गणांई 19
19
शुचै हणैंओ बधान
1बिधाता खोज़अ मोसा अर हारणा का इहअ बधान, 2“इज़राईली का खोज़ इहअ कि लाला-भौंरै रांगे छ़ुहाण आणै मुंह सेटा लै ज़ेथ किछ़ै खोट निं होए अर ज़हा करै खेचै खहल़ै किछ़ै काम निं होए किअ द। 3मोसा दैऐ तैहा छ़ुहाणा एलीआजर प्रोहता का, सह निंयैं तैहा खिम्भे बसती बागै संघा बझ़ैल़ै तैहा तिधी कहा का एलीआजर प्रोहता नदरी बल़ी करनै। 4तेते लोहू दी गुंठी डबेऊई करै छ़ल़िकै एलीआजर प्रोहत तेऊ लोहू मेल़-ज़ोल़े खिम्भा बाखा साता बारी। 5तेखअ तिधी ज़ुंण तेऊ संघै होर होए तिन्नां मांझ़ै पाऐ एक ज़ण्हअ तैहा छ़ुहाणे खाल, टूंड-मूंड, लोहू अर आंजा-पोटा संघी पठी दहई। 6प्रोहत पाऐ केल़ुईए शोली, ज़ुफे डाल़ी अर लाला रांगो शाट्टअ तैहा आगी जैंदरी।#इब्रा. 9:19
7“एता बाद लऐ प्रोहत न्हैऊई अर आपणैं झिकल़ै धोई। तेखअ सका सह बसती लै बापस डेऊई, पर तज़ी बी रहणअ सह उडै तैणीं छ़ोतलअ। 8ज़ुंणी सह छ़ुहाण आगी जैंदरी दहई सह बी लऐ न्हैऊई अर आपणैं झिकल़ै धोई अर सह बी रहणअ उडै तैणीं छ़ोतलअ।
9“तेखअ ज़ुंण मणछ शुचअ होए सह झाल़ै तेऊ छ़ारा, संघा शोटै बसती बागै किधी शुची ज़ैगा। सह छ़ार हणअ इज़राईली टोलीए सोभी लोगा लै पाणीं जैंदरी राल़ी करै पाप करने छ़ोता का शुचै हणां लै।#इब्रा. 9:13 10तेखअ ज़ुंणी सह छ़ार झाल़अ, सह बी लऐ तेता बाद न्हैऊई अर आपणैं झिकल़ै धोई, पर उडै तैणीं रहणअ सह छ़ोतलअ। अह बधान आसा इज़राईली अर तिन्नां मांझ़ै बस्सै दै परदेसी दुही लै अर एता करै पोस्ती दर पोस्ती इहअ ई।
मुल्दै छ़ुंहीं करै शुचै हणैंओ बधान
11“ज़ै कुंण मणछ मुल्दअ छ़ुंए, सह रहणअ साता धैल़ी तैणीं छ़ोतलअ। 12पर ज़ै सह मणछ चिऊथी अर सातुई धैल़ी छ़ुहाणे छ़ार राल़ै दै पाणीं करै न्हैईए, तेखअ हणअ सह मणछ शुचअ। ज़ै सह इहअ नांईं करे, तै रहणीं तेऊ दी छ़ोत लागी। 13ज़ै कुंण मणछ मुल्दै छ़ुंहीं करै, ऐहा बिधीए साबै आप्पू शुचअ निं होए, तेऊ लै लागणअ मुंह बिधाते पबित्र ज़ैगा छ़ोत लाणैंओ दोश किल्हैकि सह निं छ़ोता का शुचै करनै आल़ै छ़ुहाणे छ़ार राल़ै दै तेऊ पाणीं करै न्हैऊअ! सह मणछ निं तेखअ मेरै इज़राईली मणछा जैंदरी रहणैं जोगी आथी।
14“ज़ै कुंण मणछ डेरै दी मरे, तिधी ज़ेतरै मणछ होए अर ज़ेतरै बादा का होर डेओए, तिंयां सोभै रहणैं साता धैल़ी तैणीं छ़ोतलै। 15तेऊ डेरै दी ज़ेतरै भांडै प्रैंदै डोरी बान्हीं ढक्कण नांईं होए लाअ द, तिंयां भांडै बी हणैं छ़ोतलै।
16“ज़ै कुंण मणछ डेरै का बागै कहा मारै दै मणछे ल्हास, आपणीं मौता मूंऐं दै मणछा, कहा मणछो हाडकअ या तैहा घोरी छ़ुंए ज़िधी मणछ होए दाबअ द, सह मणछ बी रहणअ साता धैल़ी तैणीं छ़ोतलअ।
17-18“इहै मणछा लै शुचै हणैंओ बधान आसा इहअ कि, तेता लै आणै कुंण शुचअ मणछ पाप बल़ीओ छ़ार अर सुहो पाणीं। संघा डबेऊऐ तेऊ छ़ारा राल़ै दै पाणीं जैंदरी ज़ुफे डाल़ी, संघा छ़ल़िकै तेता तेऊए डेरै दी बागै-भितरी सारै दी सोभी समाना अर मणछा संघी। तेऊ मणछा लै बी छ़ल़िकै ज़हा किज़ू हाडकै, मुल्दे घोरी या मुल्दै छ़ुंहंणै करै छ़ोत होए लागी दी। 19ज़ै चिऊथी अर सातुई धैल़ी इहअ ई करे, तेखअ डेऊणीं तेऊ मणछे छ़ोत। पर सह लऐ न्हैऊई अर आपणैं झिकल़ै धोई अर सातुई धैल़ी उडै पोर्ही हणअ सह शुचअ।
20“ज़ै कुंण मणछ एऊ साबै आप्पू शुचअ निं होए, तेऊ लै लागणअ मुंह बिधाते पबित्र ज़ैगा छ़ोत लाणैंओ दोश किल्हैकि सह निं छ़ोता का शुचै करनै आल़ै पाप बल़ीए छ़ार राल़ै दै तेऊ पाणीं करै न्हैऊअ! सह मणछ निं तेखअ मेरै इज़राईली मणछा जैंदरी रहणैं जोगी आथी। 21अह बधान रहणअ पोस्ती दर पोस्ती सदा लै इहअ ई।
“ज़ुंणी मणछै सह पाणीं छ़ल़िकअ, तेऊ बी लागणीं छ़ोत अर सह बी लऐ न्हैऊई अर आपणैं झिकल़ै धोई। ज़ै कुंण होर बी तेऊ पाप बल़ीए छ़ार राल़ै दै पाणीं छ़ुंए, सह बी रहणअ उडै तैणीं छ़ोतलअ। 22ज़ै कुंण छ़ोतलअ मणछ किज़ू च़िज़ा छ़ुंए, तेथ बी लागा तेखअ छ़ोत, ज़ै कुंण होर तैहा च़िज़ा छ़ुंए तेऊ बी लागा छ़ोत अर सह बी रहणअ उडै तैणीं छ़ोतलअ।”
Currently Selected:
गणांई 19: OSJ
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
