2 कुरुन्थियों 11

पौलुस ते झूठ्ठे प्रेरित

1मेरी चाह्‍त है कि जां मैं थोड़ी-मती बेवकूफी री गल्लां करदा, तां तुसा मेरे जो सहन करी लेयो। 2मैं भी तिय्यां ही तुसा री फिकर करदा जिय्यां परमेश्वर तुसा री फिकर करदे। किजोकी मैं तुसा जो मसीह यीशु जो सौंपणे रा इराद्दा कित्ते रा है। ए तिय्यां ही है कि जिय्यां इक्क प्यो अपणी कुंआरी कुड़ी जो तिसेरे लाड़े जो ब्याह का बाद सौंपी दिंदा। 3पर मैं डरदा कि जिय्यां शैतान ने कीड़े रे रुप बिच, अपणी चलाकी कने हव्वा #11:3 पूरी दुनिया री सबका पैल्ली जनानी।जो बैह्काया थिया, तिय्यां ही तुसा रे मन तिस सिधाई ते पवित्रता, जिस कने तुसा जो मसीह यीशु रा आदरमान करणा चाएदा, कुदखी भ्रष्ट नी कित्ते जाण। 4अगर कोई तुसा का आई करी यीशु रे बारे बिच गलत ही प्रचार करो, जे असा रे प्रचार का बखरा हो, या जे पवित्रात्मा तुसा जो पैल्ले का मिल्ले रा है, तिसेरे अलावा होर कोई आत्‍मा तुसा जो मिलदा, या जां तुसा कुसकी होर बसेख जो अपणाई लिंदे जे असा रे सुणाए रे बसेख का बखरा है, तां तुसा तिसजो अपनाणे बिच गलत हिन। 5मैं नी समजदा कि से झूठ्ठी शिक्षा दैणे वाले लोक, जे अप्पु जो बड़े बड्डे प्रेरित समजदे, मेरे का जादा बदिया हिन। 6भले ही मैं बोल-चाल अन्दर अनाड़ी है, पर मेरे जो ज्ञान री कमी नी है; बल्कि मैं तुसा जो हर बेल्ले ते हर तरिक्के री हालात बिच शिक्षा दैणे रे जरिये इस गल्ल जो साबित कित्ते रा है।

7मैं तुसा जो आदर दैणे तांइ अप्पु जो दीन-हीन बणाई करी ते कुसकी का बगैर किच्‍छ लित्ते, तुसा लोक्कां बिच परमेश्वर रे सुब बसेख रा प्रचार कित्तेया। इस गल्ल बिच मेरी कोई गलती नी है। 8मेरे जो होर कलीसियां रे विश्वासियां का आर्थिक मदद मिल्ली ताकि मैं तुसा बिच सेवा करी सकां। तुसा इय्यां नी बोल्ली सकदे से करणा गलत थिया। 9ते जिस बेल्ले मैं तुसा कने थिया ते मेरे जो पैसे री कमी होई, तां मैं कुसकी पर भार नी पाया, किजोकी विश्वासी भ्यालां ने मकिदुनिया प्रदेश का आई करी मेरे कमी जो पूरा कित्तेया, ते मैं हर गल्ल बिच अप्पु जो तुसा पर भार बणने का रोक्केया, ते तिय्यां ही रोक्की रैह्णा। 10जिस सच्चाई कने मैं तुसा जो मसीह रे बारे बिच दसदा तिय्यां ही मैं तुसा जो बोलदा कि अखाया प्रदेश बिच का कुसकी ने भी मेरे जो इस गल्ल पर गर्व करणे का रोक्की नी सकणा, कि मैं कदी तिन्हा बिच का कुसकी का आर्थिक मदद नी लित्ती। 11मैं किजो कदी पैसे नी लित्ते? कै इधेरे तांइ तुसा का दान नी लित्ता कि मैं तुसा कने प्यार नी रखदा? पर परमेश्वर ए जाणदे कि मैं तुसा कने प्यार रखदा।

12पर मैं तुसा का कदी दान नी लैणा, ताकि दूज्जेयां जो इस गल्ल बिच घमंड करणे रा मौक्का ना मिल्ले कि तिन्हा ने भी तिस्सी तरिक्के कने सेवा करदे जिय्यां असी करदे। 13इदेय मणू झूठ्ठे प्रेरित हिन। से मणू मसीह रे प्रेरितां रे भेस बिच ठग्गी रे कम्म करणे वाले मणू हिन। 14पर ए कोई हैरानी वाली गल्ल नी है! किजोकी शैतान ता अप्पु भी परमेश्वर रे स्वर्गदूत रे भेस बिच रैहन्दा। 15इधेरे तांइ इस गल्ल बिच कोई हैरानी नी है कि शैतान रे दास भी परमेश्वर री सेवा करणे वालेयां रे भेस बिच आंदे। तिन्हेरे कम्मां रे हिसाब कने तिन्हेरा खातमा होई जाणा।

