सैणीं गल्ला 30
30
आगूरै खोज़ी दी सैणीं गल्ला
1ईंयां सैणीं गल्ला आसा जाकेहे शोहरू आगूरै खोज़ी दी।
आगूरै बोलअ इतीएल अर उकाल़ा का इहअ,
2“हुंह आसा मणछा मांझ़ै डागै ज़िहअ,
अर मुंह निं मणछा ज़ेही सोर समझ़ ई आथी।
3मुखा नां अक्ल आथी अर
नां मुखा परम पबित्र बिधाते बारै ज्ञैन आथी!
4स्वर्गा लै उखल़ी उंधै कुंण होथअ?
बागरी कुंणी आसा आपणीं मुठी दी ढाकी डाही दी?
समुंदरो पाणीं कुंणी आसा शाट्टै दी झाल़ी डाहअ द?
अह एतरी बडी पृथूई कुंणी आसा बणाईं दी? तेऊ नाअं किज़ै आसा अर
तेऊओ शोहरू कुंण आसा?
ज़ै ताखा थोघ आसा, तै खोज़ा मुखा बी!
5परमेशरै ज़ुंण ज़बान दैनी, सह करा तैहा पूरी,
ज़ुंण तेऊए शरण लआ सह करा तेऊए ढाल़ बणी करै फाज़त।
6ज़ै तम्हैं तेऊए गल्ला छ़ाडी किज़ै होर खोज़े ज़ुंण तेऊ नां आथी बोली दी,#बधा. 4:2
तेऊ नैरनअ तम्हैं तेभी अर तेखअ हणीं अह गल्ला प्रगट कि तम्हैं आसा शल़ैघी।
होर सैणीं गल्ला
7हे बिधाता, मेरी आसा ताखा एही अरज़ कि
तूह लअ मेरै मरनै का आजी मुल्है दूई बअर दैई।
8हुंह लोल़ी पठी मानदार हुअ,
नां मुंह खास्सअ सेठ बणाईं अर नां खास्सअ गरीब।
मेरी लोल़ी सिधी हर धैल़ै ज़रुरत पूरी हुई।
9इहअ निं हआ कि हुंह रज्ज़ी करै ताह बिस्सरी पाए,
अर इहअ बी निं लोल़ी हुअ कि मुंह दाल़ज पल़े अर मेरै भलै किधी च़ोरी होए अर ताह बिधाते नाओंआं दी दाग लागे!”
10ज़ुंण दास होए, तेऊए बारै निं तेऊए मालका का घैंचल़ करनै,
इहअ निं हआ कि सह तम्हां लै फिटक दैए अर तम्हां बिधाता का सज़ा भेटे।
11कई मणछ हआ इहै बी ज़ुंण आपणैं बाबा लै फिटक दैआ
अर नां आपणीं ईजो शूकर करदै!
12इहै मणछ सोठा आप्पू लै इहअ कि तिंयां आसा आप्पू बाखा शुचै
पर तिन्नां दी आसा इहअ दाग ज़ुंण कधि निं धोअ!
13एकी पोस्तीए मणछ आसा इहै शरेरै, तिंयां सोठा इहअ कि तिंयां ई आसा भलै,
तिंयां सोठा कि तिंयां भाल़ किहै भलै निं आथी!
14तिन्नें दांद आसा तलबारा ज़िहै,
तिन्नें दाल़्हा आसा छ़ूरी ज़ेही!
तिंयां च़ाहा धरती का गरीब अर
खरी दी पल़ै दै लोगा होरी मणछा जैंदरा का खतम करनअ।
15ज़ोके हआ दूई शोहरी, तिंयां बोला, “होर दै होर दै!”
तेही ई आसा चअन च़िज़ा ज़ुंण कधि निं रज़दी।
एही च़िज़ा आसा च़ार पै
ज़ुंण कधि निं बोल्दी कि हुअ।
16जम्पर अर बांढी बेटल़ीओ ओदर,
शुक्की धरती लै पाणीं
अर आग निं कधि बोल्दी
कि ऐबै हुअ।
17ज़ुंण आपणैं बाबो सुहांग करा अर
बुढल़दा आपणीं ईजे कदर निं करदअ,
इहअ मणछ च़ोच़ल़णअ काअ-गरली अर
तेऊए आछी खरोप्पणी मुक्षरलै।
18चअन च़िज़ा आसा बेघै कठण,
एही आसा ईंयां च़ार गल्ला पै ज़ुंण मेरी समझ़ा का बागै आसा:
19सरगै डैअ दैंदै मुक्षरले बात,
दानुईंओ टोल्हा प्रैंदै हांढणअ,
समुंदरे पाणीं दी ज़हाज़े बात लोल़णी अर
मर्धा बेटल़ीओ एकी-दुजै लै झ़ूरनअ!
20च़ोरठू बेटल़ी बी हआ एही ई,
सह एछा होरी मर्धा संघै सुत्ती न्हैऊई-धोऊई संघा बोला इहअ,
“मंऐं निं किछ़ै कबध किअ!”
21चिई गल्ला करै लागा धरती काम्मणीं,
पर एही आसा च़ार पै ज़ुंण ज़ेता ज़िरी निं सकदी,
22गलाम मणछ राज़अ बणनअ
अर ऐडै मणछो पेट रज़णअ।
23कंज़री बेटल़ीओ बैह करनअ अर
गलाम डाही दी बेटल़ीओ आपणीं मालके ज़ैगा बेशणअ।
24पृथूई दी आसा च़ार होछ़ै ज़ीब पर तिंयां आसा बेघै अक्ली आल़ै:
25चिटा हआ बेघै होछ़ी पर
तिंयां रहा खरै दपहरै नाज़ा झाल़दी लागी।
26टाहरू मुश्शअ एही ता आसा होछ़अ ज़िहअ,
पर सह बणाआं शाफल़ा जैंदरी आप्पू लै मशेहर।
27रैट्टैओ निं कोहै राज़अ हंदअ,
पर तज़ी बी हांढा तिंयां एकी छ़ुंढा दी।
28छ़बाल़ ढाकणीं हआ सान,
पर तज़ी बी रहा तिंयां राज़े मैहलै।
29चअन ज़ीब आसा बेघै बित्तै,
एही आसा च़ार पै, तिन्नां हांढदै भाल़णेंओ लागा च़ाअ,
30सिह ज़ुंण सोभी ज़ीबा का बलबान,
सह निं कोही का डरदअ।
31मुर्गी आजू मुंडकी खल़ी करी हांढदअ मुर्गअ, अर बाकरी आजू बाकरअ
अर आपणीं परज़ा जैंदरी राज़अ।
32ज़ै तम्हैं एही ऐडी गल्ल किई कि तम्हैं लागै आप्पू सराहंदै आप्पै,
ज़ै तम्हैं किज़ै बूरी तरकीब बणाईं,
तै खल़्हणअ तिधी संघा लणअ बच़ार करी।
33किल्हैकि ज़िहअ दैंहीं छ़ाल्ली करै घिऊ अर
नाक मरोक्की करै नाथण निखल़ा,
तेही सका थारै कबल्लै रोश्शा करै आफ़त खल़ी हई।
Currently Selected:
सैणीं गल्ला 30: OSJ
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
