नहेमया 8
8
एज्रा शणाऊंअ सारी परज़ा का बिधातो बधान
1इज़राईली तै आपणीं-आपणीं नगरी, साज़ै शऊजै किअ सोभी एरुशलेम नगरी एक मन्न हई फणैरे प्रऊल़ी आजू च़फै झाल़अ। तिन्नैं बोलअ बधाने गूरू एज्रा शास्त्री लै कि मोसा गूरो बधान ज़ुंण बिधाता इज़राईली लै आसा दैनअ द, तैहा कताबा आण ओर्ही। 2साज़ै शऊजै आणी एज्रा बधाने कताब तिधा लै ज़िधी सोभ लोग तै कठा हुऐ दै। तिधी तै मर्ध, बेटल़ी, लान्हैं ज़ुंण शूणीं समझ़ी सका तै। 3तिधी फणैरे प्रऊल़ी आजू च़फै रहअ एज्रा तिन्नां बेटल़ी, मर्ध अर समझ़णैं आल़ै शोहरू-शोहरी सेटा बधाने कताबा का दोत्ता पोर्ही दपहरै तैणीं पहल़दअ लागी अर तिंयां सोभै रहै धैन दैई शूणैं लागी।
4एज्रा शास्त्री थिअ काठे उछ़टी च़ौकी प्रैंदै खल़्हुअ द ज़ुंण एते ई तैणीं थिई बणाईं दी। तेऊए दैहणीं बाखा तै मत्तितियाह, शेमा, अनाया, उरियाह, हिलकिया मासेया अर तेऊए बाऊंईं बाखा तै पदायाह, मिशेल, मलकिजा, हशूम, हशबदाना, जकर्या अर मशूलाम खल़्हुऐ दै।
5एज्रा थिअ तिधी होरी सोभी लोगा का च़ौकी प्रैंदै उछ़टै खल़्हुअ द अर सोभ लोग तै तेऊ बाखा भाल़ै लागै दै। ज़ांऊं एज्रा बधाने कताब खोल्ही, तिधी उझ़ुऐ सोभ लोग धरना का खल़ै। 6एज्रा बोलअ इहअ, “महान परमेशरे ज़ै-ज़ैकार!”
सोभी लोगै बोलअ आपणीं बाह उझै खल़ी करी, “एवमस्तू! एवमस्तू! एवमस्तू!” तेखअ टेक्कअ सोभी धरनीं उटै पल़ी बिधाता सेटा माथअ।
7तेखअ उझ़ुऐ तिंयां उझै संघा रहै तिधी खल़्हुई, तेखअ लागै लेबी मांझ़ै ईंयां मणछ तिन्नां का बधाना समझ़ाऊंदै: जेशूआ, बैनी, शेरेबयाह, जामीन, अकूब, शबताई, होदिया, मासेया, कलीता, अजर्याह, जोजबाद, हनान, पलाया। 8तिन्नैं समझ़ाऊई तिन्नां का खाखा का बोली अनुबाद करी बिधाते बधाने कताब ताकि लोग तेता राम्बल़ै करै समझ़े।
9ज़ांऊं लोगै शूणअ कि बधान किज़ै करना लै बोला, तिन्नें लागी तिंयां गल्ला दिलै संघा लागै सोभ लेरा लांदै! नहेमया राज़पाल, एज्रा प्रोहत अर बधानो शास्त्री अर होर लेबी ज़ुंण लोगा का बधाना समझ़ाऊंदै तै लागै दै, तिन्नैं बोलअ लोगा लै, “आझ़की धैल़ी आसा थारै परमेशर बिधाता लै पबित्र, तम्हैं निं शोग करदै अर लेरदै-पकारदै लागा। 10ऐबै डेओआ घअरा लै संघा खाआ बधिया-बधिया खाण-पींण। तिन्नां लै बी दैआ रोटी अर दाखो रस बांडी ज़हा का नांईं आथी। किल्हैकि आझ़की धैल़ी आसा म्हारै बिधाता लै पबित्र अर आझ़ निं तम्हैं दुखी रहा। ज़ुंण खुशी तम्हां बिधाता दैणीं, तेता करै हणैं तम्हैं बलबान।”
11लेबी डेऊऐ सोभी लोगा जैंदरी संघा च़पैऊऐ तिंयां इहअ बोली, “लेरा लांदै निं लागा किल्हैकि आझ़की धैल़ी आसा पबित्र, च़ुप्पी रहा।” 12तेखअ डेऊऐ सोभ लोग आपणैं-आपणैं घअरा लै संघा लागै खुशी-खुशी खांदै-पिंदै अर होरी लै बी बांडअ सोभी लै। किल्हैकि बधाने गल्ला ज़ुंण तिन्नां किई समझ़ाऊई ती, तिंयां आई तिन्नां राम्बल़ी समझ़।
छ़ानींओ थैर
13दुजै धैल़ै हुऐ सोभी टोलीए सैणैं, प्रोहत अर लेबी कठा संघा डेऊऐ एज्रा शास्त्री सेटा बधाने गल्ला शिखल़दै, 14ज़ुंण बिधाता मोसा गूरा का थिअ दैनअ द। तिन्नां का लागअ थोघ कि शऊजै रहा तै इज़राईली परज़ा हर साल छ़ानीं दी ज़ेभै तिंयां छ़ानींओ थैर मनाऊंआं तै। 15तेखअ दैनअ तिन्नैं एरुशलेम नगरी अर यहूदा मुल्खै होरी नगरी सोभी लोगा लै इहअ समाद, “तम्हैं डेओआ धारा संघा आणै जैतून, कैली, मैहंदी, खज़ूर अर होरी डाल़ा-बूटे शाण्हटी संघा बणाऐं छ़ानीं ज़िहअ बधाना दी आसा लिखअ द।”
16लोगै आणी डाल़ा-बूटे शाण्हटी चोल़ी संघा बणाईं आपणैं-आपणैं घअरा प्रैंदै, खोल़ै अर बिधाते भबने खोल़ै, फणैरे प्रऊल़ी नेल़ च़फै, एप्रैम प्रऊल़ी नेल़ च़फै छ़ानीं। 17ज़ेतरै बी लोग बाबेल देशे गलामी का फिरी आऐ तै, तिन्नैं बी सोभी बणाईं आप्पू रहणा लै छ़ानीं। नूने शोहरू ज़ैहसूए ज़मानै ओर्ही मनाऊंअ त अह पैहली बारी छ़ानींओ थैर अर सोभ इज़राईली तै खुश हुऐ दै अर सोभी आई नंद अर खुशी-खुशी मनाऊंअ थैर। 18थैरे पैहली धैल़ी पोर्ही खिरी तैणीं रहै हर धैल़ै बधाने कताबा का पहल़दै लागी। तिन्नैं मनाऊंअ साता धैल़ी तैणीं छ़ानींओ थैर। आठुई धैल़ी हुअ एक बडअ झाल़अ ज़िहअ बधाना दी लिखअ द थिअ।
Currently Selected:
नहेमया 8: OSJ
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
