लेबी बधान 11
11
पृथूई दी शुचै अर छ़ोतलै पशू
(बधान 14:3-21)
1तेखअ बोलअ बिधाता मोसा अर हारणा लै, 2“इज़राईली मणछा लै बोला इहअ कि तम्हैं सका पृथूईए तिन्नां पशू अर ज़ीबो मास्स खाई#इब्रा. 9:10 3ज़हा पशूए गोछ़ै अर छ़ल़ू दी च़िरअ हआ अर जगैल़ बी करा। 4-8पर इना मांझ़ै निं तम्हैं ऊँट, बणें मुश्शै अर खरगोशे शिखा खाई किल्हैकि ईंयां जगैल़ ता करा, पर इने थेला दी निं च़िरअ हंदअ। नां तम्हैं सुंगरे शिखा खाई किल्हैकि सुंगरे गोछ़ै च़िरअ ता हआ, पर अह निं जगैल़ करदअ। इना ज़ीबे नां ता तम्हैं शिखा खाई अर नां इना मरी करै छ़ुंहीं, एता करै लागणीं तम्हां छ़ोत।
पाणीं जैंदरे शुचै अर छ़ोतलै ज़ीब
9-12“ज़ेतरै ज़ीब नदी अर समुंदरै पाणीं जैंदरी रहा, तेता मांझ़ै सका तम्हैं तिन्नां ज़ीबा खाई ज़ेथ फैंख अर पिंझ़ै हआ। एता का लाऊआ ज़ुंण ज़ीब पाणीं जैंदरी रहा, तिन्नें शिखा निं खाई, तिन्नां निं मरी करै छ़ुंहीं बी आथी। तिंयां आसा तम्हां लै छ़ोतलै अर तेता करै लागणीं तम्हां छ़ोत।
13-19“सरगै डैऊंदै च़ेल्लू-पखीरू मांझ़ै आसा गरली, मुक्षरलै, सोभी रंगे बाज़, सोभी रंगे काअ, शुतर मुर्गै, च़ोस्सअ, पाणींए काअ, सोभी रंगे हुहल़ू, हांसा ज़िहअ बडअ बतख, हांस, सारस, बगुल्लअ, हिफलअ अर च़मिंधरै आसा छ़ोतलै, इना निं तम्हैं खाई।
शुचै अर छ़ोतलै किल़ै
20-23“ज़ेतरै फैंखा आल़ै किल़ै च़ऊ ज़ांघा हांढा तिन्नां सका तम्हैं खाई, ज़िहअ कि, हर रंगे डेऊणैं आल़ै रैट्टै, घाह जैंदरे पटिक्कल़ै दैणैं आल़ै रैट्टै अर जगिंदरै। एता का लाऊआ ज़ुंण फैंखा आल़ै अर च़ऊ ज़ांघा हांढणै आल़ै किल़ै आसा, तिंयां ज़ीब आसा छ़ोतलै अर तिन्नां निं तम्हैं खाई।
मूंऐं दै ज़ीबा छ़ुंहंणै बाद शुचै हणैंओ बधान
24-28“ज़हा पशूए गोछ़ै अर छ़ल़ू दी च़िरअ आसा पर जगैल़ निं करदै तिन्नां निं मरी करै बी छ़ुंहीं अर नां च़ऊ पाओऐ हांढणै आल़ै तिन्नां ज़ीबे ल्हासा छ़ुंहीं ज़सरै थेल आसा। ज़ै तम्हां का एही किज़ै भूल-च़ूक होए, तै धोऐ आपणैं सारै झिकल़ै पर तज़ी बी रहणैं तम्हैं दोत्ता पोर्ही उडै तैणीं छ़ोतलै।
