प्रेरितां रे कम्म 26

अग्रिप्पा रे सामणे पौलुस रा सफाई दैणा

1अग्रिप्पा ने पौलुस जो बोल्लेया, तिज्जो अपणे बारे अन्दर बोलणे रा इजाज़त है तां पौलुस हत्थ अग्गे करी के जवाब दैणा लगेया, 2ओ राज्जा अग्रिप्पा, जितणी गल्लां रा यहूदी अधिकारी मेरे पर इल्जाम लान्दे, अज्ज तेरे सामणे तिन्हेरा जवाब दैणे अन्दर मैं अप्पु जो धन्न समजदा, 3किजोकी तुसा इन्हा गल्लां बिच निपुण हिन इधेरे तांइ मैं अप्पु जो धन्न समजदा, किजोकी तू यहूदियां रे सारे बरताव अते कहला रे बारे अन्दर जाणदा इधेरे तांइ मैं छन्दे करदा कि सबर कने मेरी सुण। 4जवानी का ही मेरा चाल-चलन अपणे लोक्कां ते यरुशलेम सहर बिच कदेया थिया, तिस गल्ल जो सारे यहूदी मणू जाणदे। 5अगर से गवाई दैणा चाण, तां जवानी का ही मेरे जो जाणदे कि मैं फरीसी होई करी अपणे धर्म रे सबणी का बदिया पंथ रे हिसाब कने चलेया। 6ते अवे तिस आस अन्दर उम्मीद री वजह कने जे परमेश्वर ने असा रे पूरखां कने कित्ती थी, मेरे पर मुकद्दमा चलेया करदा है। 7तिस्सी आस रे पूरे होणे री उम्मीद लाई करी, असा रे बारा गोत्तर अपणे सारे मनां कने दिन-रात परमेश्वर री भक्ति करदे आये रे हिन, ओ राजा, इस ही उम्मीद रे बारे अन्दर यहूदी मेरे पर इल्जाम लान्दे 8तां पौलुस ने तित्ते खड़ित्ते सारे यहूदियां जो बोल्लेया, हालांकि तुसा मणू ए विश्वास करदे कि परमेश्वर मरी गेरे मणूआं जो जिन्दा करी दिन्दे, तां तुसा ए गल्ल किजो नी मनदे कि परमेश्वर ने यीशु जो मुर्देयां बिच का जिन्दा कित्ते रा है? 9मैं भी समजेया थिया कि नासरत कस्बे रे यीशु पर विश्वास करणे वालेयां रे खिलाफ मेरे जो मता किच्‍छ करणा चाएदा, 10ते मैं यरुशलेम अन्दर इय्यां ही कित्तेया ते बड्डे पुरोत्तां का अधिकार लेई करी मते सारे पवित्र मणूआं जो जेल अन्दर पाया, ते जां तिन्हा जो मारी रखदे थिये तां मैं भी तिन्हेरे खिलाफ अपणी सैह्मती दिन्दा थिया। 11हर इक्क सभास्थल अन्दर मैं तिन्हा जो सजा दुआई-दुआई करी यीशु री बेजती करान्दा थिया ते होर तां होर, लेर री वजह कने इदेया पागल होई गेया कि दूए सहरां अन्दर भी जाई करी तिन्हा जो तंग करदा थिया।

अपणे मन रे बदलणे रे बारे बिच पौलुस री गवाई

12इस्सी धुन अन्दर जां मैं बड्डे पुरोत्तां का अधिकार ते आज्ञा-पत्तर लेई करी दमिश्क कस्बे जो जाया करदा थिया। 13तां ओ राजा, रस्ते अन्दर धियाड़ी बेल्ले मैं आसमान का सूरज रे तेज का भी बधी करी इक्क लौ जो, अपणे ते अपणे कन्ने चलणे वालेयां रे चौन्नी पास्से चमकदी दिख्खी 14जिस बेल्ले असी सारे जणे जमीन पर छुड़की पे, तां मैं इब्रानी भाषा अन्दर ए अवाज सुणी कि ओ शाऊल, ओ शाऊल, तू मेरे जो किजो तंग करेया करदा है? मेरी इच्छा रे खिलाफ लड़ी करी तू अप्पु जो ही बड़ी तकलीफ बिच पाया करदा है। 15मैं बोल्लेया, ओ प्रभु जी, तुसा कुण हिन? प्रभु जी ने बोल्लेया, मैं यीशु है, जिस जो तू तंग करदा 16पर अवे उठी करी, अपणे पैरां पर खड़े होई जा किजोकी मैं तिज्जो इधेरे तांइ दर्शन दित्ता कि तिज्जो तिन्हा गल्लां रा भी सेवक ते गवाह ठैह्रां, जे तैं दिख्खियां, ते तिन्हा गल्लां रा भी, जिन्हा तांइ मैं तिज्जो दर्शन दैणा 17ते मैं तिज्जो तेरे लोक्कां का ते गैर यहूदी का बचान्दे रैह्णा, जिन्हा का मैं अब्बे तिज्जो भेजणा 18ताकि तू तिन्हेरी आख्खियां खोल्ले जिस कने से न्याहरे का रौसनी पास्से, ते शैतान रे अधिकार का निकली करी परमेश्वर पास्से फिरी जाण ताकि से तिन्हेरे पाप्पां जो माफ करण ते से मणू तिन्हा मणूआं कने जगाह् हासिल करण जे मेरे पर विश्वास करणे कने पवित्र कित्ते गेरे हिन।

