लेबी बधान 6
6
होर पाप ज़ेता लै बल़ीदान, कि मोल दैणअ
(गणांई 5:5-10)
1-3तेखअ बोलअ बिधाता मोसा लै इहअ, “ज़ै तम्हां मांझ़ै कुंण धोखअ दैई पाप करे, ज़िहअ कि बांधअ, लैण-दैण, कि लुटी-घशिट्टी करै आपणैं भाई-बंधा संघै धोखअ करे, ज़ै कुंण कसरी शोठुई दी च़ीज़ भेटी करै हुधिए अर तेता लै झ़ुठै सोह बी खाए।#गण. 5:5-8
4“ज़ेभै कहा इना इहै कामां करनैओ दोश होए, सह मणछ दैऐ तिन्नां च़िज़ा बापस फरेऊई, च़ाऐ सह च़ीज़ लुटी दी होए, ज़ुल्म करी होए आणी दी, तेऊ का बांधै होए डाही दी, या सह तेऊ शोठुई दी भेटी होए। किल्हैकि सह निं तेऊए आथी। 5सह च़ाऐ ज़ेही बी च़ीज़ होए ज़ेता लै तेऊ झ़ुठै सोह खाऐ, तेता दैऐ पठी बापस। तेता का लाऊआ दैऐ तैहा च़िज़े किम्मतो शौआ मांझ़ै पांज़ूअ निसब तेते मालका लै हुआह, अर ज़हा धैल़ी तेऊए दोशी हणैंओ थोघ लागे, तैहा ई धैल़ी दैऐ बिधाता लै दोश बल़ी बी। 6-7एता का लाऊआ आणै सह मणछ मुंह बिधाता लै हेल़्ही मांझ़ै एक गाभू प्रोहता सेटा ज़ेथ किछ़ै खोट निं होए। ज़ै तेऊ का गाभू नांईं होए, तै दैऐ सह तेते किम्मत। प्रोहत करै तेखअ तेऊ गाभू तेऊए दोश बल़ी लै बल़ीदान, इहअ करै हणअ तेऊ मणछो सह दोश माफ।”
हर धैल़ै हणैं आल़ै बल़ीदानो बधान
(लुआह 29:38-43; गणांई 28:1-8)
8तेखअ बोलअ बिधाता मोसा लै, 9“हारण अर तेऊए शोहरू का खोज़ इहअ कि हूम बल़ी करनैओ बधान आसा इहअ कि हूम बल़ीओ पशू डाहै सारी राची बेदी प्रैंदै पर ऐहा गल्लो डाहै धैन कि बेदीए आग लोल़ी सारी राची रही ज़ल़दी लागी।
10“दुजै धैल़ै दोत्ती बान्हैं तूह घेरी आपणैं प्रोहते काम करने झिकल़ै बाछे ज़ांघिऐ संघी। तेखअ काढै बेदी दी हूम बल़ी का रहै दै छ़ारा बेदी का पोर्ही। 11तिन्नां झिकल़ै खोल्ही बान्हैं तेखअ होर झिकल़ै संघा निंयैं तेऊ छ़ारा बसती बागै तेखअ डाहै तेऊ किधी शुची ज़ैगा तरैल़ी।
12“बेदी दी लोल़ी आग कबल्ली रही ज़ल़दी लागी, एता लै पाऐ प्रोहत सोभी का आजी बेदी दी दोत्ती-दोत्ती धैल़ झ़ुका। तेखअ पाऐ हूम बल़ीओ मास्स च़ही करै अर तेता प्रैंदै करै मुखा बर्गत मांगणा लै मेल़-ज़ोल़े बल़ीए च़र्बी करै हूम।
13“बेदीए आग लोल़ी कबल्ली ज़ल़दी रही लागी, सह निं लोल़ी हिठी।
बिधातो शूकर करना लै नाज़ बल़ी
