लेबी बधान 26
26
बर्गत दैणें करार
1“हुंह आसा थारअ परमेशर बिधाता! तम्हैं निं किज़ू मैहरै अर मुहुर्ती बणाईं तेता पूज़दै लागी।#लुआ. 20:4; लेब. 19:4; बधा. 5:8; 16:21,22; 27:1 2बशैघै धैल़ीए करै कदर अर ज़ुंण मेरी पबित्र ज़ैगा आसा तेते लोल़ी तम्हां दी डअर हुई, किल्हैकि हुंह आसा बिधाता।
3“ज़ै तम्हैं मेरै बधाने साबै ज़िन्दगी ज़िऊए अर तेते हुकम मने,#बधा. 11:13-15; 28:1-14 4तै बर्शाऊं तम्हां लै सरग ठीक बगती, ताकि थारी ज़िम्मीं दी बधिया पज़ैआ होए अर डाल़ा-बूटा दी राम्बल़ी फसल होए। 5थारी दाख अर नाज़े साल-फसल हणीं एतरी खास्सी कि पिछ़लै निं तम्हैं खाई मुक्कणैं कि आजू जाणीं नऊंईं साल-फसल पाक्की। ज़िहअ तम्हैं च़ाहे तम्हां लै हणीं खाणां लै तिंयां सोभै गल्ला, तम्हैं रहणैं आपणैं देशै निहंचै बस्सी।
6“थारै देशै दैणीं मुंह सुख-शांती, ज़ेभै तम्हैं सुत्ते तेभै निं तम्हां किछ़ू गल्ले डअर रहणीं। ज़ुंण ज़ीब तम्हां खाई-डरैऊई सका, तिंयां दरल़ाऊंणै मुंह तेऊ देशा का दूर अर थारै दुशमणा निं हुंह तम्हां मारनै दैंदअ। 7तम्हां पाणै आपणैं दुशमण फेरा-फेर गोट दैई मारी, 8मुंह दैणअ तम्हां लै इहअ बल कि थारै पांज़ा आदमी दरल़ाऊंणै तिन्नें शौ आदमी अर थारै शौआ आदमी पाणै तिन्नें दस हज़ार मारी।
9“मुंह करनी तम्हां लै झींण ताकि तम्हैं फल़े-फूले अर मुंह करनी तम्हां लै आपणीं करार पूरी। 10तम्हैं निं पिछ़ली सालो नाज़ खाई मुक्कणैं कि आजू जाणीं नऊंईं साले फसल खुडी कठा हई।
11“मुंह रहणअ सदा तम्हां जैंदरी अर तम्हां लै निं हुंह कधि पिठ फरेऊंदअ। 12मुंह करनी तम्हां जैंदरी हांढ-फेर दैई अर हुंह रहणअ सदा थारअ परमेशर अर तम्हैं हणैं सदा मेरी आपणीं परज़ा।#2 करि. 6:16 13हुंह आसा थारअ परमेशर बिधाता, मंऐं आसा तम्हैं मिसर देशा का एते तैणीं आणै दै काढी कि थारै कैल़ै का गलामीओ जूँ पोर्ही निखल़े। मंऐं किऐ तम्हैं आज़ाद, ऐबै सका तम्हैं इज़ती संघै आज़रअ मूंड करी हांढी।
हुकम नांईं मनणे सज़ा
14-15 #
बधा. 28:15-68
“ज़ै तम्हैं मेरअ नांईं शुणें अर ज़ुंण मंऐं हुकम किऐ, तिन्नां नांईं मने अर मेरी करार चोल़े, 16मुंह दैणीं तम्हां लै एही सज़ा कि तम्हां निं उझ़ुई नां बेशी राम हणअ अर तम्हैं हणैं बरैबाद। तम्हां लै लागणीं शक्रैऊल़ी अर हारदअ-मारदअ ज़अर अर तेता करै हणअ थारी आछी का शुझणअ बंद। तम्हां लै पल़णअ घणअ दुख अर झाख। थारै दुशमणा लुटणीं थारी साल-फसल बी, 17संघा फरेऊंणी मुंह बी तम्हां बाखा लै पिठ अर तम्हैं पाणै थारै दुशमणा फेरा-फेर गोट दैई हारी। ज़ै तम्हां पिछ़ू कुंण दरल़ाऊंदअ बी निं होए, तैबी बी रहणैं तम्हैं डरै ठुहर्दै लागी।