29-30“नऊल़ै मुश्शै, हर रंगे मुश्शै, हर रंगे गोह, ल्हरोल़ी, छ़बाल़, मगर म्हाछ़, लुगुआल़ अर गिरगिट आसा तम्हां लै छ़ोतलै। 31ज़ुंण बी इना मांझ़ै इना ज़ीबा मरी करै छ़ुंए बी सह हणअ छ़ोतलअ अर तेऊ रहणीं उडै तैणीं छ़ोत लागी। 32इना ज़ीबा मांझ़ै कुंण मरी करै कहा काठे भांडै, झिकल़ै, खाल्हल़ी या कहा किज़ू होरी च़िज़ा दी पल़े, तेता लऐ ज़रूर धोई, पर तज़ी बी रहणीं सह च़ीज़ उडै तैणीं छ़ोतली, तेखअ हणीं सह धैल़अ उडी करै शुची। 33ज़ै इना ज़ीबा मांझ़ै कुंण ज़ीब कहा माट्टे भांडै दी मूंअ द भेटे, तेऊ भांडै पाऐ फाल़ी अर ज़िहअ बी तेऊ भांडै दी डाहअ द होए, तेथ बी लागणीं छ़ोत। 34एऊ भांडै करै ज़ै किज़ू खाणें च़िज़ा दी पाणीं बी पाए, सह बी हणअ पठी छ़ोतलअ अर ज़ुंण एऊ भांडै करै पाणीं झुटे, तेऊ बी लागणीं छ़ोत।
35“ज़ै ईंयां ज़ीब किधी बी मूंऐं दै होए, च़ाऐ सह तंदूर होए या गेठअ, तेता पेच़ै पोर्ही संघा बणाऐं होर। 36पर ज़ै बहूंदी पाणींए गाडा अर बहूंदै पाणींए सअरा दी ईंयां ज़ीब मूंऐं दै होए, तेथ निं छ़ोत लागदी, पर ज़ुंण तिन्नां डागै छ़ुंए सह हणअ छ़ोतलअ। 37तेखअ ज़ै ईंयां ज़ीब बऊंणा लै डाहै दै बेज़ै जैंदरी मूंऐं दै भेटे, तेथ बी निं छ़ोत लागदी। 38पर ज़ै सह बेज़अ पाणीं जैंदरी भिज़दअ होए पाअ द अर तेथ इना ज़ीबा मांझ़ै किज़ै मूंअ द भेटे, तै हुअ सह बेज़अ बी छ़ोतलअ।
39“तेखअ ज़हा पशू खाणें ज़ाज़त मंऐं तम्हां लै आसा दैनी दी, ज़ै तिन्नां मांझ़ै कुंण पशू मरे अर तम्हैं तेऊ छ़ुंए, तै रहणैं तम्हैं उडै तैणीं छ़ोतलै। 40ज़ै कुंण तेऊ पशूए शिखा खाए अर ज़ुंण तेऊ मूंऐं दै पशूए ल्हास च़के, तिंयां धोऐ आपणैं झिकल़ै पठी अर उडै तैणीं रहै छ़ोतलै।
लरुगणैं आल़ै छ़ोतलै ज़ीब
41-42“पृथूई दी ज़ेतरै ज़ीब धरनीं पेटा करै घिस्सरुई करै हांढा, तिंयां आसा छ़ोतलै, इना मांझ़ै निं कोही ज़ीबे शिखा खाई। 43ज़ै तम्हैं इना मांझ़ै किज़ै खाए, तम्हैं हणैं तिन्नां ई ज़िहै च़िल़्हखरै अर छ़ोतलै।
44“हुंह आसा थारअ परमेशर बिधाता, तम्हैं हआ मुल्है शुचै अर पबित्र ज़िहअ हुंह आप्पू आसा। इना छ़ोतलै ज़ीबा खाई निं तम्हैं इना ई ज़िहै च़िल़्हखरै अर छ़ोतलै हआ।#लेब. 19:2; 1 पत. 1:16 45मंऐं आणै तम्हैं मिसर देशा का एते तैणीं कि हुंह थारअ परमेशर होए। तम्हां हुअ ऐबै पबित्र हणअ किल्हैकि हुंह थारअ बिधाता आसा आप्पू बी पबित्र।
46-47“अह बधान खोज़अ मंऐं तम्हां का एते तैणीं कि तम्हां का थोघ लागे कि पशू, च़ेल्लू-पखीरू अर पाणीं जैंदरी रहणैं आल़ै ज़ीब अर धरती दी लरुगणैं आल़ै सोभी ज़ीबा मांझ़ै कुंण खाणां लै शुचअ आसा अर कुंण छ़ोतलअ आसा ज़ेता तम्हैं खाई निं सकदै।”
Currently Selected:
लेबी बधान 11: OSJ
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
