2 थिस्सलुनीकियों 3
3
प्रार्थना अते कम्म
प्रार्थना करणे तांइ बिनती
1आखिर बिच, ओ संगी विश्वासियों, असा तांइ प्रार्थना करेया करो कि असी प्रभु रा बसेख तौले-तौले फैलाई सकण ते जिय्यां तुसा तिस पर विश्वास कित्तेया तिय्यां ही दूए मणू भी विश्वास करी सको। 2ते असा तांइ प्रार्थना करेयो कि परमेश्वर असा री रक्षा करे ताकि ए बुरे मणू असा जो नुक्सान ना पूजाई सकण किजोकी ए मणू यीशु मसीह रे बसेख पर विश्वास नी करदे। 3पर प्रभु भरोस्सेमंद हिन, तिन्हा ने तुसा जो आत्मिक रुप कने मजबूत बनाणा ते तुसा जो शैतान का बचाई रखणा। 4असा जो प्रभु बिच ए भरोस्सा है कि तुसा असा रे दित्ते रे सारे हुकमां जो मनदे ते तुसा अग्गे भी मनदे रैह्णा। 5प्रभु यीशु मसीह तुसा जो ए समजणे री ताकत दे कि परमेश्वर अपणे लोक्कां कने किन्ना जादा प्यार करदे ते जिय्यां मसीह यीशु ने अप्पु सबर रख्खी करी सहन कित्तेया तिय्यां ही तुसा भी सहन करी सको।
प्रार्थना करणे तांइ जिम्मेदारी
6ओ संगी विश्वासियों, असी तुसा जो तिस अधिकार कने हुकम दिंदे जे असा जो प्रभु यीशु मसीह ने दित्ते रा है कि तुसा हर इक्क जणा इदेय विश्वासी का दुर रेयो जे आलस बिच जिन्दगी बितांदे ते जे तिस शिक्षा रे हिसाब कने नी चलदे जे असा ने तुसा जो सिखाए री है। 7किजोकी तुसा जो अप्पु ठीक तरिक्के कने पता है कि तुसा जो तिस्सी तरिक्के कने जिन्दगी जीणी चाएदी जिय्यां असी जिन्दे किजोकी जां असी तुसा कने रेया करदे थिये तां असी आलस नी कित्ता पर असी मैहनत करदे थिये। 8ते कुसकी का मुफ्त बिच रोट्टी नी खाई पर मैहनत-मजदूरी करी के रात-दिन कम्म-काज करदे थिये ताकि असी तुसा बिच का कुसकी पर अपणी जरुरतां तांइ निर्भर ना हो। 9असी मैहनत करदे थिये तां इधेरे तांइ नी करदे थिये किजोकी असा जो तुसा का आर्थिक मदद लैणे रा कोई हक नी है पर ए असी इधेरे तांइ करदे थिये ताकि तुसा सामणे इक्क उदारण बणी सके ताकि तुसा भी तिय्यां ही करेया करो। 10किजोकी जां असी तुसा कने रैहन्दे थिये, तां भी असा ने तुसा जो मती वरी बोल्लेया कि जे अगर कोई कम्म नी करणा चाओ तां से रोट्टी भी ना खाए। 11असी सुणे रा है कि तुसा बिच किच्छ मणू बड़े आलसी हिन ते किच्छ कम्म नी करदे पर दूज्जे लोक्कां रे कम्मां बिच अड़चणा पांदे रैह्न्दे। 12इदेय मणू जो असी मसीह यीशु रे दित्ते रे हक कने हुकम दिंदे ते समझांदे कि से चुप्पचाणे कम्म करे ते अपणी रोजी-रोट्टी कमाए। 13तुसा ओ संगी विश्वासियों, भले कम्म करणे बिच हिम्मत मत हारो। 14जे अगर कोई असा री इस चीठ्ठी बिच लिख्खे शिक्षा री गल्लां जो ना मन्ने तां सारेयां सामणे तिस मणू रा खुलासा करी देयो, ते इदेय विश्वासी का दुर रेयो ताकि इय्यां करणे कने तिसजो शर्मिंदगी महसूस हो। 15तां भी तिस कने दुश्मणां जदेया बर्ताव मत करदे, ते जिय्यां तुसा भ्याल जो समझांदे तिय्यां ही तिसजो भी समझाई देयो।
इक्क आखरी प्रार्थना
आखरी नमस्ते
16प्रभु जे सांती दैणे वाला है, मैं तिन्हा का प्रार्थना करदा कि से तुसा जो हमेसा ते हर तरिक्के री सांती दिंदे रैह्ण, ते प्रभु तुसा सारे जणेया कने रैह्ण। 17मैं पौलुस तुसा जो अपणे हत्थां कने नमस्ते लिख्खी करी भेजदा। मैं अपणी चीठ्ठी रे आखिर बिच इय्यां ही लिखदा ताकि हर कुसकी जो ए पता चली जाए कि चीठ्ठी मैं भेज्जी री है। 18असा रे प्रभु यीशु मसीह रा अनुग्रह तुसा सारे जणेया पर हुंदा रेयो।
Currently Selected:
2 थिस्सलुनीकियों 3: CDHNT
Highlight
Share
Compare
Copy
Want to have your highlights saved across all your devices? Sign up or sign in
Chambeali Bible (चम्बयाळी बाइबिल) 2020 by The Love Fellowship is licensed under a Creative Commons Attribution-ShareAlike 4.0 International License.
