प्रभु जी, मैं इस मणू रे बारे बिच मते जणेया का सुणे रा है कि तिसने यरुशलेम सहर बिच तुसा रे परमेश्वर रे लोक्कां री बड़ी वरी बुराई कित्त्ते री है, 14ते इत्ते भी इसजो बड्डे पुरोत्तां का अधिकार मिल्ले रा है कि तिन्हा सारे लोक्कां जो पकड़ी लये जे तुसा पर विश्वास करदे तिन्हा। 15पर प्रभु ने तिस बोल्लेया, जा, किजोकी शाऊल तां जो मैं चुणी लित्ते रा है कि से गैर यहूदियां, राज्जेयां अते इस्राएल रे लोक्कां बिच मेरा प्रचार करे। 16ते मैं तिसजो दसणा कि लोक्कां बिच मेरा प्रचार करणे री वजह कने तिसजो कदेया-कदेया दुख चुकणा पैणा। 17तां हनन्याह उठी करी शाऊल रे घरे गेया, ते तिस पर अपणा हत्थ रखि करी बोल्लेया, ओ भाई शाऊल, प्रभु यीशु ने मेरे जो भेज्जे रा है, जे तुसा जो रस्ते बिच दिस्से थिये, ताकि तू फिरी दिखि सके ते पवित्रात्मा कने भरी जाए। 18ते तिसी बेल्ले तिसेरी हाक्खिया का छिलके जेय पेय ते से दिखणा लग्गेया ते उठी करी बपतिस्मा लित्तेया, 19फिरी रोट्टी खाई करी तिसजो थोड़ा जोर आया।
दमिश्क बिच पौलुस रा प्रचार
ते से दमिश्क कस्बे बिच रैह्णे वाले चेल्लेयां का ही थोड़े दिनां तिकर रेया। 20ते से तौले ही दमिश्क कस्बे रे सभास्थल बिच जाई यीशु रे बारे बिच प्रचार करणा लग्गेया कि से ही परमेश्वर रा पुत्तर हिन। 21सारे सुनणे वाले ए सुणी करी हैरान होई करी बोलणे लग्गेया, कै ए सेइ मणू नी है जे यरुशलेम बिच यीशु पर विश्वास करणे वालेयां जो मुकाई दिंदा थिया, ते इत्ते भी इधेरे तांइ ही आया थिया कि तिन्हेरे एजो बन्नी करी बड्डे पुरोत्तां का लेई जाए? 22पर शाऊल होर भी जोर-शोर कने प्रचार करदा गेया ते इस गल्ल जो साबित करी के कि मसीह यीशु इत्ते ही है, दमिश्क बिच रैह्णे वाले यहूदियां रा मुँह बांद्द करदा थिया, 23जां शाऊल मते दिनां तांइ दमिश्क कस्बे बिच थिया, तां यहूदियां ने मिली करी तिसजो मारणे री योजना बणाई, 24पर तिन्हेरी योजना रा शाऊल जो पता लग्गी गेया से तां तिसजो मारी रखणे तांइ दिन-रात दरवाज्जेयां का बेई रैहन्दे थिये। 25पर रात्ती चेल्लेयां ने तिसजो टोकरे बिच पाया ते सहर री दुआल का टगीं करी तिसजो उतारी दित्तेया।
यरुशलेम सहर बिच शाऊल
26यरुशलेम सहर जाणे का बाद शाऊल ने तित्ते रैह्णे वाले प्रेरितां बिच मिली जाणे री कोसीस कित्ती, पर सारे तिसका डरदे थिये, किजोकी तिन्हा जो शाऊल रा विश्वास नी हुदां थिया कि से भी इक्क चेल्ला है। 27पर बरनबास ने तिसजो अपणे कन्ने प्रेरितां का लेई जाई करी तिन्हेरे जो दस्सेया कि किय्यां तिसने दमिश्क कस्बे जाणे रे रस्ते बिच प्रभु जो दिख्खेया ते किय्यां प्रभु जी ने तिस कने गल्लां कित्ती, ते दमिश्क कस्बे बिच किय्यां तिस कने यीशु रा प्रचार कित्तेया। 28तां प्रेरितां ने बरनबास री गल्ल रा भरोसा कित्ता ते इसी तरिक्के कने शाऊल यरुशलेम सहर बिच तिन्हा कने रेया ते सारे यरुशलेम बिच तिन्हा कने-कने जांदा थिया। 