मोत्ती 28

ईशूओ मरी करै ज़िऊंदै हणअ

(मार्कुस 16:1-10; लूका 24:1-12; जोहन्‍ना 20:1-10)

1बशैघे धैल़ी बाद, हबते पैहली धैल़ी आई दोत्ती-दोत्थी मगदल़ गराऊंए मरिअम अर दुजी मरिअम घोरी सेटा ईशू भाल़ी।

2तिधी हुई हेरा-हेरी खास्सी ज़ाज़री, किल्हैकि प्रभूओ एक स्वर्ग दूत होथअ सरगा का, अर घोरीए मोहरै दी लाई दी बडी टोल्ह बदल़ी पोर्ही अर आप्पू बेठअ तेता प्रैंदै। 3तेऊए झिकल़ै तै शेतै अर तेथ ज़ाण्हिंआं त ज़िहअ पाल़अ पल़अ द अर च़मकदअ लागअ द अर तेऊओ रूप त बिज़ल़ी ज़िहअ। 4तेखअ लागै तेऊए डरै तिंयां पहरी काम्बदै अर तिंयां हुऐ ज़िहै मूंऐं दै मणछा ज़िहै।

5स्वर्ग दूतै बोलअ तिन्‍नां बेटल़ी लै, “तम्हैं निं डरा आथी, मुखा आसा थोघ कि तम्हैं आसा ईशू लोल़ी लागी दी ज़ुंण क्रूसा दी मारअ त। 6सह निं इधी आथी, पर ज़िहअ तेऊ बोलअ थिअ, तिहअ ई हुअ सह ज़िऊंदअ। एछा, ऐहा ज़ैगा भाल़ा ज़िधी ईशू त डाहअ द। 7तम्हैं डेओआ एभी तेऊए च़ेल्‍लै सेटा लै संघा खोज़ै तिन्‍नां का, ‘ईशू हुअ मरी करै ज़िऊंदअ, अर सह गअ तम्हां का आजी गलील मुल्खा लै डेऊई। सह शुझणअ तम्हां का तिधी, हेरे, मंऐं हेरअ तम्हां का खोज़ी।’”

8तिंयां बेटल़ी लागी डरै काम्बदी पर तिंयां ठुर्ही खुशी-खुशी घोरी सेटा का घअरा लै च़ेल्‍लै का समादा खोज़दी। 9तिन्‍नां बेटल़ी भेटअ ईशू बाता नच़ानक। ईशू बोलअ तिन्‍नां लै, “तम्हां लै लोल़ी शांती हुई।” तिंयां डेऊई ईशू नेल़ संघा टेक्‍कअ ईशू सेटा माथअ। 10तेखअ बोलअ ईशू तिन्‍नां लै, “डरा निं आथी, मेरै होरी भाई लै बोला कि गलील मुल्खा लै डेओआ, हुंह शुझणअ तिन्‍नां का तिधी।”

पहरीओ समाद दैणअ

11तिंयां बेटल़ी ती होरी च़ेल्‍लै सेटा लै समादा खोज़दी डेऊंदी ई लागी दी कि तिन्‍नां पहरी मांझ़ै डेऊऐ कई ज़ण्हैं नगरी लै, तिन्‍नैं खोज़ी बडै प्रोहता का सारी गल्‍ला। 12तेखअ हुऐ सैणैं, प्रोहत अर शास्त्री कठा संघा किई आप्पू मांझ़ै सलाह कि ऐबै आजू किज़ै करनअ। तिन्‍नैं दैनै तिन्‍नां समाद पजैल़ै सपाही लै खास्सी च़ंदीए ढब्बै रेशपत संघा डाहअ तिन्‍नां का इहअ बोली, 13“ऐहा गल्‍ला निं कोही का खोज़ी। तम्हैं बोलै हथू लोगा का इहअ कि राची तै हाम्हैं सुत्तै दै अर तेऊए च़ेल्‍लै पाई राची ईशूए ल्हास च़ोरी। 14ज़ै ऐहा गल्‍लो थोघ रोमी राज़पाल पिलातुसा का लागे, तेता लै समझ़ाऊंमै तेऊ हाम्हैं कि थारअ निं एथ किछ़ै कशूर आथी, ऐहा गल्‍लो फिकर निं तम्हैं करी।” 15तिन्‍नैं सपाही निंयैं ढब्बै अर ज़िहै तिंयां यहूदी सैणैं शगरेऊई तै डाहै दै, तिन्‍नैं खोज़ी होरी लोगा का तेही ई झ़ुठी गल्‍ला। अह गल्‍ल आसा आझ़ तैणीं बी यहूदी मांझ़ै सोभी एही ई समझ़ी दी।

ईशूओ शुझणअ अर खिरी दैनअ द हुकम

(मार्कुस 16:14-18; लूका 24:36-49; जोहन्‍ना 20:19-23; शधाणूं 1:6-8)

16तिंयां गैरा च़ेल्‍लै डेऊऐ गलील मुल्खे तैहा धारा प्रैंदै ज़ुंण ईशू तिन्‍नां का खोज़अ त। 17तिधी डेऊई भेटअ तिन्‍नां ईशू संघा टेक्‍कअ सोभी तेऊ सेटा माथअ। पर कई च़ेल्‍लै थिअ अज़ी बी मन्‍नैं बैहम कि अह सच्च़ी हुअ भिई ज़िऊंदअ! 18ईशू आअ तिन्‍नां सेटा संघा बोलअ, “स्वर्ग अर पृथूईओ सारअ हक दैनअ मुल्है। 19एता लै डेओआ तम्हैं संसारे सोभी ज़ातीए लोगा सेटा लै अर बणाआं तिन्‍नां मेरै च़ेल्‍लै। संघा दैआ तिन्‍नां लै बाब परमेशर, परमेशर पूता अर परमेशर पबित्र आत्में नाओंऐं डुबकी। 20तिन्‍नां का सखाऊआ तम्हैं तिन्‍नां सोभी गल्‍ला मनणी ज़ुंण मंऐं तम्हां का आसा खोज़ी दी। ऐहा गल्‍ला लै रहै तम्हैं निहंचै, हुंह आसा संसार खतम हणैं तैणीं सदा तम्हां संघै।”

Currently Selected:

मोत्ती 28: OSJ

Highlight

Copy

Compare