प्रेरितां रे कम्म 15

यरुशलेम सहर बिच इक्क जरुरी फैसला लैणा

यरुशलेम सहर री सभा

1फिरी किच्‍छ मणू यहूदियां प्रदेश का आई करी संगी विश्वासियां जो सखाणे लग्गे कि मूसा रे कानून रे हिसाब कने तुसा रा खतना नी हो तां तुसा छुटकारा नी पाई सकदे। 2जां पौलुस ते बरनबास रा तिन्हा कने मिलणे तांइ यरुशलेम सहर बिच आए तां तिन्हा कने बड़ी बैहस-बाजी होई, ते ए फैसला कित्ता कि पौलुस ते बरनबास, ते असा बिच का किच्‍छ मणू इस गल्ल रे बारे बिच यरुशलेम सहर बिच रैह्णे वाले खास प्रेरितां का ते बुजुर्ग मणू का जाण। 3तां सारी कलीसिया ने पौलुस ते बरनबास जो किच्‍छ पैसे जमा करी के दित्ते ताकि से थोड़ी दुर तिकर जाई सकण, ते से फीनीके ते सामरिया प्रदेशां का हुन्दे गैर यहूदी लोक्कां जो पाप का तौबा करणे रा सुब बसेख सुणादे गे, ते सब संगी विश्वासी जो बड़ा खुस कित्तेया। 4जां पौलुस ते बरनबास यरुशलेम सहर बिच पूज्जे, तां कलीसिया ते खास प्रेरितां ते बुजुर्ग मणू तिन्हा कने खुसी कने मिल्ले, ते तिन्हा ने दस्सेया कि परमेश्वर ने तिन्हा कने होई करी कदेय-कदेय कम्म कित्ते थिये 5पर फरीसियां रे दल रे किच्‍छ लोक्कां ने उठी करी बोल्लेया, कि गैर यहूदियां जो खतना ते मूसा रे कानून जो मनणे रा हुकम दैणा चाएदा। 6तां खास प्रेरित ते बुजुर्ग मणू इस गल्ल रे बारे सोच-विचार करणे तांइ कठ्ठी गे 7तां पतरस ने बड़ी बैह्स-बाजी रे बाद खड़े होई करी तिन्हा जो बोल्लेया, ओ भाईयों तुसा जाणदे कि बड़े रोज होये, कि परमेश्वर ने तुसा बिच का मेरे जो चुणी लेरा है, कि मेरे जरिए गैर यहूदी लोक्कां जो सुब बसेख सूणाई करी तिन्हा जो विश्वास पर लियाऊँ। 8ते मन जो परखणे वाले परमेश्वर ने तिन्हा जो भी असा सांई पवित्रात्मा देई करी तिन्हा जो अपणाई लित्ता। 9ते विश्वास रे जरिए तिन्हेरे मन सुच्चे करी के असा बिच ते तिन्हेरे बिच कोई भेद-भाव रख्खेया 10तां अवे तुसा किजो चेल्‍लेयां पर बेमतलब जरुरतां रा बोझ पाई करी परमेश्वर जो परखेया करदे हिन, जिस जो कि न असा रे पित्र चुक्की सके थिये ते ना असा चुक्की सकदे, 11इय्यां करणा सही नी है। असा रा ए मनणा है कि जिय्यां तिन्हा ने मसीह यीशु रे अनुग्रह कने छुटकारा पाणा, तिस्सी तरिक्के कने असी भी पाणा। 12तां सारी सभा चुपचाप होई करी बरनबास ते पौलुस री सुनणे लग्गे, कि परमेश्वर ने तिन्हेरे जरिए गैर यहूदियां रे मणूआं बिच कदेइ-कदेइ निशानियां, ते अनौखे कम्म दिख्खाये 13जां से बोल्ली बैठ्ठे, तां याकूब बोलणे लग्गेया, ओ भाईयों, मेरी सुणो, 14शमौन ने जिस जो पतरस भी बोलदे असा जो समजाया कि परमेश्वर ने गैर यहूदी लोक्कां पर कदेइ कृपा कित्ते री है कि तिन्हा बिच का किच्‍छ जो अपणे तांइ चुणी लित्तेया। 15ते गैर यहूदियां रे परमेश्वर रे पास्से फिरणे रे बारे बिच भविष्यद्वक्ता ने पवित्रशास्त्र बिच लिख्खे रा है: 16इसेरे बाद मैं फिरी आई करी दाऊद रे गिरे रे तम्बू#15:16 इसेरा मतलब दाऊद रा राज है। जो फिरी खड़ा करणा, ते खंडरा जो फिरी बनाणा, ते तिन्हा जो खड़ा करणा। 17इधेरे तांइ जे बचे रे लोक, मतलब अवे सारे गैर यहूदियां जो जे मेरे हिन, प्रभु जो तोपण। 18ए ओई प्रभु बोल्दे हिन जे दुनिया री सुरुआत का ही इन्हा गल्लां रा सुब बसेख दिंदे आये रे हिन 19इधेरे तांइ मेरा विचार ए है, कि गैर यहूदियां बिच का जे मणू परमेश्वर रे पास्से आई जांदे, असा तिन्हा पर जोर ना पाण कि से यहूदी रीति रीवाज रे हिसाब कने चले। 20पर तिन्हा जो चीठ्ठी लिख्खी भेज्जो, कि से मूर्तां जो चढ़ाई री रोट्टी तुसा जो नी लैणी चाएदी ते व्यभिचार का बची रैह्ण गला घोटी करी मारे रे जानवर रा मांस ना खाण ते खून जो कदी ना खाण, 21किजोकी पुराणे बेल्ले का सहर-शहर मूसा रे कानून रा प्रचार करणे वाले चली आया करदे हिन, मूसा रे कानून हर विश्राम दिन सभास्थल बिच पढ़े जांदे हिन।