29ते बिना डरे प्रभु रे नां लेई करी प्रचार करदा थिया ते यूनानी भाषा बोलणे वाले यहूदियां कने गल्ल-बात ते बहस-बाजी करदा थिया, पर से तिसजो मारी रखणे री कोसीस करणा लग्गे 30ए जाणी करी संगी विश्वासी तिसजो कैसरिया सहर बिच लेई आए ते तरसुस #9:30 तरसुस शाऊल रा अपण सहर थिया।जो भेज्जी दित्तेया। 31इस तरिक्के कने सारे यहूदियां, गलील ते सारे सामरिया रे प्रदेशां बिच कलीसिया जो सांती मिल्ली अते तिसेरी तरक्की हुंदी गेई, ते से प्रभु रे डर ते पवित्रात्मा रे जरिए कलीसिया बिच मणू बदधे गे ते सारे खुशहाल रे।
लूद्दा ते याफा बिच पतरस
32फिरी इय्यां होया कि पतरस तिन्हा प्रदेशां बिच घूमदा रेया ते तिन्हा यीशु पर विश्वास करणे वाले लोक्कां का भी पूज्जेया जे लुद्देया कस्बे बिच रैहन्दे थिये। 33से तिसजो एनियास नां रे इक्क अधरंग रे बीमारी वाला मणू मिल्लेया जे आठ्ठ साल्लां का बिस्तर पर पे रा थिया 34पतरस ने तिसजो बोल्लेया, ओ एनियास! मसीह यीशु तेरे जो खरा करदा उठ, पर बछाण बिछा तां से उठ्ठी बैठेया 35तां लुद्देया ते शारोन कस्बे रे सारे रैह्णे वालेयां ने तिसजो दिख्खी करी प्रभु यीशु पर विश्वास कित्ता। 36याफा कस्बे बिच तबीता नां री यीशु री इक्क चेल्ली रैहन्दी थी, यूनानी भाषा बिच जिस जो दोरकास बोलदे। से बड़े भले रे कम्म रे दान पुन्य करदी रेह्न्दी थी। 37जिस बेल्ले पतरस लुद्देया कस्बे बिच थिया, तिन्हा ही रोज्जां बिच से बिमार होई करी मरी गई, ते तिन्हा ने तिसजो नुहाई करी अटारी पर रख्खी दित्तेया 38लुद्देया कस्बा याफा कस्बे रे नेड़े थिया, चेल्लेयां ने ए सुणी करी कि पतरस तित्ते है, दो जणेया जो भेजी करी तिसका बिनती कि असा का आणे बिच देर मत कर 39तां पतरस उठी करी तिन्हेरे कने गेया ते जां से पूज्जेया तां से तिसजो तिस अटारी पर लेई गे सारी विधवा जनानियां आई करी तिसका खड़ी गई, ते जे कपड़े दोरकास ने तिन्हेरे कने रेई करी बणाए थिये से दिखाणा लग्गी 40तां पतरस ने सारेयां जो बाहर करी दित्तेया, ते गोड्डे रे भारे बेई करी प्रार्थना कित्ती ते लास रे पास्से दिख्खी करी बोल्लेया, तबीता, उठ तां तिसने अपणी हाख्खियां खोल्ली दित्ती ते पतरस जो दिख्खी करी उठी गेई 41तिसने हत्थ देई करी तिसजो खड़ेरेया ते परमेश्वर रे लोक्कां ते विधवा जनानियां जो सद्दी करी तिन्हेरे जो से जिन्दी दिखाई दित्ती 42ए गल्ल सारे याफा कस्बे बिच फैली गई अते मते जणेया ने प्रभु यीशु पर विश्वास कित्तेया। 43ते पतरस याफा कस्बे बिच शमौन नां से कुसकी चमड़े रे कम्म करणे वाले रे घरे मते दिनां तांइ तित्ते रेया।
Currently Selected:
प्रेरितां रे कम्म 9: CDHNT
Highlight
Share
Compare
Copy
Want to have your highlights saved across all your devices? Sign up or sign in
Chambeali Bible (चम्बयाळी बाइबिल) 2020 by The Love Fellowship is licensed under a Creative Commons Attribution-ShareAlike 4.0 International License.