14“मेरअ शूकर करना लै ज़ै कुंण नाज़ बल़ी करे तेता लै बधान हणअ इहअ कि, तेता आणै हारणे खिंबे प्रोहत मुंह बिधाता सेटा कांस्से बेदी आजू, 15तेता का काढै प्रोहता मांझ़ै एक ज़ण्हअ एक मुठ पिठअ अर तेल तेते खुशबूदार लोवाना संघी। तेखअ करै प्रोहत तेता ऐहा गल्ला रहैऊंणा लै बेदी दी हूम कि सह सारी भैंट आसा मुल्है। तेते धूँआं का निखल़ी दी बास्सा करै हआ हुंह बिधाता खुश। 16-17बाकी पिठैओ चाणै मेल़-ज़ोल़े खिम्भे खोल़ै भोज़न, तेथ निं सज़ेल़अ पाई, संघा खाऐ तेता सोभै प्रोहत तिधी। अह भोज़न हणअ खास पबित्र, ज़िहअ पाप बल़ी अर दोश बल़ी पबित्र आसा, अह भाग दैनअ मंऐं प्रोहत हारण अर तेऊए शोहरू लै तेता मांझ़ै ज़ुंण बेदी दी मुंह बिधाता लै भैंट किअ।
18“मुंह बिधाता लै छ़ाडै दै एऊ भोज़ना खाणेंओ हक आसा पोस्ती दर पोस्ती प्रोहता ई ज़ुंण हारणे खिंबा का आसा। तिन्नां छ़ाडी निं एऊ हूमा का बच़ै दै भोज़ना होर कोहै छ़ुंहीं बी सकदअ किल्हैकि सह आसा पबित्र। अह बधान रहणअ सदा लै इहअ ई।”
प्रोहता लै नाज़ बल़ी
19बिधाता खोज़अ मोसा का इहअ, 20“ज़ेभै हारणो अभिषेक होए, तैहा धैल़ी करै सह मुंह बिधाता लै एक होछ़अ पाथअ पिठअ नाज़ बल़ी, आधअ पाथअ दोत्ती अर आधअ पाथअ उडै भैंट। 21तेते बणाऐं तऊई प्रैंदै, जैतूने तेला जैंदरी बाबरू। तेखअ करै तेता करै बेदी दी हूम कि शोभली बास्सा आल़अ इहअ धूँ निखल़े ज़ेता करै हुंह बिधाता खुश हआ। 22-23हारणे खिंबा दी तेऊए आद-लुआद ज़सरअ बी प्रोहतो अभिषेक होए, सह करै पोस्ती दर पोस्ती एऊ बधाना इहै ई। तैहा नाज़ बल़ी दहै बेदी दी पठी अर तेता मांझ़ै निं किछ़ै खाई आथी।”
पाप बल़ी
(लेबी बधान 4:1,2)
24तेखअ खोज़अ बिधाता मोसा का पाप बल़ी करनैओ बधान, 25“हारणे खिंबा का ज़ुंण प्रोहत पाप बल़ी करे, सह काटै पाप बल़ीओ पशू बी तैहा ई ज़ैगा ज़िधी बिधाता सम्हनै हूम बल़ीओ पशू काटा। सह बल़ीदान आसा खास पबित्र। 26ज़ुंण प्रोहत पाप बल़ी करे, सह खाऐ तेता मेल़-ज़ोल़े खिम्भे खोल़ै पबित्र ज़ैगा। 27तेतो मास्स ज़िधी बी छ़ुंहांईंए या कुंण छ़ुंए सह हणअ पबित्र। ज़ै तेते लोहूए छ़िट्टै कहा प्रोहते झिकल़ै दी पल़े, सह धोऐ तेता किधी शुची ज़ैगा। 28ज़ै तेतो मास्स कहा माट्टे भांडै दी सटेऊए, तेता पाऐ तेखअ बादा का फाल़ी, पर ज़ै कांस्से भांडै दी सटेऊअ होए, तेता मांज़ै राम्बल़ै करै संघा धोऐ पाणीं करै बधिया।
29“अह बल़ीदान आसा खास्सअ पबित्र अर एता सका सिधै प्रोहत खाई। 30पर ज़हा पाप बल़ीए पशूओ लोहू पापो प्राश्त करना लै मेल़-ज़ोल़े खिम्भा भितरी आणअ होए, तेतो मास्स निं कधि खाई, तेऊ पाऐ बेदी दी पठी दहई।”
Currently Selected:
लेबी बधान 6: OSJ
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