मसीह तांइ दु:ख उठाणा

16मैं फिरी बोलदा कि कोई ए मत समझो कि मैं बेवकूफ है, पर भले ही तुसा इय्यां सोचदे भी हुंगे, ते जां मैं इय्यां घमंड भी करां, तां मेरे जो इक्क बेवकूफ समजी करी ही मेरी गल्लां जो सुणी लेया करो। 17पर मेरा इय्यां बेधड़क होई करी गल्ल करणा परमेश्वर रे पास्से का नी है, पर मैं इक्क बेवकूफ मणू सांई गल्ल करेया करदा है। 18हालांकि जिय्यां मते मणू इस दुनिया रे लोक्कां सांई घमंड करदे, तिय्यां ही मैं भी घमंड करदा। 19तुसा अप्पु जो समजदार समजी करी, खुसी-खुसी बेवकूफ मणूआं री गल्लां सही लिन्दे। 20किजोकी जां तुसा जो कोई नौक्कर बणाई लिन्दा, या लुट्टी लिंदा, या फसाई लिन्दा, या अप्पु जो बड्डा समजदा, या तुसा रे मुँह पर चंड मारदा, तां तुसा सही लिन्दे। 21असा जो तुसा कने तिय्यां बर्ताव करणे री हिम्मत नी होई, किजोकी तिय्यां करणे बिच मेरे जो बड़ी शर्मिंदगी हुंदी। पर जे अगर कोई मणू कुसकी गल्ल बिच घमंड करणे री हिम्मत करदा, तां मैं भी इक्क बेवकूफ मणू सांई बोलदा, कि मैं तिस गल्ल बिच घमंड करणे री जादा हिम्मत रखदा। 22कै से इब्रानी मणू हिन? मैं भी इब्रानी मणू है। कै से इस्राएली मणू हिन? मैं भी इस्राएली मणू है। कै से अब्राहम रे वंश रे हिन? मैं भी अब्राहम रे वंश रा है। 23कै से ही मसीह यीशु री सेवा करणे वाले मणू हिन? मैं बोलदा कि मैं तिन्हा का बधी करी है! मैं पागल मणू सांई बोलदा कि मैं तिन्हा का जादा मैहनत कित्ते री है, मैं तिन्हा का जादा कैद होए रा है, मैं तिन्हा का जादा कोड़े खाए, ते मैं तिन्हा का जादा मौत रे खतरे बिच पेरा है। 24यहूदी अधिकारियां ने मेरे जो पांज वरी उन्ताली-उन्ताली कोड़े लगवाये। 25त्रै वरी मेरे जो डंडे कने कुट्टेया गेया। इक्क वरी मेरे जो बट्टे मारे गे। त्रै वरी ता जिन्हा जहाज पर मैं सफर कित्तेया थिया, से टुटी गे। इक्क वरी ता पूरा दिन ते रात ता मैं समुन्द्र बिच ही कट्टी। 26मैं घड़ी-घड़ी यात्रा अन्दर दरिया रे जोखिमां अन्दर, ड़ाकुआं रे जोखिमां अन्दर, अपणी जात वाले मणूआं रे जोखिमां अन्दर, गैर यहूदियां रे जोखिमां अन्दर, सहरां रे जोखिमां, अन्दर बणां रे जोखिमां अन्दर, समुन्दर रे जोखिमां अन्दर, झूठे विश्वासियां रे मझाटे जोखिमां अन्दर रेया। 27मैहनत ते दुख अन्दर, घड़ी-घड़ी जागदे रैह्णे बिच ते भूख्ख-प्यास बिच भी रेया ते सर्दी बिच बगैर निग्गे कपड़े रे भी रेया। 28इन्हा गल्लां रा ता मैं जिकर नी करदा, पर इन्हेरे अलावा सबणी कलीसिया री फिकर रोज मेरे जो खाया करदी है। 29जां कोई विश्वासी भ्याल कमजोर महसूस करदा, तां मैं भी कमजोर महसूस करदा। जां कोई मणू पाप री जिन्दगी बिच फिरी हटी जांदा, तां मेरे जो बड़ा दुख हुंदा। 30अगर घमंड करणा जरुरी है, तां मैं अपणी कमजोरी री गल्लां पर घमंड करणा। 31परमेश्वर, असा रे प्रभु यीशु मसीह रे पिता, हमेसा धन्न हिन, ते से जाणदे कि मैं झूठ नी बोलदा। 32दमिश्क सहर बिच, अरितास राज्जे रे राज्यपाल ने मेरे जो पकड़ने तांइ दमिश्क सहर पर पैहरा बिठाई रख्खे रा थिया, 33पर मेरे जो टोकरे बिच खिड़की रे रस्ते का सहर री दुआल का उतारेया गेया, ते तिस हाकिम रे हत्थां का बची निकलेया।

Currently Selected:

2 कुरुन्थियों 11: CDHNT

Highlight

Copy

Compare