ज़ैहसू 7
7
अकान नाओंए मणछो पाप
1बिधाता बोलअ त इज़राईली लै इहअ कि जेरिहो नगरीए हर च़िज़ा आसा मुंह बिधाता लै अर्पण, तेता करै पठी बरैबाद, तेता मांझ़ै निं आप्पू लै किछ़ै डाही पर तिन्नैं निं इहअ किअ। तिन्नां मांझ़ै त अकान नाओं एक मणछ तेऊ किअ धोखअ अर तेऊ पिछ़ू पल़अ इज़राईली लै बिधातो कोप#7:1 कोप अकाने किअ त इहअ ज़ुण च़िज़ा बिधाता लै भैंटे थिई तेऊ डाही ती तिन्नां च़िज़ा मांझ़ै कई च़िज़ा आप्पू लै, तेता प्रैंदै लागअ थिअ तेऊ बिधातो दोश। अकान थिअ कर्मींओ शोहरू अर जबदीओ पोचअ। सह थिअ यहूदा गोत्रा मांझ़ै जेराह टोली का। #शधा. 5:2
2इज़राईली तै जेरिहो नगरी आपणैं डेरै पाऐ दै, ज़ैहसू छ़ाडै इहअ बोली एई नगरी लै आपणैं भेख लणैं आल़ै, “तम्हैं डेओआ एई नगरी लै संघा एछा तैहा नगरी फेर फिरदअ सारअ मुल्ख ज़ाच़ी-भाल़ी।” तिंयां भेख लणैं आल़ै डेऊए एई नगरी लै ज़ुंण बेताबेन नेल़ बेतेल पुर्बा बाखा आसा। 3भेख लई पुजै तिंयां ज़ैहसू सेटा फिरी संघा खोज़अ इहअ, “एई नगरी संघै जुधा लै निं सारी सैना निंणे ज़रुरत आथी, तेता लै आसा सैना मांझ़ै दूई-चअन हज़ार मर्ध बतेर्है किल्हैकि अह निं खास बडी नगरी आथी।” 4ज़ैहसू छ़ाडै सैना मांझ़ै चअन हज़ार मर्ध कि एई नगरी दी चुटी पल़े। पर नगरी बस्सै दै लोगै काढै तिंयां दरल़ाऊई। 5एई नगरीए लोगै पाऐ इज़राईली सैना मांझ़ै छत्ती ज़ण्हैं मारी अर नगरीए प्रऊल़ी सेटा का काढै धारा उंधै पात्थरे खांनी#7:5 पात्थरे खांनी शबारीम तैणीं च़िक्कदी मारदी दरल़ाऊई। इहअ करै चोल़अ इज़राईली हैअ अर तिन्नां पल़ी खास्सी डअर।
6ज़ैहसू अर इज़राईली सैणैं धेल़ै एऊ दुखै आपणैं घेरीए झिकल़ै, मुंडै पाअ शोग प्रगट करना लै धूल़अ-माट्टअ, संघा रहै सान्हां तैणीं बिधाते करारे मणशू सेटा धरनीं उटै पल़ी। 7ज़ैहसू बोलअ बिधाता का इहअ, “आईओ! ओ म्हारै मालक बिधाता! तंऐं हाम्हैं जरदण नदी आर बाखा लै एते तैणीं आणै कि अमोरी लोग हाम्हां पठी खतम करे? एता का ज़ै हाम्हैं जरदण नदी पार बाखा ई रहंदै, तै नांईं त आझ़ इहअ हणअ! 8हे मेरै मालक, आझ़ हुंह किज़ै बोलूं, इज़राईली आऐ दुशमणा सेटा का मार खाई ठुर्ही! 9ऐहा गल्ला शूणीं गोटणैं हाम्हैं कनानी अर एऊ देशै बस्सै दै होरी लोगा फेर-फिरदै संघा पाणै मारी! तेखअ ताह किज़ै करनअ? तेरै महान नाओंए इज़त किज़ू करै रहणीं?”#लुआ. 32:12; गण. 14:13