अपणे कम्मां रे बारे दसणा

19इधेरे तांइ ओ राजा अग्रिप्पा, मैं तिस स्वर्ग रे दर्शन जो मन्नेया, 20पर पैल्ले दमिश्क कस्बे रे, फिरी यरुशलेम सहर रे, ते फिरी तां यहूदियां प्रदेश रे सारे देस रे रैह्णे वालेयां जो ते गैर यहूदी लोक्कां बिच प्रचार करदा रेया, कि अपणे पाप्पां का तौबा करी के परमेश्वर का हटी आओ। 21इन्हा गल्लां री वजह कने यहूदी मेरे जो मन्दिर अन्दर पकड़ी करी मारणे री कोसीस करदे थिये 22पर परमेश्वर री मदद कने मैं अज्ज तांइ बणी रे रा है ते छोटे-बड्डे सबणी सामणे गवाई दिन्दा, ते तिन्हा गल्लां जो छड्डी करी होर किच्‍छ नी बोलदा जे भविष्यद्वक्ता ने अते मूसा ने भी बोल्लेया कि से होणे वालियां हिन, 23कि मसीह यीशु जो जुल्म सैहणा पैणे, ते तिन्हा ने ही सबणी का पैल्ले जिन्दे होई करी, असा रे लोक्कां अन्दर ते गैर यहूदी लोक्कां अन्दर रौसनी रा प्रचार करणा ताकि से छुटकारा पाण। 24जिस बेल्ले पौलुस इस तरिक्के कने जवाब देया करदा थिया, तां फेस्तुस ने ऊच्ची अवाज अन्दर बोल्लेया, ओ पौलुस, तू पागल है मते सारे ज्ञान ने तिज्जो पागल करी दित्ते रा है। 25पर पौलुस ने बोल्लेया, ओ महामहिम फेस्तुस, मैं पागल नी है, पर मैं सच्ची ते बुद्वी री गल्लां बोलदा। 26राज्जा भी, जिसेरे सामणे मैं बगैर डरे रे बोल्लेया करदा है, इन्हा गल्लां जो जाणदा ते मेरे जो विश्वास है कि इन्हा गल्लां बिच का कोई भी गल्ल इन्हा का छुपेरी नी है, किजोकी ए घटना कुसकी कौणे अन्दर नी होई।

पौलुस री क्रेते तक रोमी यात्रा

27ओ राजा अग्रिप्पा, कै तू भविष्यद्वक्ता पर विश्वास करदा? हाँ, मेरे जो पता है कि तू विश्वास करदा 28तां अग्रिप्पा ने पौलुस जो बोल्लेया, तू मेरे जो थोड़ा करी समझाई करी मसीही बनाणा चाह्‍ंदा? 29पौलुस ने बोल्लेया, परमेश्वर का मेरी प्रार्थना है कि कै थोड़े अन्दर कै मते अन्दर, सिर्फ तू ही नी पर जितणे भी मणू अज्ज मेरी सूणदे हिन, इन्हा बन्धनां जो छड्डी करी से मेरे सांई मसीही होई जाण। 30तां राज्जा ते राज्यपाल ते बिरनीके ते तिन्हेरे कन्ने बैह्णे वाले खड़ी उठ्ठे ते तित्ते का निकली गे, 31ते जिय्यां से बाहर निकलेया करदे थिये से अप्पु-मिते बोलणा लगे, इस मणू ने इदेया तां किच्‍छ भी नी कित्ते रा है, कि इसजो मारणे री या जेल बिच ढ़पणे री सजा दित्ती जाओ। 32अग्रिप्पा ने फेस्तुस जो बोल्लेया, अगर ए मणू सम्राट का अपणा न्याय कराणे री बिनती ना करदा तां छुटी सकदा थिया।

Currently Selected:

प्रेरितां रे कम्म 26: CDHNT

Highlight

Compare

Copy