सैणीं गल्ला 18
18
1ज़ुंण मणछ होरी संघै निं रल़दअ, सह सोठा सिधअ आपणैं ई बारै,
होरी ज़ै भली गल्ल बी बोली, सह निं तेता बी मंदअ आथी।
2ऐडअ मणछ निं इहअ धैन डाहंदअ कि ज़ुंण गल्ल तेऊ बोली तेते समझ़ निं तेऊ आप्पू बी आथी,
पर लोगा सम्हनै फिरा सह होरी लै सलाह दैंदअ ताकि लोग तेऊ सराहे!
3बूरअ करी पल़ा शर्मिंदै हणअ,
ज़िधी अदर निं हंदअ, तिधी हआ बेइज़ती।
4मणछे बोल सका अक्लीओ मूल़ अर
समुंदरा ज़िहै डुघै अर ज़ाईरू पाणींए गाडा ज़िहै हई।
5कदुष्ट मणछो पक्ष लणअ अर
धर्मीं मणछो हक मारनअ निं भली गल्ल आथी।
6ज़ेभै ऐडअ मणछ हठ करा,
सह बोल़णीं तेऊ आप्पू लै ज़ोरा-ज़ोरी मारा खाणें आफ़त पाणीं।
7ऐडअ मणछ हआ आपणीं गल्ला करै बरैबाद,
तेऊए आपणीं ज़िभे बोल ई हआ तेऊ आप्पू लै फाही।
8घैंचल़ शुणने लागा मखीरा खाणैं ज़ेही मिठ,
तिंयां गल्ला पेटै हाज़म बी जाआ हई।
9कामां लै ज़ैंईं करनै आल़अ मणछ हआ
खरोल़ पाणै आल़ै मणछा ज़िहअ।
10बिधाता आसा उछ़टै कोटा ज़िहअ,
तेऊ सेटा डेऊई सका धर्मीं मणछ आफ़ता का बच़ी।
11सेठ सोठा इहअ कि तेऊ बच़ाऊआ तेऊए माया,
ज़ेही नगरी फेरा-फेर बडी उछ़टी दुआल नगरी बच़ाऊआ।
12बरैबाद हणैं का आजी एछा मणछा घमंड,
अदर हआ तेऊ ई मणछो ज़ुंण मानदार हुअ।
13बोल़णैं का आजी लणअ शूणीं,
ज़ुंण इहअ नांईं करदअ, तेऊ लै बोला सोभै ऐडअ, नां तेऊओ अदर हंदअ।
14ज़ै मणछा ज़िऊंणें च़ाह हुई, सह सका बमारी का बी ठीक हई,
पर ज़ै हैअ चोल़ी हेरअ, तै लागा मरने ई आशा डाहणीं।
15अक्ली आल़अ मणछ रहा,
हर बगत शिखल़दअ ई लागी।
16तम्हैं कै कहा खास या मशूर मणछा सेटा डेऊणअ च़ाहा?
तेता लै आसा सोभी का सान तरकीब भैंट दैणीं।
17दालता दी सोभी का आजी बोल़णैं आल़अ ज़ाण्हिंआं तेभै तैणीं शुचअ,
ज़ेभै तैणीं दुजै पक्षा आल़ै तेऊ का सुआल निं पुछ़ै।
18झ़गल़ैओ फैंसलअ सका परच़ी पाई खतम हई।
19आपणैं भाई-बंधे करनी मज़त करी, तिंयां सका थारी नगरी फेरे उछ़टी दुआली ज़ेही फाज़त करी,
पर तिन्नां संघै झ़गल़अ करी सका तम्हां लै तिन्नें दुआर सदा लै बंद हई।
20अक्ली आल़ै बोल रज़ैऊआ बधिया भोज़ना ज़िहै,
मोक्कै दी ठीक गल्ल करनी फरेऊआ शाह हरअ।
21ज़िभे बोल सका मारी बी अर तारी बी सका,
ज़ुंण गल्ला करना लै झ़ूरा, तेऊ लागा नतिज़अ बी भुगतणअ।
22ज़ुंणी बैह करी बेटल़ी आणी, सह लोल़ी तेऊ आप्पू लै बधिया च़ीच़,
ऐहा गल्ला का लागा इहअ थोघ कि बिधाता आसा तम्हां लै भलअ।
23गरीब मणछ करा हाथ ज़ोल़ी करै अरज़,
पर सेठ दैआ क्रुखअ हई ज़बाब।
24कई साथी करा एकी-दुजै बरैबाद,
पर असली साथी रहा तेऊ संघै आपणैं सक्कै भाई का बी खास्सअ मिल़ी-ज़ुल़ी।
Currently Selected:
सैणीं गल्ला 18: OSJ
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