18“ज़ै तेखअ एतरअ हणैं बाद बी तम्हैं मेरी नांईं शुणें, तेखअ रहणअ मुंह थारै हरेकी पापे बदल़ै सात गुणा सज़ा तेभै तैणीं दैंदै लागी 19ज़ेभै तैणीं थारअ घमंड खतम निं होए। मुंह निं तेखअ सरग हणैं दैणअ, थारै मुंडा प्रैंदै हणअ सरग लोहै ज़िहअ लाल अर थारै खूरा हेठै धरती हणीं कांस्सै ज़ेही काठी। 20थारी सारी मैन्थ हणीं बृथा, तेखअ निं थारी ज़िम्मीं दी पज़ैआ हणीं अर नां डाल़ै-बूटै फल़े दाणैं हणैं।
21“ज़ै तम्हैं मुल्है धोखअ दैंदै रहे अर मेरअ हुकम नांईं मने, मुंह पाणीं थारै पापे साबै तम्हां लै तेते सात गुणा आफ़त! 22मुंह छ़ाडणैं तम्हां लै बणें शकारी ज़ीब अर तिन्नां करनै थारै लान्हैं अर डागै-चैणैं धेल़ी-च़िरी खतम। तिन्नां पाणै तम्हां मांझ़ै खास्सै मारी अर थारै देशै निं बाता हांढदअ कुंण मणछ शुझणअ।
23“ज़ै तम्हैं एतरअ हणैं बाद बी मेरी नांईं शुणें, अर तज़ी बी मुंह तम्हां का धोखअ ई भेटे, 24मुंह बी डाहणीं तम्हां बाखा पिठ फरेऊई अर तम्हां लै दैणीं मुंह थारै हरेकी पापे बदल़ै सात गुणा सज़ा। 25मुंह छ़ाडणीं तम्हां संघै जुधा लै सैना किल्हैकि तम्हैं चोल़ी मुंह संघै करार, तेखअ ज़ै तम्हैं बच़णा लै फेर-फिरदै उछ़टै गहल़ा आल़ी नगरी भितरा लै ठुर्हे, तेथ पाणीं मुंह तम्हां जैंदरी मारना लै नबिज़री बमारी अर थारै दुशमणा ढाकणैं तम्हैं तिधी। 26थारै निं खाणां लै नाज़ बी रहणअ अर तेखअ हणीं दस बेटल़ी एकी गेठै रोटी सटेऊंदी कठा, तम्हां सोभी लागणै होछ़ै-होछ़ै म्हार तोली करै खाणैं अर तज़ी बी रहणैं तम्हैं भुखै ई भुखै।
27“तेखअ ज़ै एतरअ हणैं बाद बी तम्हैं मेरी नांईं शुणें अर मुंह तम्हां का धोखअ ई भेटे, 28तेखअ एछणअ तम्हां लै मेरअ कोप अर ज़ुंण तम्हैं पाप किऐ तेता लै दैणीं मुंह तम्हां लै घोर सज़ा! 29तम्हैं हणैं इहै भुखै कि तम्हां पल़णअ आपणैं ई लान्हैंओ मास्स खाणअ। 30उछ़टी धारा प्रैंदै थारी मुहुर्तीए पूज़ा-गाज़ा करने ज़ैगा करनी मुंह खतम अर थारी धूपा दैणें बेदी पाणीं मुंह ढोल़ी, थारी ल्हासा शोटणी मुंह थारी तिन्नां फुटी दी मुहुर्ती प्रैंदै। तेखअ हणीं मुंह तम्हां का नफरत। 31थारी नगरी पबित्र ज़ैगा लाणैं मुंह बाण-भेखल़ अर तेखअ निं तम्हैं बल़ीदानो हूम करी मुंह खुश करी सकदै।