गैर-यहूदी विश्वासियां जो चीठ्ठी

22जां यरुशलेम री सारी कलीसिया समेत खास प्रेरित ते बुजुर्ग मणू जो खरा लग्गेया, कि अपणे बिच का केई मणूआं जो चुनण, मतलब यहूदा जिस जो कि बरसब्बास भी बोल्दे, ते सीलास जो जे कि विश्वासियां बिच बड़े इज्जतदार भी थिये, ते तिन्हा पौलुस ते बरनबास रे कन्ने अन्ताकिया सहर री कलीसिया का भेज्जेया। 23ते तिन्हेरे हत्थां ए चीठ्ठी लिख्खी भेज्जी, कि अन्ताकिया सहर ते सीरिया ते किलिकिया प्रदेश बिच रैह्णे वाले भाईयां जो जे कि गैर यहूदियां रे हिन, खास प्रेरितां ते बुजुर्ग लोक्कां रा नमस्कार। 24असा ने सूणेया, कि असा बिच का कितणेयां ने जाई करी, तुसा जो अपणी गल्लां कने डराई दित्तेया, ते तुसा रे मन बदली दित्ते पर असा ने तिन्हा जो हुकम नी दित्तेया थिया 25इधेरे तांइ असा ने इक्क मन होई करी ठीक समजेया, कि असा रे चुणे रे प्यारे बरनबास ते पौलुस जो तुसा का भेज्जन। 26ए तां मणू हिन, जिन्हा ने अपणे प्राण असा रे प्रभु मसीह यीशु तांइ मुस्किल बिच पाये रे हिन। 27ते असा ने यहूदा ते सीलास जो भेज्जेया, ताकि से अप्पु तुसा जो ए सब गल्लां बोल्ली देंन। 28पवित्रात्मा जो, ते असा जो ठीक लग्गेया, कि इन्हा जरुरी गल्लां जो छड्डी, तुसा पर होर कोई बोझ ना पाण, 29कि तुसा मूर्तां जो भेंट कित्ते री रोट्टी तुसा जो नी लैणी चाएदी ते व्यभिचार का बची रेंन गला घोटी करी मारे रे जानवर रा मांस ना खाण ते खून जो कदी ना खाण। इन्हा सबका दुर रेयो तां तुसा रा भला होणा, अग्गे बिदा। 30फिरी से बिदा होई करी अन्ताकिया सहर पूज्जे, ते सभा इकट्ठा करी के से चीठ्ठी तिन्हा जो देई दित्ती 31ते से पढ़ी करी तिस उपदेस री गल्लां का बड़े खुस होये 32ते यहूदा ते सीलास ने जे खुद भी भविष्वाणी करणे वाले थिये, बड़ी गल्लां कने विश्वासियां जो उपदेस देई करी मजबूत कित्तेया। 33यहूदा जिस जो बरसब्बास रे नां कने भी जाणेया जांदा थिया ते सीलास ने विश्वासियां कने किच्‍छ रोज सांती कने रैह्णा चाएया, पर यहूदा जिस जो बरसब्बास रे नां कने भी जाणेया जांदा से तित्ते का हटी गेया, 34(पर सीलास जो तित्ते रैह्णा खरा लग्गेया।) 35ते पौलुस अते बरनबास अन्ताकिया बिच रुकी गे, ते बड़े होर मणूआं कने प्रभु यीशु रे वचन री उपदेस ते सुब बसेख सुणादे रे।

सुब-बसेख रे प्रचार तांइ प्रेरित पौलुस रा दूज्जा सफर

पौलुस री दुई प्रचार-यात्रा पौलुस ते बरनबास बिच मतभेद

36किच्‍छ रोज्जां बाद पौलुस ने बरनबास जो बोल्लेया, कि जिन्हा-जिन्हा सहरां बिच असा ने प्रभु रा वचन सुणाया थिया, चलो, फिर तित्ते जाई करी अपणे विश्वासियां जो दिख्खदे, कि कदेय हिन। 37ते बरनबास ने यूहन्ना जो जिस जो कि मरकुस भी बोल्दे, कन्ने लैणे रे बारे अन्दर सोच्चेया। 38पर पौलुस ने तिसजो जे कि पंफूलिया प्रदेश बिच तिन्हा का बखरे होई गे थिये, ते कम्म पर तिन्हा कने नी गे थिये, कने लेई जाणा ठीक नी समजेया 39तां पौलुस ते बरनबास इक्क दूज्जे रे खिलाफ होई गे, ते इक्क दूज्जे का बखरे होई गे ते बरनबास, ते मरकुस जो लेई करी जहाज पर साइप्रस टापू जो चली गेया। 40पर पौलुस ने सीलास जो चुणी लेया, ते विश्वासियां का परमेश्वर री अनुग्रह पर सौंपी दित्तेया ते अन्ताकिया सहर का चली गेया। 41ते से सीरिया ते किलिकिया प्रदेशां का हुन्दे होये कलीसिया रे लोक्कां जो मजबूत करदे होए निकली गेया।

Currently Selected:

प्रेरितां रे कम्म 15: CDHNT

Highlight

Compare

Copy