गणांई 7
7
बेदीए प्रतिष्ठा अर तिह-थैरे भैंट
1तेखअ ज़ांऊं मोसा बिधातो बसेरअ बणाईं मुक्कअ अर सारे समाने प्रतिष्ठा करी पबित्र मुक्कअ करी, बेदीए प्रतिष्ठा करी किई पबित्र। 2तेखअ आऐ इज़राईली सोभी गोत्रे सैणैं ज़ुंण गणांई करना लै छ़ांटै तै, 3तिन्नैं आणै छ़ह तराणैं अर बारा बल्द, एक बल्द हरेकी सैणैं अर दूई ज़ण्हैं साझ़ू एक तराणअ बिधाते पबित्र ज़ैगा लै भैंट।
4तेखअ बोलअ बिधाता मोसा लै, 5“इना च़िज़ा ढाक तूह इना का, ईंयां एछणी मेल़-ज़ोल़े खिम्भा दी कामैं, इना दै लेबीए हरेकी खिंबा दी तिन्नें कामें साबै बांडी।”
6मोसा दैनी सह बल्दे हेल़्ह अर तराणैं लेबी लोगा का। 7गर्शोनी टोली आल़ै लै दैनै तिन्नें कामें साबै दूई तराणैं अर च़ार बल्द, 8मरारी टोली आल़ै लै दैनै तिन्नें कामें साबै च़ार तराणैं अर आठ बल्द, ईंयां सोभै डेऊऐ हारण प्रोहते शोहरू ईतामारे हेस्सै दी। 9पर कहाती टोली आल़ै लै निं तेऊ किछ़ै दैनअ किल्हैकि तिन्नां लै आसा पबित्र च़िज़ा कान्हा च़कणैओ काम।
10ज़ांऊं बेदीए प्रतिष्ठा हुई, तेखअ आणी इज़राईली बारा सैणैं प्रतिष्ठे भैंट बेदी सेटा। 11तेखअ बोलअ बिधाता मोसा का, बेदीए प्रतिष्ठा लै दैऐ इज़राईली सैणैं बारा धैल़ै तैणीं हर धैल़ै आपणीं-आपणीं बारी दी भैंट।
12इहअ करै ज़ुंणी पैहली धैल़ी भैंट निंईं सह थिअ यहूदा गोत्रा मांझ़ै अमीनादाबो शोहरू नहशोन।
13तेऊ आणी डेढ किलू गर्की एक च़ंदीए डबरी अर एकी किलू गर्की एक लोहदी ईंयां दुहै थिऐ नाज़ बल़ी लै नाज़ा अर जैतूने तेला करै भरी।
14तेखअ दैनअ अमीनादाबे शोहरू नहशोनै आधअ किलू गर्कअ धूपा करै भरी सुन्नेंओ धनैरअ भैंट, 15हूम बल़ी लै एक बाछ़ू, एक गाभू, एकी सालो एक मिम्मूं, 16पाप बल़ी लै एक छ़ेल्हू, 17मेल़-ज़ोल़े बल़ी लै दूई बल्द, पांज़ गाभू, पांज़ बाकरै अर एकी-एकी साले पांज़ होछ़ै गाभू भैंट।
18दुजै धैल़ै आअ इस्साकार गोत्रो सैणअ सोहारो शोहरू नतनेल भैंट लई, 19तेऊ आणै डेढ किलू गर्की च़ंदीए एक डबरी अर एक किलू गर्की च़ंदीए लोहदी नाज़ बल़ी लै कणके पिठै अर जैतूने तेला करै भरै दै, 20संघा दैनअ सुन्नेंओ धूपा करै भरअ द धनैरअ, 21हूम बल़ी लै एक बाछ़ू, गाभू, एकी सालो मिम्मूं, 22पाप बल़ी लै एक छ़ेल्हू, 23मेल़-ज़ोल़े बल़ी लै दूई बल्द, पांज़ गाभू, पांज़ बाकरै भैंट।
24चिऊथै धैल़ै आअ ज़बलून गोत्रो सैणअ हेलोनो शोहरू एलीआब, तेऊ आणै 25डेढ किलू गर्की च़ंदीए डबरी, एक किलू गर्की च़ंदीए लोहदी नाज़ बल़ी दैणा लै जैतूने तेल अर कणके पिठै करै भरी दी, 26संघा दैनअ सुन्नेंओ धूपा करै भरअ द धनैरअ, 27हूम बल़ी लै एक बाछ़ू, गाभू, एकी सालो मिम्मूं, 28पाप बल़ी लै एक छ़ेल्हू, 29मेल़-ज़ोल़े बल़ी लै दूई बाछ़ू, पांज़ गाभू, पांज़ बाकरै अर पांज़ होछ़ै गाभू भैंट।
