गणांई 31
31
इज़राईली ज़ितै मिद्यानी का जुध संघा डेऊऐ जरदण नदी पार
1बिधाता बोलअ तेखअ मोसा लै इहअ, 2“ज़ुंण मिद्यानी लोगै इज़राईली संघै किअ, तूह लऐ आपणीं मौत हणैं का आजी तिन्नां लै सज़ा दैई तेतो बदल़अ लई।”
3तेखअ बोलअ मोसा इज़राईली मणछा लै, “बिधाता च़ाहा मिद्यानी लै सज़ा दैणीं, तम्हैं हआ जुध करना लै तैर ताकि हाम्हैं तिन्नां का तेतो बदल़अ लई सके ज़ुंण तिन्नैं बिधाता संघै किअ। 4इज़राईले हरेकी गोत्रा का लोल़ी एक-एक हज़ार मर्ध जुधा लै आऐ।”
5इज़राईले बारा गोत्रा का आऐ बारा हज़ार मर्ध ज़ांऊं तिंयां जुधा लै शस्त्र लई तैर्हुई मुक्कै, 6तेखअ छ़ाडै मोसा तिंयां जुधा लै अर एलीआजर प्रोहतो शोहरू पिनहास डेऊअ तिन्नां संघै, तेऊ निंयैं आप्पू संघै मेल़-ज़ोल़े खिम्भा का नर्शिंगै, ताकि तिन्नां बाज़ी करै जुधा करनैओ शारअ करी सके।
7इज़राईली किअ मिद्यानी संघै जुध ज़िहअ बिधाता मोसा लै हुकम किअ त, तिन्नैं पाऐ तिन्नें सोभ मर्ध मारी, 8तिन्नां संघै पाअ तिन्नैं बोरो शोहरू बलाम अर एबी, रकेम, सूर, हूर अर रेबा नाओंए पांज़ राज़ै बी तलबारा करै मारी।
9इज़राईली किऐ मिद्यानी लोगे लान्हैं-सुन्हैं अर बेटल़ी कैद अर तिन्नें डागै-चैणैं, ऊँट, गाधै-घोल़ै अर सारी ज़ैदात लुटी पठी। 10संघा पाऐ तिन्नें नगरी, गराअं अर डेरै आग चैल़ी पठी दहई।
इज़राईली फिरै जुध ज़िती बापस
11इज़राईली निंईं मिद्यानी मणछे लोगे बेटल़ी-माठै, डागै-धअण अर सारी ज़ैदात लुटी।
12-13तेखअ फिरै तिंयां मोआब अराबा रेगीस्तानै जेरिहो नगरी नेल़ जरदण नदीए बाढै पार बाखा आपणैं डेरै लै। तिधी आऐ मोसा, एलीआजर प्रोहत अर होर इज़राईली टोलीए सैणैं तिन्नां सेटा लै ओर्ही बाता तैणीं तिन्नें सुआगत करना लै।
14ज़ांऊं मोसा तिन्नां इज़राईली सैने तिन्नां सैनापति अर दलपति संघै तिंयां मोआबी बेटल़ी भाल़ी, सह हुअ रोश्शै तिन्नां लै लाल-पिंऊंल़अ, संघा लागअ इहअ बोल्दअ, 15“तम्हैं ईंयां बेटल़ी किज़ू लै डाही ज़िऊंदी? 16ईंयां आसा तिंयां ई बेटल़ी ज़ुंणी बलाम गूरे सलाह लई धोखै करै हाम्हां इज़राईली टोलीए लोग बाल-पोर देअए पूज़ा करदै शादै। तैही पाई ती बिधाता हाम्हां जैंदरी मरी अर म्हारै मूंऐं तै खास्सै मणछ!#गण. 25:1-9 17तम्हैं पाआ ऐबै इना शोभी शोहरू अर ज़ेतरी बेटल़ी कहा मर्धा संघै सुत्ती आसा गई दी, इना सोभी मारी। 18पर ज़ुंण शोहरी कुंआरी आसा, तिन्नां सका तम्हैं आप्पू लै ज़िऊंदी डाही।”
19तेखअ बोलअ मोसा तिन्नां सोभी सपाही लै, “तम्हां मांझ़ै ज़ुंणी-ज़ुंणी मणछ या ज़ीब मारै या मुल्दअ छ़ुंअ, तिंयां आसा छ़ोतलै अर तिंयां सोभै रहा साता धैल़ी तैणीं खिम्भे सारै डेरै का बागै। तिन्नां बेटल़ी बी डाहै आप्पू संघै बागै ज़ुंण तम्हैं कैद करी आसा आणी दी, तेखअ लऐ चिऊथी अर सातुई धैल़ी तम्हैं सोभै शुचै हणैंओ बधान पूरअ करी। 20आपणैं सोभी झिकल़ै-टाल्है धोई, अर ज़ेतरी बी खाल, शेली अर काठे च़िज़ा आसा तिन्नां करै धोई करै शुची।”
21-23तेखअ बोलअ एलीआजर प्रोहतै तिन्नां सोभी सपाही मर्धा लै, “सुन्नैं, च़ंदी, कांस्सै, लोहै, टीन अर शिश्शे च़िज़ा ज़ुंण आगी दी नांईं दझ़दी, तिन्नां करै आगी जैंदरी पाई शुची। आगी जैंदरा का बागै काढी तेता पाणीं छ़ल़िकी करै छ़ोता का शुची। बाकी होरी च़िज़ा करै पाणीं छ़ल़िकी करै शुची। एता करै तिहअ ई ज़िहअ बिधाता मोसा लै हुकम आसा किअ द कि एऊ बधाने साबै करै शुधी। 24ज़ांऊं तम्हैं सातुई धैल़ी न्हैऊई अर सारै झिकल़ै-टाल्है धोई हेरे, तेखअ हणैं तम्हैं शुचै अर तेखअ सका सोभै आपणैं-आपणैं डेरै लै बापस डेऊई।”
