लूका 4

ईशूए परिक्षा

(मोत्ती 4:1-11; मार्कुस 1:12,13)

1तेखअ डेऊअ ईशू पबित्र आत्मां दी भर्हुई जरदण नदी का फिरी करै शुन्‍नैं रेगीस्ताना लै, संघा रहअ च़ाल़्ही धैल़ै तैणीं पबित्र आत्में साबै शुन्‍नैं रेगीस्तानै हांढदअ-फिरदअ लागी। 2राख्स रहअ तेऊ परखदअ लागी अर तिन्‍नां धैल़ै निं ईशू किछ़ै बी खाअ-पिअ अर ज़ांऊं च़ाल़्ही धैल़ै पूरै हुऐ, तेऊ आई भुखै।

3राख्सै बोलअ ईशू लै, “ज़ै तूह परमेशरो पूत आसा, तै बोल एऊ पात्थरा लै कि रोटी बण।” 4ईशू दैनअ तेऊ लै ज़बाब, “पबित्र शास्त्रा दी आसा लिखअ द कि मणछ निं सिधअ रोटी करै ज़िऊंदअ आथी#4:4 बधा. 8:3।”

5तेखअ निंयं राख्सै सह एकी उछ़टी धारा अर तेऊ ईशू का सारै संसारो राज़ अर सुख रहैऊअ, 6संघा बोलअ राख्सै ईशू लै इहअ, “इना सोभी गल्‍लो हक अर राज़-पाठ दैणअ मुंह ताल्है किल्हैकि अह आसा मुखा सभाल़अ द अर ज़हा लै हुंह च़ाहा तेऊ लै दैआ हुंह। 7ज़ै तूह मुंह सेटा माथअ टेक्‍के, तै हणीं ईंयां सोभै गल्‍ला तेरी।”

8ईशू दैनअ तेऊ लै ज़बाब, “पबित्र शास्त्रा दी आसा लिखअ द,

# 4:8 बधा. 6:13-14 ‘तूह निं आपणैं परमेशर बिधाता छ़ाडी होरी कोही सेटा माथअ टेक्‍की

अर सिधी तेऊए च़ाकरी करै।’”

9तेखअ निंयं राख्सै ईशू एरुशलेम नगरी, संघा किअ परमेशरे भबने च़ुंडी खल़अ, तेखअ बोलअ इहअ, “ज़ै तूह परमेशरो पूत तै दै इधा का उंधै छ़ाहल़! 10किल्हैकि पबित्र शास्त्रा दी आसा इहअ बी लिखअ द,#भज. 91:11-12

‘परमेशरा डाहणैं तेरी फाज़त करदै हर ज़ैगा स्वर्ग दूत लाई,

तूह ज़िधी बी डेऊए, तिंयां रहणैं ताह संघा।

11तूह नढैऊणअ तिन्‍नां स्वर्ग दूता हाथा ढाकी,

ताकि तेरै च़रणैं ठोहल़ नां लागे।’”

12ईशू दैनअ तेऊ लै ज़बाब, पबित्र शास्त्रा दी आसा इहअ बी लिखअ द, “तम्हैं निं आपणैं परमेशर बिधाता परखदै लागी।”#बधा. 6:16 13ज़ांऊं पापी राख्स सोभी साबै परखी मुक्‍कअ तेखअ डेऊअ सह थोल़ी घल़ी ईशू सेटा का दूर।

ईशूए च़ाकरीए शुरूआत

(मोत्ती 4:12-17; मार्कुस 1:14,15)

14ईशू आअ पबित्र आत्में शगती दी भर्हुई करै गलील मुल्खा लै बापस अर तेऊए गल्‍ला पुजी ओरी-पोरी सारै देशै कई ज़ैगा। 15अर सह रहअ तिन्‍नां ई सभागृहा शिक्षा दैंदअ लागी अर सोभ करा तै तेऊए बड़ैई।

नासरत नगरी ईशूओ अदर नांईं करनअ

(मोत्ती 13:53-58; मार्कुस 6:1-6)