30च़ौथै धैल़ै आअ रूबेन गोत्रो सैणअ शदेऊरो शोहरू एलीसूर, तेऊ आणै, 31डेढ किलू गर्की च़ंदीए डबरी, एक किलू गर्की च़ंदीए लोहदी नाज़ बल़ी दैणा लै जैतूने तेल अर कणके पिठै करै भरी दी, 32संघा दैनअ सुन्नेंओ धूपा करै भरअ द धनैरअ, 33हूम बल़ी लै एक बाछ़ू, गाभू, एकी सालो मिम्मूं, 34पाप बल़ी लै एक छ़ेल्हू, 35मेल़-ज़ोल़े बल़ी लै दूई बाछ़ू, पांज़ गाभू, पांज़ बाकरै अर पांज़ होछ़ै गाभू भैंट।
36पांज़ूऐ धैल़ै आअ शमौन गोत्रो सैणअ शूरीशदाईओ शोहरू शलूमीएल, तेऊ आणै, 37डेढ किलू गर्की च़ंदीए डबरी, एक किलू गर्की च़ंदीए लोहदी नाज़ बल़ी दैणा लै जैतूने तेल अर कणके पिठै करै भरी दी, 38संघा दैनअ सुन्नेंओ धूपा करै भरअ द धनैरअ, 39हूम बल़ी लै एक बाछ़ू, गाभू, एकी सालो मिम्मूं, 40पाप बल़ी लै एक छ़ेल्हू, 41मेल़-ज़ोल़े बल़ी लै दूई बाछ़ू, पांज़ गाभू, पांज़ बाकरै अर पांज़ होछ़ै गाभू भैंट।
42छ़ऊऐ धैल़ै आअ गाद गोत्रो सैणअ दुएलो शोहरू एल्यासाप, तेऊ आणै, 43डेढ किलू गर्की च़ंदीए डबरी, एक किलू गर्की च़ंदीए लोहदी नाज़ बल़ी दैणा लै जैतूने तेल अर कणके पिठै करै भरी दी, 44संघा दैनअ सुन्नेंओ धूपा करै भरअ द धनैरअ, 45हूम बल़ी लै एक बाछ़ू, गाभू, एकी सालो मिम्मूं, 46पाप बल़ी लै एक छ़ेल्हू, 47मेल़-ज़ोल़े बल़ी लै दूई बाछ़ू, पांज़ गाभू, पांज़ बाकरै अर पांज़ होछ़ै गाभू भैंट।
48सातुऐ धैल़ै आअ एप्रैम गोत्रो सैणअ अमीहूदो शोहरू एलीशामा, तेऊ आणै, 49डेढ किलू गर्की च़ंदीए डबरी, एक किलू गर्की च़ंदीए लोहदी नाज़ बल़ी दैणा लै जैतूने तेल अर कणके पिठै करै भरी दी, 50संघा दैनअ सुन्नेंओ धूपा करै भरअ द धनैरअ, 51हूम बल़ी लै एक बाछ़ू, गाभू, एकी सालो मिम्मूं, 52पाप बल़ी लै एक छ़ेल्हू, 53मेल़-ज़ोल़े बल़ी लै दूई बाछ़ू, पांज़ गाभू, पांज़ बाकरै अर पांज़ होछ़ै गाभू भैंट।
54आठुऐ धैल़ै आअ मनिश्शे गोत्रो सैणअ पदासूरो शोहरू गमलिएल, तेऊ आणै, 55डेढ किलू गर्की च़ंदीए डबरी, एक किलू गर्की च़ंदीए लोहदी नाज़ बल़ी दैणा लै जैतूने तेल अर कणके पिठै करै भरी दी, 56संघा दैनअ सुन्नेंओ धूपा करै भरअ द धनैरअ, 57हूम बल़ी लै एक बाछ़ू, गाभू, एकी सालो गाभू, 58पाप बल़ी लै एक छ़ेल्हू, 59मेल़-ज़ोल़े बल़ी लै दूई बाछ़ू, पांज़ गाभू, पांज़ बाकरै अर पांज़ होछ़ै गाभू भैंट।