32“थारी ज़ैगा-ज़िम्मीं करनी मुंह पठी खतम अर ज़ुंण थारै दुशमण तेथ आसा बस्सै दै, तिंयां बी हणैं तेता भाल़ी रहैन। 33ज़ांऊं थारी नगरी बाण-भेखल़ लाई अर थारी ज़ैगा-ज़िम्मीं जुधा दी पठी खतम जाए हई, तेखअ छिंगणैं मुंह तम्हैं देशै-देशै।
34-35“ज़ेभै तम्हैं पराऐ देशै कैद होए, तेतरी साला करनअ थारी आपणीं ज़ैगा बशैघ संघा रहणीं भिई बिज़रदी लागी, ज़ुंण तम्हां तिधी रहंदी हर सातुई साला लोल़ी त हुअ।
36-37“तम्हां मांझ़ै ज़ुंण पराऐ देशै गलामी दी होए, तिन्नें मन्नैं पाणीं मुंह एही डअर कि तिंयां डरनै शुक्कै पाचा अल़णे छ़ेल़ शूणीं बी इहै कि तेथ आअ तिन्नां मारदअ कुंण तलबार पाई! ज़ै तिन्नां पिछ़ू कोहै बी निं होए पल़अ द, तैबी हणैं तिंयां एकी-दुजै प्रैंदै लागै दै बधल़दै किल्हैकि तिंयां हणैं इहै दुबल़ै हुऐ दै कि तिन्नां निं आपणैं दुशमणा सम्हनै खल़ै हणें हिम्मत ई हणीं रही दी। 38तम्हां मांझ़ै मरनै कई पराऐ देशै, 39अर ज़ुंण तिन्नां मांझ़ै ज़िऊंदै होए रहै दै, तिंयां गल़णै-ढल़णै आपणैं अर आपणैं दादा-बाबे पाप करनै पिछ़ू दुखा दी।
40-41“पर ज़ै थारी आद-लुआद ऐहा गल्लो पछ़ताअ होए कि मंऐं बिधाता आसा तिन्नां बाखा लै पिठ फरेऊई दी अर तैही आसा तिंयां मंऐं तिन्नें दुशमणे देशै आणै दै, किल्हैकि तिन्नैं अर तिन्नें दादै-बाबै किअ मुंह बिधाता संघै विश्वास घात करी पाप। ज़ै तिंयां मानदारी दी आपणीं गलती मने कि तिन्नैं किअ मुंह बिधाता संघै हठ करी पाप अर तेखअ मेरै साबै ज़िन्दगी ज़िऊंदै लागे,#शधा. 7:51 42तै करनी मुंह सह करार आद ज़ुंण मंऐं तिन्नें दाद-बाब आबराम, इसहाक अर याकबा संघै किई ती। तेखअ थारै एऊ देशा लै बी दैणीं मुंह बर्गत#मूल. 26:3,4; 17:7,8; 28:13,14 43अर तेता दैणअ मुंह तेभै तैणीं बशैघ करनै, ज़ेभै तैणीं तिंयां पराऐ देशै रही मुंह अर मेरै बधाना संघै विश्वास घात करने सज़ा निं भुगती मुक्के।
44“तेखअ तिन्नैं ज़िहअ बी किअ द होए, हुंह आसा तेभै बी तिन्नों परमेशर बिधाता अर हुंह निं तम्हां ज़ातै का पठी छ़ाडदअ आथी अर नां खतम करदअ, ज़ुंण करार मंऐं तिन्नां संघै आसा किई दी, तेता निं हुंह बिस्सरदअ। 45तिन्नें दादा-बाबे तैणीं डाहणीं मुंह सह करार आद, ज़ुंण मंऐं तिंयां पराई ज़ाती नदरी मिसर देशा का आणै काढी कि हुंह तिन्नों परमेशर रहूं, हुंह आसा बिधाता।”
46मोसा थिअ तधू सीनाई धारा ज़धू बिधाता तेऊ का इज़राईली मणछा लै ईंयां बिधी अर बधान खोज़ै।
Currently Selected:
लेबी बधान 26: OSJ
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
