प्रेरितां रे कम्म 22

भीड़ रे सामणे पौलुस रा भाषण

1ओ संगी विश्वासियों, मेरा जवाब सुणो, जे मैं तुसा रे सामणे बोलणा लग्गेया 2से ए सुणी करी कि ए असा कने इब्रानी भाषा अन्दर गल्ल करेया करदा है, होर भी चुप्प होई गे तां तिनिए बोल्लेया: 3मैं ता यहूदी मणू है, अते मेरा जन्म किलिकिया प्रदेश रे तरसुस कस्बे बिच होया पर इस सहर अन्दर गमलीएल रे पैरां रे नेड़े बिठाई करी पढ़ाया गे रा है, ते बब्ब-दाद्देयां री परम्परा मेरे जो ठीक तरिक्के कने सखाई गे री है मेरे अन्दर परमेश्वर तांइ बड़ा जोस थिया जिय्यां अज्ज तुसा अन्दर है 4मैं मसीह बिच विश्वास करणे वाले लोक्कां जो इन्ना जादा तंग कित्तेया कि उन्हेरे प्राण तक लेई लै मैं जनानी अते मड़दा दोनां जो बन्नी करी जेला पाई दित्तेया। 5इधेरे तांइ प्रधान पुरोत्त ते मन्दिर रे बुजुर्गां री पूरी महासभा इस गल्ल री गवाह है, कि तिन्हा का मैं यहूदी विश्वासियां रे नां री चीठ्ठियां लेई करी दमिश्क कस्बे जो जाया करदा थिया ताकि जे अगर तित्ते कोई मसीह बिच विश्वास करणे मणू होण, तां तिन्हा जो भी सजा दुआणे तांइ बन्नी करी यरुशलेम अन्दर लेई आं।

अपणे मन रे बदलणे री गवाई

6जां मैं चलदे-चलदे दमिश्क कस्बे रे नेड़े पूज्जेया, तां इय्यां होया कि कोई धियाड़ी बेल्ले चाणचक्के ही इक्क बड्डी रौसनी आसमान का मेरे चारो पास्से चमकी। 7अते मैं थल्ले जमीन पर पेई गेया ते ए अवाज सूणी, “ओ शाऊल, ओ शाऊल, तू मेरे जो किजो तंग करदा?” 8मैं जवाब दित्तेया, “ओ प्रभु जी, तुसा कुण हिन?” तिन्हा ने मेरे जो बोल्लेया, मैं नासरत कस्बे रा यीशु है, जिस जो तू तंग करदा। 9जे मेरे कने थिये तिन्हा ने भी से लौ ता दिस्सि, पर तिस अवाज जो से समजी नी सके जे मेरे कने गल्ल करेया करदी थी। 10तां मैं बोल्लेया, ओ प्रभु जी, मैं कै करां? प्रभु जी ने मेरे जो बोल्लेया, अवे उठी करी दमिश्क कस्बे अन्दर जा ते जे किच्‍छ तेरे करणे तांइ ठैह्राया गे रा है, तित्ते तिज्जो दस्सी दित्तेया जाणा। 11जां तिस महिमामय लौ री वजह कने मेरे जो दिसणा बांद्द होई गेया, तां मैं अपणे दोस्तां रा हत्थ पकड़ी करी दमिश्क कस्बे तिकर आया। 12तां हनन्याह नां रा मूसा रे कानून रे हसाब्बे इक्क भग्त मणू थिया, जे तित्ते रैह्णे वाले यहूदियां बिच का नामी थिया, मेरे का आया, 13ते खड़ी करी मेरे जो बोलणा लगेया, ओ भाई शाऊल, अवे दिख् तिस्सी बेल्ले मेरी आख्खियां खुली गेई ते मैं तिसजो दिख्खेया 14फिरी तिसने बोल्लेया, असा रे पूरखां रे परमेश्वर ने तिज्जो इस तांइ चुणे रा है ताकि तू तिन्हेरी मरजी जो जाणे, ते तिस धार्मिक मसीह जो दिख्खे ते तिन्हेरे गल्लां सुणे। 15किजोकी तैं तिन्हेरे पास्से का सबणी मणूआं सामणे तिन्हा गल्लां रा गवाह होणा जे तैं दिख्खी ते सुणे री हिन 16अवे ऐड्डी हाण किजो लाया करदा है? उठ, बपतिस्मा लै, ते तिन्हेरा नां लै ताकि तेरे पाप माफ होई जाण।