60नहुऐ धैल़ै आअ बिन्यामीन गोत्रो सैणअ गिदोनीओ शोहरू अबीदान, तेऊ आणै, 61डेढ किलू गर्की च़ंदीए डबरी, एक किलू गर्की च़ंदीए लोहदी नाज़ बल़ी दैणा लै जैतूने तेल अर कणके पिठै करै भरी दी, 62संघा दैनअ सुन्नेंओ धूपा करै भरअ द धनैरअ, 63हूम बल़ी लै एक बाछ़ू, गाभू, एकी सालो मिम्मूं, 64पाप बल़ी लै एक छ़ेल्हू, 65मेल़-ज़ोल़े बल़ी लै दूई बाछ़ू, पांज़ गाभू, पांज़ बाकरै अर पांज़ होछ़ै गाभू भैंट।
66दसुऐ धैल़ै आअ दान गोत्रो सैणअ अम्मीशदाईओ शोहरू आहीजेर, तेऊ आणै, 67डेढ किलू गर्की च़ंदीए डबरी, एक किलू गर्की च़ंदीए लोहदी नाज़ बल़ी दैणा लै जैतूने तेल अर कणके पिठै करै भरी दी, 68संघा दैनअ सुन्नेंओ धूपा करै भरअ द धनैरअ, 69हूम बल़ी लै एक बाछ़ू, गाभू, एकी सालो मिम्मूं, 70पाप बल़ी लै एक छ़ेल्हू, 71मेल़-ज़ोल़े बल़ी लै दूई बाछ़ू, पांज़ गाभू, पांज़ बाकरै अर पांज़ होछ़ै गाभू भैंट।
72गैर्हुऐ धैल़ै आअ आशेर गोत्रो सैणअ ओक्रानो शोहरू पगीएल, तेऊ आणै, 73डेढ किलू गर्की च़ंदीए डबरी, एक किलू गर्की च़ंदीए लोहदी नाज़ बल़ी दैणा लै जैतूने तेल अर कणके पिठै करै भरी दी, 74संघा दैनअ सुन्नेंओ धूपा करै भरअ द धनैरअ, 75हूम बल़ी लै एक बाछ़ू, गाभू, एकी सालो मिम्मूं, 76पाप बल़ी लै एक छ़ेल्हू, 77मेल़-ज़ोल़े बल़ी लै दूई बाछ़ू, पांज़ गाभू, पांज़ बाकरै अर पांज़ होछ़ै गाभू भैंट।
78बार्हूऐ धैल़ै आअ नप्ताली गोत्रो सैणअ एनानो शोहरू अहीरा, तेऊ आणै, 79डेढ किलू गर्की च़ंदीए डबरी, एक किलू गर्की च़ंदीए लोहदी नाज़ बल़ी दैणा लै जैतूने तेल अर कणके पिठै करै भरी दी, 80संघा दैनअ सुन्नेंओ धूपा करै भरअ द धनैरअ, 81हूम बल़ी लै एक बाछ़ू, गाभू, एकी सालो मिम्मूं, 82पाप बल़ी लै एक छ़ेल्हू, 83मेल़-ज़ोल़े बल़ी लै दूई बाछ़ू, पांज़ गाभू, पांज़ बाकरै अर पांज़ होछ़ै गाभू भैंट।
84बेदीए प्रतिष्ठा हणें बगती दैनी तेता लै इज़राईली सैणैं ईंयां च़िज़ा भैंट, मतलब बारा च़ंदीए डबरी, बारा च़ंदीए लोहदी अर बारा सुन्नें धनैरै। 85हरेक च़ंदीए डबरी थिई डेढ किलू गर्की अर च़ंदीए लोहदी थिई एक किलू गर्की। ईंयां सोभै च़ंदीए भांडै थिऐ ठाई किलू।
86सोभै सुन्नें धनैरै थिऐ देहुल़ किलू का थोल़ै घट। 87हूम बल़ी लै सोभै बाछ़ू हुऐ बारा, बारा गाभू, एकी-एकी साले बारा मिम्मूं, आपणीं-आपणीं नाज़ बल़ी संघी। संघा तै पाप बल़ीए बारा छ़ेल्हू।
88मेल़-ज़ोल़े बल़ी लै हुऐ सारै च़ौबी बाछ़ू, शाठ गाभू, शाठ बाकरै अर एकी-एकी साले शाठ गाभू।
89ज़ांऊं मोसा बिधाता संघै गल्ला करदअ मेल़-ज़ोल़े खिम्भा दी डेऊअ, तेऊ शूणैं शाजतीए मणशू प्रैंदै प्राश्ते ढक्कणा प्रैंदे दूई करूबा बाती बिधाते बोल ज़ुंण तेऊ संघै गल्ला करदअ थिअ लागअ द, मोसा शूणीं तिंयां सोभै गल्ला।
Currently Selected:
गणांई 7: OSJ
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