16तेखअ आअ ईशू आपणैं घअर नासरत नगरी लै फिरी ज़िधी सह धाचअ-पाल़अ त। तेखअ हुअ आपणैं रिती-रबाज़े साबै बशैघे धैल़ी सभागृहा बैणा पहल़दअ खल़अ। 17तेऊ लै दैनी परमेशरे गूर ईशायाहे कताब पहल़णा लै अर तेऊ काढअ कताब खोल्ही करै सह भाग ज़िधी इहअ त लिखअ द,

18 “प्रभूए आत्मां आसा मुंह दी

कि तेऊ आसा रैनै-गरीबा लै खुशीओ समाद खोज़णा लै आसा मेरअ अभिषेक किअ द।

हुंह आसा एते तैणीं छ़ाडअ द कि

गलामा लै छ़ुटकारेओ

अर कांणै लै शरैछै हणैंओ खुशीओ समाद खोज़ूं।

“ज़ुंण गलामी दी दाभूऐ दै होए तिन्‍नां लै छ़ुटकारअ दैंऊं # 4:18 ईशा. 58:6; 61:1-2

19 अर प्रभूए खुश हणें सालो प्रच़ार करूं।”

20तेखअ दैनी ईशू कताब बंद करी दासे हाथै अर आप्पू बेठअ। सभागृहा बेठै दै सोभ लोग लागै तेऊ राम्बल़ै करै भाल़ै। 21तेखअ बोलअ तेऊ तिन्‍नां लै इहअ, “आझ़ हुअ पबित्र शास्त्रा दी लिखअ द थारै सम्हनै पूरअ।”

22तिधी बेठै दै सोभी ज़ण्हैं सराहअ सह अर ज़ुंण जशा आल़ी गल्‍ला तेऊए मुंहां का निखल़ा ती, तेता शूणीं हुऐ तिंयां रहैन अर तिंयां लागै इहअ बोल्दै, “अह ता युसुफो शोहरू निं आथी?”#लूक. 2:42; भज. 45:2

23तेऊ बोलअ तिन्‍नां लै इहअ, “तम्हां बोल़णीं मुल्है अह कहाबत, ‘बैईद, तूह कर पैहलै आपणअ लाज़,’ मतलब ‘ज़ुंण हाम्हैं शूणअ कि कफरनहूम नगरी किअ, तिहअ कर इधी आपणैं देशै बी।’ 24पर हुंह खोज़ा तम्हां का सत्त कि परमेशरे गूरो निं आपणैं देशै अदर हंदअ।

25 “सत्त आसा इहअ कि एलियाह गूरे ज़मानैं ज़धू साढै चिई साला तैणीं सरग नांईं हुअ, सोभी देशै त नकाल़ पल़अ द अर इज़राईल देशै ती खास्सी बिधबा। # 1 राज़. 17:1; 18:1 26पर परमेशरे गूर एलियाह निं तिन्‍नां मांझ़ै कोही सेटा लै छ़ाडअ। पर सह छ़ाडअ सदोन नगरीए सारपत गराऊंए होरी ज़ातीए बिधबा बेटल़ी सेटा#4:26 1 राज़. 17:9

27 “परमेशरे गूर एलीशे ज़मानैं तै इज़राईला देशै खास्सै कोहल़े बमारी आल़ै। पर नामान नाओंए सिरीया मुल्खे राम राज़ेए सैनापति ज़हा कोहल़ थिअ निखल़अ द, तेऊ होरी ज़ातीए मणछा छ़ाडी निं होर कोहै तिन्‍नां मांझ़ै शुचअ किअ।” # 4:27 2 राज़. 5:1-14

28इना गल्‍ला शुणदी ई तिधी सभागृहा बेठै दै हुऐ सोभ रोश्शै दी लाल-पिंऊंल़ै। 29तिन्‍नैं काढअ ईशू नगरी बागै अर ज़हा धारा तिन्‍नें नगरी ती बस्सी दी, तिन्‍नैं निंयं सह तैहा धारे प्रैंदै ढेक्‍का शोटी मारना लै। 30पर ईशू डेऊअ तिन्‍नां मांझ़ा का दूर।

