मोत्ती 22

धामा खाणां लै छ़ांदअ

(लूका 14:15-24)

1ऐहा गल्‍ला समझ़ी लागअ ईशू तिन्‍नां का होर बी कथ्या खोज़ी गल्‍ला करदअ। 2ईशू बोलअ, “स्वर्गो राज़ आसा तेऊ राज़ै ज़िहअ ज़ुंणी आपणैं शोहरूए बैहा लै बडअ भोज़ दैनअ। 3ज़ांऊं धाम खाणां लै तैर गई हई तेऊ छ़ाडै आपणैं दास तिन्‍नां सेटा समाद पजैल़ै ज़हा लै छ़ांदअ आसा त, ‘एछा, धाम गई बणी।’ पर तिंयां निं आऐ।

4 “तेखअ छ़ाडै राज़ै भिई आपणैं दास लोगा सेटा शधाणूं कि ज़हा लै छ़ांदअ आसा किअ द तिन्‍नां लै बोला इहअ, ‘मंऐं हेरी धाम खाणां लै तैर करी अर खुढै धाचै दै गाभू-छ़ेल्हू हेरै मंऐं काटी अर सोभ गल्‍ला गई बणी, तम्हैं एछा ऐबै धामा खांदै एभी।’ 5पर ज़हा लै छ़ांदअ थिअ तिन्‍नैं निं तैहा गल्‍ले परबाह किई तिंयां लागै हांढदै, कोई डेऊऐ आपणैं खेचा लै कामां अर कोई डेऊऐ आपणैं होरी काम-काज़ करदै। 6एता का लाऊआ ढाकै तिंयां राज़ेए दास संघा पाऐ बेइज़त करी तिंयां।

7 “एता लै आई राज़ै खास्सी रोश्शै! तेऊ छ़ाडी तिन्‍नें नगरी लै आपणीं सैना ज़िधी तिंयां हत्या करनै आल़ै थिऐ बस्सै दै, सैना पाऐ तिंयां मारी ज़ुंणीं राज़ेए दास मारी पाऐ तै। तिन्‍नें नगरी किअ तिन्‍नैं आग चैल़ी बनाश। 8तेखअ बोलअ राज़ै आपणैं दासा लै, ‘बैहे धाम ता गई तैर हई अर ज़हा लै छ़ांदअ किअ त तिंयां निं धामा खाणैं जोगी रहै। 9तम्हैं करा इहअ, बाता अर च़फै ज़ेतरै लोग तम्हां भेटे, तिन्‍नां आणा सोभी धामा खांदै शादी।’ 10तिंयां दास डेऊऐ संघा किहअ ज़िहअ राज़ै बोलअ तिहअ ई। तिंयां डेऊऐ बाता अर च़फै संघा आणै तिन्‍नैं कै भलै, कै बूरै, ज़ुंण बी तिन्‍नां भेटअ तिंयां मणछ झाल़ी अर राज़ेए शोहरूओ बैहो दरबार हुअ भरी।

11 “ज़ांऊं राज़अ प्राहुंणैं भाल़अ भितरा लै आअ, तेऊ भाल़अ एक मणछ तिधी इहअ कि तेऊ निं तिंयां झिकल़ै आथी तै बान्हैं दै ज़ुंण बैहे भोज़ा लै बान्हणैं ज़रूरी आसा तै। 12राज़ै पुछ़अ तेऊ का, ‘साथी, ज़ुंण बैहे झिकल़ै मंऐं दैनै तै, तंऐं तिंयां किल्है निं बान्हैं?’ सह मणछ निं तेतो ज़बाब ई दैई सकअ। 13तेखअ दैनअ राज़ै आपणैं दासा लै हुकम, ‘एऊए हाथ खूर बान्हां संघा करा एऊ न्हैरी खुडी कैद, तिधी हणअ अह लेरदअ अर दांदा कटिल्‍लदअ।’ 14किल्हैकि छ़ांदअ आसा खास्सै लै किअ द, पर छ़ांटै दै आसा थोल़ै।”

