2 कुरुन्थियों 6
6
1असी#6:1 पौलुस चाह्ंदा थिया कि कलीसिया रे मणू से सारी चीजां करण जिस कने परमेश्वर जो महिमा मिलदी। जे अगर से परमेश्वर तांइ किच्छ नी करदे तां परमेश्वर रे अनुग्रह रा तिन्हेरी जिन्दगी बिच कोई फल्ल नी होणा थिया। जे परमेश्वर रे सहकर्मी हिन, छंदे करी के समझादें की परमेश्वर री अनुग्रह जे तुसा पर है, तिसजो बेकार मत जाणा देयो। 2किजोकी पवित्रशास्त्र बिच परमेश्वर ता ए बोलदे,
“ठीक समय पर मैं तेरी सुणी लित्ती,
ते छुटकारे वाले दिन मैं तेरी मदद कित्ती,
सुणो, अब्बे ए से ठीक समय है; सुणो, अब्बे से छुटकारे रा दिन है।”
3परमेश्वर रे सहकर्मी होणे रे नात्ते असी कुसकी गल्ल बिच ठोक्कर खाणे रा कोई भी मौक्का नी दिदें, ताकि असा री सेवा पर कोई इल्जाम ना आये। 4हर तरिक्के कने असी ए ज़ाहिर करदे कि असी परमेश्वर रे चुणे रे दास हिन, असी बड़े सबर कने दुखां, कमी-घटियां ते मुसीबतां जो सैह्ंदे। 5-6ते असी कोड़े खाणे कने, कैद होणे कने, हगांमेया कने, मैहनत करदे होए, जागदे रैह्णे कने, भूख्ख बिच, पवित्रता कने, ज्ञान कने, सबर कने, रहम कने, पवित्रात्मा कने अप्पु जो परमेश्वर रे चुणे रे दास साबित करदे। 7-8असी सच्चे प्यार कने, सच्चाई रे वचनां कने, परमेश्वर री ताकत कने, धार्मिकता रे हथियारां कने जे हमला करणे ते अपणी रक्षा करणे तांइ हिन, ते लोक्कां रा असा री इज्जत या बेइज्जती करणे रे जरिये, ते तिन्हेरे असा रे बारे बिच ठीक या बुरी गल्लां बोलणे रे जरिये भी अप्पु जो परमेश्वर रे चुणे रे दास साबित करदे। ते हालांकि असा जो ढोंगी समजेया गेया, पर असी सच ही बोलदे। 9-10किच्छ मणू असा जो ठीक जाण-पैछाण वालेयां सांई मिलदे, पर किच्छ मणू असा जो अनजाण लोक्कां सांई नजरंदाज करी दिंदे। असी मरणे रे करीब रैहन्दे, पर असी फिरी भी जिन्दे हिन। असा जो कुट्टेया गेया, पर असी फिरी भी नी मरे। असा रे दुखी होणे रा समय भी आया पर असी फिरी खुसी मनांदे। असी गरीब हिन, पर मते जणेया जो आत्मिक रुप बिच अमीर बणाई दिदें, असी इदेय हिन कि जिय्यां असा का किच्छ भी नी है, पर फिरी भी असी सब किच्छ रखदे। ते इन्हा ही सारे तरिक्के कने असी ए ज़ाहिर करदे कि असी परमेश्वर रे चुणे रे दास हिन।
11ओ कुरिन्थियों सहर रे विश्वासियों, असी तुसा कने खुली करी गल्लां कित्ती री हिन, असी तुसा जो खुले दिल कने प्यार करदे। 12असा रे दिल बिच तुसा तांइ प्यार री कोई कमी नी है, पर तुसा ने असा तांइ अपणे प्यार जो रोक्की रख्खे रा है। 13पर तुसा जो अपणे बच्चे समजी करी मैं तुसा जो बोलदा की तुसा भी असा रे प्यार रे बदले बिच पर अपणे प्यार जो मत रोक्की रख्खो।
असी परमेश्वर रे मन्दिर हिन
14अविश्वासी लोक्कां रे सहभागी मत बणो। किजोकी धार्मिकता ते अधार्मिकता रा कोई मेल जोल नी है, रौसनी या न्याहरे री कोई सगंती नी है। 15ते मसीह यीशु जी रा शैतान कने कोई लैणा-दैणा नी है, ते विश्वासी कने अविश्वासी रा कोई नात्ता नी है। 16ते मूर्तां कने परमेश्वर रे मन्दिर रा कोई रिस्ता नी। किजोकी असी ता जिन्दे परमेश्वर रे मन्दिर हिन, जिय्यां परमेश्वर ने बोल्ले रा है,
“मैं तिन्हा लोक्कां बिच बसणा ते तिन्हा बिच चलणा-फिरणा,
मैं तिन्हेरा परमेश्वर होण ते से मेरे मणू होणे।”
17इस तांइ परमेश्वर पवित्रशास्त्र बिच असा जो बोलदे,
“अविश्वासी लोक्कां रे बिच का निकलो ते बखरे रेयो ते भिठ्ठी चीजां री अराधना मत करो,
तां मैं तुसा जो अपनाणा।
18ते मैं तुसा रा प्यो होणा ते तुसा मेरे बच्चे-बच्चियां होणे, ए सर्वशक्तिमान प्रभु परमेश्वर रा वचन है।”
Currently Selected:
2 कुरुन्थियों 6: CDHNT
Highlight
Copy
Compare
Share
Want to have your highlights saved across all your devices? Sign up or sign in
Chambeali Bible (चम्बयाळी बाइबिल) 2020 by The Love Fellowship is licensed under a Creative Commons Attribution-ShareAlike 4.0 International License.
