जकर्या 9
9
होरी देशा लै चतैनगी
1अह आसा बिधातो समाद:
बिधाता हआ सोभी मणछा भाल़अ लागअ द,
खासकर हआ तेऊए नदर इज़राईले सोभी गोत्रा प्रैंदै।
तैही दैनी बिधाता हद्राक देश अर
तेते राज़धानी दमिश्क नगरी लै चतैनगी।
2बिधाते अह चतैनगी आसा हद्राक देशे सिऊंआं दी हमात नगरी लै बी।
सूर अर सदोन नगरीए लोग आसा च़लाक,
पर बिधाता दैआ तिन्नां लै बी चतैनगी।
3सूर नगरी आसा आप्पू फेर गहल़ च़िणअ द,
सुन्नैं-च़ंदीए आसा तिन्नैं धूल़ै माट्टै ज़िहै रूल़ डाहै दै लाई!
4पर मालक बिधाता करनी इना का सोभै गल्ला दूर!
तिन्नें शोभा शान शोटणी तेऊ समुंदरै अर
खिरी हणीं सूर नगरी दझ़ी खतम।
5अशकलोन नगरीए लोगा छ़ुटणअ इना गल्ला हंदी भाल़ी डरै दर्छ़णअ,
अक्रोनी लोगा उझ़णीं इहअ भाल़ी दाहे झोशा।
इहअ ई हणअ एशकोल नगरी लै अर तिन्नों चुटणअ हैअ ई।
गाज़ा नगरीओ राज़अ पाणअ मारी अर
एशकोल नगरी हणीं बाख शुन्नीं अर उज़र।
6अशदोद नगरी बस्सणै बर्णसंकर ज़ातीए मणछ।
बिधाता बोला, “पलिश्ती लोगो घमंड करनअ मुंह खतम।
7तिन्नें खाखा का करनीं मुंह लोधल़ै आल़ी शिखा दूर,
अर तिन्नें दांदा का काढणीं मुंह छ़ोतली च़िज़ा पोर्ही,
तेखअ हणैं पलिश्ती लोग बी इज़राईली ज़िहै मुंह परमेशरे परज़ा।
तिंयां हणैं यहूदा गोत्रा ज़िहै शुचै।
अक्रोन नगरीए मणछ बी रल़णैं जबेशी ज़िहै मेरी परज़ा जैंदरी।
8मुंह करनी आपणीं ज़ैगे फाज़त अर
एसी बाती हांढणै का डाहणैं मुंह दुशमण दूर,
ज़ुल्म करनै आल़ै निं मुंह मेरी परज़ा हंतणैं दैणअ।
मंऐं हेरअ भाल़ी कि मेरी परज़ा किहै-किहै दाह-दुख ज़िरै।
सियोन ज़ुंण आजू राज़अ हणअ
9“एरुशलेम नगरीए लोगो, खुशी मनाऊंआं संघा करा ज़ै-ज़ैकार!
थारअ राज़अ गअ ज़िती, सह एछणअ तम्हां सेटा लै।
सह आसा धर्मीं तेऊ करनअ थारअ उद्धार।
सह आसा शरीफ अर तेऊ करनी गाधे शुंआरी,
सह एछणअ गाधीए बच्च़ै प्रैंदै बेशी।
10तेऊ करनै एप्रैम मुल्खै जुधे रथ दूर,
एरुशलेम नगरी जुधे घोल़ै खतम।
जुधे धणश पाणै तेऊ चोल़ी।
तेऊ करनअ सोभी देशै मेल़-ज़ोल़ अर
तेऊओ राज़ हणअ मांझ़ समुंदर, खार समुंदर
अर फरात दरैऊए दखण सिऊंआं अर पृथूईए पुंझ़ै तैणीं।”
11बिधाता बोला इहअ, “एरुशलेम नगरीए मेरी परज़ा!
मेरी करार आसा तम्हां संघै बल़ीदाने लोहू करै पाक्की किई दी।
तैही करनै मंऐं तम्हैं गलामी का आज़ाद
ज़ुंण तम्हां लै शुक्कै कुहे कैद आसा ती।
12ज़ुंणीं तम्हैं हैअ ई आसा चोल़ी हेरअ द,
ज़ेतरै तम्हैं आपणैं देशा लै फिरी एछणें आशा आसा,
तम्हैं एछा एरुशलेम नगरी आपणैं गहल़ा लै फिरी,
ऐबै बोला हुंह तम्हां लै, ‘ज़ेतरअ तम्हां का छ़ुटअ,
मुंह दैणअ तम्हां लै तेतो दुगणअ।’
13यहूदा आसा मुल्है मेरै धणशा ज़िहअ अर
एप्रैम आसा कतीरा ज़िहअ।
सियोन नगरीए मेरी परज़ा बणाणीं मुंह
यूनानी संघै जुधा लै तलबारा ज़ेही।”
बिधाता करनी आपणीं परज़े फाज़त
14मालक बिधाता निखल़णअ आपणीं परज़ा प्रैंदै बादल़ा ज़िहअ,
तेऊए कतीर च़मकणै बिज़ल़ी ज़िहै,
तेऊ बाज़णअ आपणअ नर्शिंगअ,
संघा एछणअ दखणा बाखा कुर्लू बागरीए ढिश-डुआल़ै ज़िहअ।
15बिधाता ज़ुंण स्वर्गे सारी सैनो मालक आसा,
तेऊ करनी आपणीं परज़े फाज़त।
तिन्नां करनै आपणैं दुशमण खतम।
तिन्नां पाणीं जुधा लै शराबी मणछा ज़ेही हाक्का।
दुशमणा का लाणीं तिन्नां लोहूए छेरा अर
सह हणअ बल़ीदान किऐ दै लोधल़ै ज़िहअ ज़ेता
प्रोहत प्रिहै करै बेदीए काछ़ा तरैल़ा।
16ज़ेभै अह बगत पुजणअ, तेभै बच़ाऊंणी बिधाता आपणीं परज़ा,
ज़िहअ फुआल आपणीं भेडे हेल़्हीए फाज़त करा।
तिंयां च़मकणै तेऊए हाथै किम्मती मणीं करै बणाऐं दै मुगटा ज़िहै।
17सह धैल़ी भाल़ केही भली अर शोभली हणीं!
ज़ुआन शोहरू खाणीं रज्ज़ी रोटी अर
ज़ुआन शोहरी रज्ज़णी दाखो रस झुटी।
Currently Selected:
जकर्या 9: OSJ
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