माहा राज़ै लै कारअ दैणअ

(मार्कुस 12:13-17; लूका 20:20-26)

15फरीसी पंथे लोग लागै तिधा का डेऊई आप्पू मांझ़ै इहै जोग करदै कि हाम्हां करनअ किज़ै इहअ ज़ेता करै अह ईशू किज़ै रोमी राज़े खलाफ बोले, तेऊ दोशा पिछ़ू बझ़ैल़णअ हाम्हां अह कैदखानै दी पाणै। 16फरीसी छ़ाडै आपणैं च़ेल्‍लै हेरोदेस राज़ेए पक्ष लणैं आल़ै लोगा संघै ईशू लै इहअ बोल्दै, “हे गूरू, हाम्हां का आसा ऐहा गल्‍लो थोघ कि तूह आसा शुचअ। तूह सखाऊआ परमेशरो सत्त। तूह निं कोहिए परबाह करदअ अर नां तूह कहा मणछे मुंहां भाल़ी गल्‍ला करदअ। 17तूह खोज़ हाम्हां का ऐहा गल्‍ले बारै कि तेरी हाम्हां लै एते बारै किज़ै राऐ आसा कि माहा राज़ै लै कारअ दैणअ ठीक आसा कि नांईं?”

18ईशू हेरअ तिन्‍नें दिलो कपट समझ़ी संघा बोलअ तिन्‍नां लै, “कपटी मणछो, तम्हैं किल्है आसा मुंह परखदै लागै दै? 19तेऊ सिक्‍कै रहैऊआ मुखा ज़ेता लोग राज़ै लै कारअ दैआ।” तिन्‍नैं आणअ तेऊ सेटा एक च़ंदीओ सिक्‍कअ। 20ईशू बोलअ तिन्‍नां लै, “एऊ सिक्‍कै दी अह मुहुर्ती अर नाअं कसरअ आसा?”

21तिन्‍नैं बोलअ, “एथ आसा माहा राज़ैओ नाअं अर मुहुर्ती।”

तेखअ बोलअ ईशू तिन्‍नां लै, “ज़ुंण माहा राज़ैओ आसा, तेऊ दैआ माहा राज़ै लै। ज़ुंण परमेशरो आसा, तेऊ दैआ परमेशरा लै।”

22ऐहा गल्‍ला शूणीं हुऐ तिंयां रहैन संघा लागै ईशू सेटा का हांढदै।

मणछो भिई ज़िऊंदै हणअ अर बैह

(मार्कुस 12:18-27; लूका 20:27-40)

23तैहा ई धैल़ी आऐ सदुकी ईशू सेटा लै, ज़ुंण इहअ बोला कि मूंऐं दै मणछो भिई ज़िऊंणअ निं आथी, तिन्‍नैं पुछ़अ ईशू का, 24“हे गूरू, परमेशरे गूर मोसा आसा इहअ बोलअ द कि, ज़ै कुंण आद-लुआद हुऐ बाझ़ी मरे, तेऊए बिधबा बेटल़ी संघै सका तेऊओ भाई बैह करी अर तेऊ लै लुआद पैईदा करी? 25एक बार हुअ इहअ कि सात भाई, पैहलअ भाई मूंअ बैह करी अर तेऊए निं लुआद हुई! तेऊए बिधबा बेटल़ी लागी दुजै संघै रहंदी। 26पर दुजअ अर चिऊथअ भाई बी मूंअ लुआद हुऐ बाझ़ी, इहअ हुअ तिन्‍नां साता भाई तैणीं अर तिंयां मूंऐं सोभ अर तिन्‍नें कोहिए निं तैहा बेटल़ी का लुआद। 27तिन्‍नां बाद खिरी सह बेटल़ी बी मूंईं। 28ता, ऐबै ज़ेभै सह भिई ज़िऊंदी हणीं, सह तिन्‍नां साता भाई मांझ़ै कसरी बेटल़ी हणीं? किल्हैकि सह ता पैहलै साता ज़ण्हे बेटल़ी ती।”