मिद्यानी लोगे लुटी दी च़िज़े बांडणी
25बिधाता खोज़अ मोसा का इहअ, 26-27“ज़ुंण च़िज़ा इनै मिद्यानी का लुटी आणी, तिन्नां गण गाऊई-बल्द, भेडा-बाकरी, गाधै, ऊँट अर मणछा संघी। तेखअ दै तिन्नां सपाही अर इज़राईली टोलीए होरी लोगा लै आधअ-आधअ बराबर बांडी। एऊ कामां करना लै करनी एलीआजर प्रोहता अर इज़राईली सैणैं तेरी मज़त।
28-29“तेखअ ज़ुंण आधअ भाग सैने बांडै आअ, सह च़ाऐ मणछ होए या डागै-चैणें हेल़्ही, गाधै या होर पशू होए, तेता का डाहै गणी करै हर पांज़ा शौआ बाद एक मुंह बिधाता लै ज़ुदअ संघा दैऐ तेता एलीआजर प्रोहता लै। 30तेखअ ज़ुंण आधअ होरी इज़राईलीए बांडै आअ, सह च़ाऐ मणछ होए या डागै चैणें हेल़्ही, गाधै या होर पशू होए, तेता का डाहै गणी करै हर पज़ाह बाद एक ज़ुदअ संघा दैऐ तेता लेबी गोत्रे लोगा लै ज़ुंण मेल़-ज़ोल़े खिम्भे च़ाकरी करा।”#गण. 31:42-47; गण. 3:7,8,25,31,36
31ज़िहअ बिधाता बोलअ, मोसा अर एलीआजर प्रोहतै किअ तिहअ ई। 32-35तिन्नैं गणी तिंयां सोभै गल्ला ज़ुंण मिद्यानी का लुटी आणी ती। ज़ुंण च़िज़ा तिन्नैं सपाही पैहलै ई आप्पू लै आणी ती लुटी, तेता का लाऊआ थिई, 675,000 भेडा-बाकरीए हेल़्ह, 7,200 गाऊई-बल्द, 6,1000 गाधै-गाधी, 32,000 ज़ुआन कुंआरी शोहरी।
36-47सारी हेल़्हीए आधै 337,500 भेडा बाकरी, 36,000 गाऊई-बल्द, 30,500 गाधै-गाधी अर 16,000 ज़ुआन कुंआरी शोहरी ज़ुंण जुधा करनै आल़ै सपाही लै बांडी दैनी, तेता का डाही मोसा गणी करै 675 भेडा-बाकरी, 72 गाऊई-बल्द, 61 गाधै-गाधी अर 32 ज़ुआन कुंआरी शोहरी बिधाता लै ज़ुदी, संघा सभाल़ै तिंयां एलीआजर प्रोहता का।
तेखअ ज़ुंण आधी बांड इज़राईली टोली लै दैनी, तेता का डाहै तिन्नैं सोभी मणछ अर पशू मांझ़ा का गणी करै हर पज़ाह बाद एक ज़ुदअ, ज़िहअ बिधाता तिन्नां लै हुकम किअ त। संघा दैनै तिंयां लेबी गोत्रे लोगा लै।
48तेखअ आऐ इज़राईली सैने सैनापति अर दलपति मोसा सेटा, संघा लागै इहअ बोल्दै, 49“ज़ेतरै आदमीए सैना हाम्हां संघै जुधा लै डेऊऐ तै, हाम्हैं गणै तिंयां सोभ, तिन्नां मांझ़ै निं एक बी घटअ। 50एता लै च़ाहा हाम्हैं इहअ कि ज़ुंण सुन्नें मुंदल़ी, बाल़ू, सनांगणूं अर ज़ेतरै बी गैहणैं हाम्हैं मिद्यानी का लुटी आणै, तिंयां करनै हाम्हां म्हारै ज़िऊंदै रहणें बदल़ै बिधाता लै भैंट, ताकि सह सदा म्हारी फाज़त करे।”
51मोसा अर एलीआजर प्रोहतै ढाकै तिंयां बिधाता लै भैंट किऐ दै सारै सुन्नें गैहणैं सैनापति अर दलपति का ओर्ही। 52तिंयां सारै गैहणैं निखल़ै पठी तोली करै दूई शौ किलू। 53ज़ुंण सुन्नें गैहणैं तिन्नैं सोभी सपाही मिद्यानी का लुटी आप्पू लै पैहलै ई थिऐ डाहै दै तिंयां थिऐ एता का लाऊआ।#गण. 31:32; बधा. 20:14
54तेखअ डाहअ सह सारअ सुन्नअ मोसा अर एलीआजर प्रोहतै मेल़-ज़ोल़े खिम्भा भितरी बिधाता सेटा तैहा गल्ले आदगारी कि इज़राईली लै किज़ै आसा हुअ द।
Currently Selected:
गणांई 31: OSJ
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