भूत शाचअ द मणछ ठीक करनअ

(मार्कुस 1:21-28)

31तेखअ डेऊअ सह गलील मुल्खै कफरनहूम नगरी लै अर बशैघे धैल़ी लागअ लोगा लै शिक्षा दैंदअ। 32लोग हुऐ तेऊए शिक्षा शूणीं रहैन, किल्हैकि तेऊओ बैण त हका संघै। 33सभागृहा दी थिअ एक इहअ मणछ तेऊ त भूत शाचअ द। 34सह लागअ ज़ोरै-ज़ोरै हाक्‍का लांदअ, “हे ईशू नासरी, हाम्हां भूता निं ताह संघै किछ़ै काम आथी! तूह कै हाम्हां खतम करदअ आसा आअ द? मुखा आसा थोघ कि तूह कुंण आसा? तूह आसा परमेशरै छ़ाडअ द पबित्र मणछ।”

35ईशू लागअ तेऊ नैरदअ, “च़ुप्पी रह, अर एऊ मणछा का निखल़ पोर्ही।” तिंयां भूत निखल़ै तेभी तेऊ मणछा धरनीं बदल़ी करै बाझ़ी नकसान करी पोर्ही। 36इहअ भाल़ी हुऐ सोभ रहैन अर तिंयां लागै आप्पू मांझ़ै बोल्दै, “अह किहअ बैण आसा कि अह काढा बडै हक अर शगती करै भूता दरल़ाऊई अर तिंयां निखल़ा?” 37इहअ करै लागी सारै दी कई ज़ैगा तेऊए बारै गल्‍ला हंदी।

पतरासे शाशअ अर कई रोगी नरोगै करनै

(मोत्ती 8:14-17; मार्कुस 1:29-34)

38तेखअ डेऊअ ईशू सभागृहा का उझ़ुई करै शमौने घअरा लै अर शमौन पतरासे शाशुई त खास्सअ ज़अर आअ द अर तिन्‍नैं किई तैहा लै अरज़ कि हे प्रभू एसो ज़अर कर दूर। 39ईशू दैनअ तैहा सेटा खल़्हुई ज़अरा लै डेऊणेओ हुकम, ज़अर मुक्‍कअ तेभी अर सह हुई तेभी राम्बल़ी संघा लागी सह च़ाकरी करदी।

40ज़ांऊं सान्ह पल़ी, तेखअ ज़हा-ज़हा घअरै मणछ कई रंगे रोगी थिऐ, तिन्‍नैं आणै तिंयां सोभ ईशू सेटा लै अर ईशू डाहअ बारी-बारी तिन्‍नां सोभी प्रैंदै आपणअ हाथ अर तिंयां सोभ हुऐ नरोगै। 41कई भूत निखल़ै लैल़ा लांदी-लांदी अर इहअ बोल्दी कि तूह आसा परमेशरो पूत। ईशू नैरा त तिन्‍नां झ़ाहल़ काढी, संघा करा त तिन्‍नां च़ुप्पी अर तिन्‍नां निं दैंदअ त बोल़णैं, किल्हैकि तिंयां ज़ाणा ती कि अह आसा मसीहा।

सभागृहा प्रच़ार करनअ

(मार्कुस 1:35-39)

42ज़ांऊं राच भैई, ईशू डेऊअ तिधा का एक कांगनरांगी ज़ैगा लै अर खास्सै मणछ आऐ ईशू सेटा लै संघा लागै तिंयां तेऊ रोक्‍कदै कि हाम्हां सेटा का निं दूर डेओऐ। 43पर ईशू बोलअ तिन्‍नां लै, “मुंह आसा होरी नगरी बी परमेशरे राज़ो खुशीओ समाद खोज़णअ ज़रूरी। किल्हैकि हुंह आसा एते ई तैणीं छ़ाडअ द।” 44तेखअ रहअ ईशू यहूदा मुल्खै कई सभागृहा परमेशरे राज़े बारै खोज़दअ लागी।

Currently Selected:

लूका 4: OSJ

Highlight

Copy

Compare