भज़न 45
45
बैहे गिह
गाज़ै-बाज़ै आल़ेए सैणैं लै, शोशन्नीम ज़ैगा कोराह खिंबा आल़ेए खास बैहे गिह
1ज़ांऊं हुंह राज़े बारै गिह सोठा,
मेरअ दिल हआ बडी बित्ती-बित्ती गल्ला करै भरी।
मेरी ज़िभ हआ सज़ाण काईथे कलमा ज़ेही
गिहा बोल़णा लै तैर।
2ताह ज़िहअ हेरनअ बित्तअ निं मणछा मांझ़ै कोहै आथी,
तेरै होठा का निखल़ा मिठै बोल।
तैही दैआ परमेशर ताल्है सदा बर्गत।#लूक. 4:22; इब्रा. 1:3-4
3ए शूरबीरा! तूह च़क आपणीं तलबार,
तूह आसा महान अर प्रतप्पी राज़अ।
4तूह हअ आपणैं प्रतप्पे ज़िता दी शुंआर,
संघा कर सत्त अर नसाफे फाज़त!
तेरै बाहे बला करै जाणीं ताह महान ज़ीत भेटी।
5तेरै कतीर आसा तिछै,
तिंयां करा तेरै दुशमणे दिल छिझै,
देशा-देशे लोग पल़णै तेरै च़रणैं।
6परमेशरै ज़ुंण राज़ ताल्है दैनअ,
सह रहणअ जुगै-जुगै तैणीं सदा लै।
तूह करा आपणैं लोगा प्रैंदै नसाफ डाही राज़,
7तूह झ़ूरा भलै लै अर कदुष्ट कामां का आसा ताह नफरत।
तैही आसा तूह बिधाता, तेरै परमेशरै आप्पै छ़ांटअ द,
तेऊ किअ तेरअ होरी सोभी साथी का खास्सअ अदर
अर खुशीओ खास्सअ तेल तरैल़ी अभिषेक।
8तेरै च़ोल़ै दी आसा गंधरस, अगर अर तेजे बित्ती बास्स।
हाथी दांदा करै सज़ाऊऐ दै मैहलै लागा ताह तारा आल़ै बाज़ै शुणने मौज़।
9मशूर बेटल़ी संघै आसा तेरै मैहलै राज़े देई बी,
तेरी राज़गाद्दी दी दैहणीं बाखा आसा तेरी राणीं
च़ोखै सुन्नें किम्मती हार-शंगार बान्हीं खल़ी।
10ओ माहा राणीं, मेरी गल्ला शुण धैन दैई,
आपणैं नातै रिश्तैदारा अर पेऊकै आद करदी निं लागी।
11ऐबै आसा तूह राज़े राणीं,
ऐबै कर तिहअ, ज़िहअ राज़अ च़ाहा।
12सूर नगरीए सोभी सेठ मणछा आणनीं ताह सेटा लै भैंट,
परज़ा मांझ़ै बी करनी सोभी लोगा ताह खुश करने कोशिश।
13राज़े देई आसा मैहलै, सह भाल़ हेरनी केही बित्ती आसा!
तेसो घाघरै दी आसा सुन्नें धागै करै बूणती पाई दी।
14तेऊ बूणती आल़ै घाघरै बान्हीं आणी सह राज़ै सेटा,
तेसे कुंआरी साथणीं आसा तैहा पिछ़ू-पिछ़ू हांढदी लागी दी।
15तिंयां एछणी राज्ज़ी-खुशी
संघा डेऊणीं तिंयां राज़े मैहला भितरी।
16ताह मेरै राज़े हणीं खास्सी आद-लुआद,
तिंयां बी हणैं तिहै ई राज़ै ज़िहै तेरै दाद-बाब थिऐ।
ताह दैणअ तिन्नां लै धरती दी ज़ैगै-ज़ैगै राज़।
17मुंह गांठणी तेरी एही गिह कि तूह हणअ सदा लै मशूर,
देशा-देशे लोग रहणैं ताल्है जुगै-जुगै तैणीं शूकर करदै लागी।
Currently Selected:
भज़न 45: OSJ
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