गैर यहूदियां बिच प्रचार री बुलाहट

17जिस बेल्ले मैं फिरी यरुशलेम अन्दर आई करी मन्दिर बिच प्रार्थना करेया करदा थिया, तां मेरे जो अपणी कोई होश नी रेह्ई, 18ते यीशु रा दर्शन दिख्खेया कि से मेरे जो बोल्दा, तौले ही यरुशलेम का झट निकली जा किजोकी इत्ते रैह्णे वाले लोक्कां ने मेरे बारे अन्दर तेरी गवाई नी मनणी। 19मैं बोल्लेया, ओ प्रभु जी, तिन्हा जो ता पता है कि मैं तुसा पर विश्वास करणे वालेयां जो जेल बिच पाई दिन्दा ते हर इक्क सभास्थल बिच कुटवांदा थिया। 20जां तेरे गवाह स्तिफनुस रा खून रुड़ेया करदा थिया तां मैं भी तित्ते खड़ित्ते रा थिया ते इस गल्ल कने सहमत थिया, अते तिसजो बट्टे मारणे वालेयां रे चोग्गे जो सम्भालेया करदा थिया। 21ते प्रभु ने मेरे जो बोल्लेया, चली जा: किजोकी मैं तिज्जो गैर यहूदी लोका रे बिच दुर-दुर तांइ भेजणा। 22ते मणू इस गल्ल तांइ तिसेरी सूणदे रे, फिरी जोरे-जोरे बोलणा लगे, इदेय मणू जो मुकाई दैणा चाएदा, इसेरा जिन्दा रैह्णा खरा नी है। 23जिस बेल्ले से अपणा गुस्सा दिखाणे तांइ लेरां मारदे थिये ते अपणे चोग्गे सुटदे ते आसमान अन्दर धूड़ उड़ाया करदे थिये 24तां पलटन रे सरदार ने बोल्लेया, इसजो अड्डे अन्दर लेई जाओ, ते कोड़े मारी करी परखो, ताकि मेरे जो पता लग्गो कि मणू कुस वजह कने तिसेरे खिलाफ इय्यां लेरां मारेया करदे हिन 25जिस बेल्ले तिन्हा ने तिसजो रस्सी कने बन्नेया तां पौलुस ने तिस सूबेदार जो, जे कि नेड़े ही खड़ित्ते रा थिया, बोल्लेया, कै ए ठीक है कि तुसा इक्क रोमी मणू जो, ते से भी बगैर इल्जाम साबित होए रे, कोड़े मारो? 26हाकिम ने ए सुणी करी पलटन रे सरदार जो जाई करी बोल्लेया, तू ए कै करेया करदा है? ए तां रोमी मणू है 27तां पलटन रे सरदार ने तिसेरे का आई करी बोल्लेया, मेरे जो दस्स, कि तू रोम रा है? तिनिए बोल्लेया, हाँ 28ए सुणी के पलटन रे सरदार ने बोल्लेया, मैं रोमी होणे रा दरजा मते सारे पैसे देई करी हासल कित्ते रा है पौलुस ने बोल्लेया, मैं तां पैदा हुन्दे का ही रोमी है 29तां जे मणू तिसजो परखणे वाले थिये, से झट तिसेरे नेड़े का हटी गे अते पलटन रा सरदार भी ए जाणी करी कि ए रोमी है ते मैं इसजो बन्ने रा है, डरी गेया।

महासभा रे सामणे पौलुस

30दूए रोज्जे पौलुस जो खरा करी जांचणे तांइ कि यहूदी इस पर किजो इल्जाम लांदे, तिसजो खोल्ली दित्तेया ते बड्डे पुरोत्तां अते सारी महा-सभा जो कठीणे रा हुकम दित्तेया, ते पौलुस जो थल्ले लेई जाई करी तिन्हेरे सामणे खड़ा करी दित्तेया।

Currently Selected:

प्रेरितां रे कम्म 22: CDHNT

Highlight

Compare

Copy