जकर्या 11
11
1“लाबानोन, आपणीं प्रऊल़ी घुआल़!
ताकि आग भितरा लै एछे अर तेरै केल़ुईए बूटा दहई पाए।
2कैली लागी लेरा लांदी किल्हैकि केल़ुई ढूल़ी धरना लै,
बडै-बडै बूट हुऐ खतम,
बाशान मुल्खै महरूए बूटो, हिक्का पटाक्की लाआ लेरा
किल्हैकि दुशमणै पाऐ बण काटी।
3फुआल आसा हिक्का पटाक्की लेरा लांदै लागै दै,
किल्हैकि दुशमणै किई तिन्नें घैहणीं बरैबाद।
ज़ुआन सिह आसा क्रुंगदै लागै दै,
किल्हैकि जरदण नदीए बाढे डाल़-बूट निं ऐबै रहै।”
असली फुआल
4मेरै मालक बिधाता बोलअ मुल्है इहअ, “तूह बण इना भेडे हेल़्हीओ फुआल ज़ुंण काटणा लै आसा धाची दी। 5इने मालक काटा इना अर सज़ा बी निं तिन्नां भेटदी। तिंयां बेच़ा शिखा संघा बोला इहअ, ‘बिधातो शूकर हुअ! हाम्हैं हुऐ सेठ!’ इना भेडे फुआल बी निं इना लै झींण करदै।” 6बिधाता बोला इहअ, “एऊ देशे मणछ तै मेरी परज़ा, पर ऐबै निं तिंयां मेरी परज़ा आथी। ऐबै निं हुंह तिन्नां लै झींण करदअ। मुंह दैणैं आप्पै तिंयां तिन्नें दुशमणा का अर पराऐ देशे राज़ै का। तिन्नां करनअ अह देश खतम पर हुंह निं इना बच़ाऊंदअ एछणअ।”
7तेखअ लागअ हुंह भेडा-बाकरीए बपारी सेटा मज़दूरी करदअ, संघा रहअ तैहा हेल़्हीओ फुआल ज़ुंण भेडा-बाकरी काटणा लै आसा ती डाही दी। हुंह लागअ तिन्नां भेडा-बाकरी च़राऊंदअ। मंऐं डाही आप्पू का दूई शोठी, एकी शोठी नाअं डाहअ, “क्रिप्पा” अर दुजी शोठी नाअं डाहअ, “एकता।” तेता करै लागअ हुंह भेडा-बाकरी च़राऊंदअ। 8एकी भिन्नैं भितरी काढै मंऐं तिन्नें चअन फुआल दरल़ाऊई, तिंयां निं मुंह च़ाहंदै तै अर हुंबी निं तिन्नां लै सबर करी सकदअ त।
9खिरी बोलअ मंऐं हेल़्ही लै इहअ, “मुंह निं तम्हां फुआल रहणअ। ज़हा मरनअ सह लागे मरदअ, ज़हा हेल़्ही का टल़णअ सह लागे टल़दअ। ज़ुंण बच़े, तिंयां खाए आप्पू मांझ़ै एकी-दुजै।”
10तेखअ च़की मंऐं सह शोठी ज़हा नाअं “क्रिप्पा” आसा त, संघा पाई मंऐं सह चोल़ी। तेतो मतलब हुअ इहअ कि ज़ुंण करार बिधाता सोभी देशा संघै किई ती, सह हुई खारज। 11इहअ करै हुई तैहा धैल़ी बिधाते करार खारज। भेडा-बाकरीए हेल़्हीए बपारी रहै मेरै मुंहां भाल़ै लागी। एतरअ थिअ तिन्नां का थोघ कि अह आसा बिधातो हुकम।
12तेखअ बोलअ मंऐं तिन्नां लै, “ज़ै तम्हां का ठीक ज़ाण्हिंआं, तै दैआ एभी मेरै कामें मज़दूरी, ज़ै नांईं, तै डाहा तेता आप्पू का।” खिरी दैनै तिन्नैं तोली करै च़ंदीए तिह सिक्कै मुल्है मेरी मज़दूरी।
13तेखअ बोलअ बिधाता मुल्है, “तूह शोट इना तिह च़ंदीए सिक्कै भबने भढारै।” तिन्नैं सोठअ इहअ कि ईंयां ढब्बै बी दैनै मुल्है तिन्नैं खास्सै! मंऐं निऐं तिंयां तिह च़ंदीए सिक्कै संघा शोटै मंऐं तिंयां बिधाते भबने भढारै।
14तेखअ च़की मंऐं सह दुजी शोठी ज़हा नाअं “एकता” थिअ। सह बी पाई मंऐं चोल़ी। तेतो मतलब हुअ इहअ कि यहूदा अर इज़राईल मुल्ख ज़ुंण आप्पू मांझ़ै भाई-बंध आसा, तिन्नां पल़ी फूट।
15तेखअ बोलअ मुल्है बिधाता, “ऐबै च़क तूह भिई फुआले चाण संघा कर इहअ दखाअ कि तूह आसा बेघै ज़ैऊंकर फुआल। 16मुंह लाअ एऊ देशा लै एक इहअ फुआल डाही, तेऊ नां तिन्नां भेडो फिकर हणअ ज़ुंण काटी लाई अर नां तेऊ हेल़्ही का टल़ी दी भेडा लोल़ै डेऊणअ। नां तेऊ ज़खमी भेडे लाज़-पुआई करनी अर नां भुखी भेडा आजू घाह-पाच दैणअ। तेऊ खाणअ मोट्टी-मोट्टी भेडो मास्स अर तेऊ निं तिन्नें छ़ल़ू बी छ़ाडणैं।
17मेरै ज़ैऊंकर फुआला, ताल्है आसा लानत!
ज़ुंण मेरी हेल़्ही शोटी डाहा, तेऊए लोल़ी तलबारा करै बाहा काटी!
तेऊए दैहणीं आछी लोल़ी दुखणैं निखल़ै।
तेऊए बाहा लोल़ी बाख शुक्की अर
तेऊए दैहणीं आछ लोल़ी पठी फुटी।”
Currently Selected:
जकर्या 11: OSJ
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