29ईशू बोलअ तिन्‍नां लै, “अह आसा थारी भूल कि तम्हां का निं पबित्र शास्त्रो थोघ ई आथी अर नां तम्हां परमेशरे शगतीओ थोघ आथी! 30ज़ेभै तिंयां मूंऐं दै मांझ़ै ज़िऊई उझ़णै, तेभै नां तिन्‍नां बैह करनअ। नां तिंयां बैहा लै दैणैं। पर स्वर्गै हणैं तिंयां स्वर्ग दूता ज़िहै।

31 “पर मरी करै ज़िऊंदै हणें बारै तम्हैं पबित्र शास्त्र निं पहल़अ आथी? ज़ेथ परमेशर इहअ बोला, 32‘हुंह आसा सह परमेशर ज़हा तेरै दाद-बाब आबराम, इसहाक अर याकब मना तै?’ सह निं मुल्दैओ परमेशर आथी पर सह आसा ज़िऊंदैओ।”

33ईशूए ऐहा शिक्षा शूणीं हुऐ लोग रहैन।

सोभी का बडअ हुकम

(मार्कुस 12:28-34; लूका 10:25-28)

34ज़ांऊं फरीसी पंथे लोगै शूणअ कि ईशू दैनअ तिन्‍नां सदुकी पंथे लोगा लै इहअ ज़बाब कि नां तिंयां तेते बारै सोठी सकदै तै अर नां तेते बारै किज़ै बोली सकदै तै। फरीसी किअ कठा हई आप्पू मांझ़ै जोग कि हाम्हां ईशू लै किज़ै बोल़णअ, संघा डेऊऐ तिंयां ईशू सेटा लै। 35तिन्‍नां मांझ़ै त एक शास्त्रो ज़ाणकार मणछ, सह लागअ इहअ बोली ईशू परखदअ, 36“हे गूरू, बधाना दी सोभी का खास हुकम किज़ै आसा?”

37ईशू बोलअ तेऊ लै, “तूह करै आपणैं परमेशर बिधाता लै आपणअ सारअ मन्‍न, प्राण अर आपणीं सारी अक्ल लाई झ़ूरी। 38बडअ अर पैहलअ हुकम आसा अह ई। 39एता ई बराबर दुजअ हुकम बी आसा इहअ कि तूह कर आपणैं साथी-संघी संघै आप्पू बराबर झ़ूरी। 40ईंयां ई दूई हुकम आसा सारै बधाने अर परमेशरे गूरे शिक्षे आथरी।”

मसीहा दाबेदे लुआद या तेऊओ प्रभू आसा?

(मार्कुस 12:35-37; लूका 20:41-44)

41फरीसी तै ईशू सेटा कठा हुऐ दै, ईशू पुछ़अ तिन्‍नां का सुआल, 42“मसीहे बारै तम्हैं कै समझ़ा? सह कसरअ शोहरू आसा?” तिन्‍नैं दैनअ ज़बाब, “दाबेद राज़ैओ शोहरू।” 43तेखअ पुछ़अ ईशू तिन्‍नां का, “तै राज़अ दाबेद आत्मां दी हई तेऊ लै प्रभू किल्है बोला?” 44“सह बोला इहअ,

‘प्रभू बोलअ मेरै प्रभू लै,

मेरै दैहणै बेश

ज़ेभै तैणीं हुंह तेरै दुशमणा हारी निं लऊं।’

45 “तै, ज़ै राज़अ दाबेद मसीहा लै प्रभू बोला, तै सह तेऊओ शोहरू किल्है हुअ?” 46एऊ सुआलो ज़बाब निं कोहै दैई सकअ। तेखअ निं कोही बी ईशू का पुछ़णें हिम्मत हुई।

Currently Selected:

मोत्ती 22: OSJ

Highlight

Copy

Compare