10बिधाता बोलअ ज़ैहसू लै इहअ, “खल़अ उझ़ू! तूह किल्है आसा इहअ उटी बाखा रहअ द धरनीं बधल़ूई? 11इज़राईली किअ पाप! तिन्नैं चोल़ी सह करार ज़ुंण मुंह संघै किई ती। ज़ुंण अर्पण किई दी च़िज़ा पठी खतम करनी ती, तेता मांझ़ै आणी तिन्नैं कई च़िज़ा आप्पू संघै। सह किई तिन्नैं च़ोरी, तेता लै बोलअ तिन्नैं झ़ुठअ संघा डाही तिंयां आपणीं च़िज़ा संघै राल़ी! 12तैही निं इज़राईली आपणैं दुशमणा सम्हनै टेक्की सकै। तिंयां आऐ आपणैं दुशमणा सेटा का मार खांदी ठुर्ही किल्हैकि तिंयां हुऐ ऐबै आप्पू ई तिन्नां च़िज़ा ज़िहै ज़ुंण अर्पण किई दी पठी खतम करना लै आसा! हुंह निं ऐबै तेभै तैणीं तम्हां संघै रहंदअ, ज़ेभै तैणीं तम्हैं तिन्नां च़िज़ा पठी खतम निं करे ज़ेता लै मंऐं बोली त डाहअ द कि पठी करै पठी बरैबाद।
13“उझ़ू! तिन्नां मणछे कर शुधी संघा आण दोत्ती तिन्नां मुंह सेटा लै। तिन्नां बोलै काल्ला रहै तैर्हुई, किल्हैकि हुंह इज़राईलो परमेशर बिधाता बोला इहअ, ‘इज़राईल, थारी ज़ैदाता संघै आई एही च़िज़ा ज़ेता लै मंऐं पठी खतम करनैओ हुकम किअ त! ज़ेभै तैणीं तम्हैं इना च़िज़ा आप्पू मांझ़ा का दूर निं करे, तेभै तैणीं निं तम्हैं आपणैं दुशमणो मकाबलअ करी सकदै!’ 14तिन्नां का खोज़ै इहअ कि दोत्ती करनै तम्हैं गोत्र-गोत्रे साबै मुंह सम्हनै खल़ै। मुंह बिधाता खोज़णअ आप्पै कि कहा गोत्रा दी आसा खोट अर तिंयां एछै टोली दर टोली आजू। ज़हा टोली दी हुंह खोट खोज़ूं तैहा टोलीए एछै सोभ टोल बारी-बारी आजू अर ज़हा टोला दी हुंह खोट खोज़ूं तिन्नें टबरा मांझ़ै एछै सोभ मर्ध एक-एक करी मुंह सेटा आजू।#1 शमू. 14:41-42
15“मुंह बिधाता रहैऊंणअ आप्पै कि तिंयां च़िज़ा कुंणी आसा च़ोरी दी, तेऊ मणछा पाऐ मारी, संघा करै तेऊ मणछा तेऊए सोभी समान अर टबरा संघी आगी जैंदरी दहई पठी खतम। किल्हैकि तेऊ चोल़ी मुंह संघै करार अर इहअ करै लाई तेऊ इज़राईला दी घोर लानत।”
16दुजी धैल़ै दोत्ती शादै ज़ैहसू सोभै इज़राईली गोत्र-गोत्रे साबै बिधाता सेटा आजू अर खोट निखल़ी यहूदा गोत्रा दी। 17ज़ैहसू किअ यहूदा गोत्र तिन्नें टोली-टोलीए साबै आजू अर खोट निखल़ी जेराह टोली दी। तेखअ शादै तेऊ जेराह टोलीए लोग एक-एक टोल करी अर खोट निखल़ी जबदीए टबरा दी। 18तेखअ शादै तेऊ जेराह टोली का जबदीए टबरा मांझ़ै एक-एक करी आजू अर खोट निखल़ी कर्मींए शोहरू अकाना दी ज़ुंण जबदीओ पोचअ थिअ। 19ज़ैहसू बोलअ तेऊ लै इहअ, “शोहरूआ, इज़राईले परमेशर बिधातो अदर कर, एऊ सेटा खोज़ इधी शुची गल्ला संघा मन आपणीं गलती। ज़ीबाण, ऐबै खोज़ मुखा तंऐं किज़ै किअ, मुखा निं छ़पाअ करै।”
20अकानै दैनअ ज़ैहसू लै ज़बाब, “अह गल्ल आसा शुची, मेरै भलै हुअ इज़राईले परमेशर बिधाता लै पाप। मेरै हुई एही भूल कि 21ज़ुंण च़िज़ा हाम्हैं लुटी ती, तेथ जैंदरी शुझुअ मुखा बाबेल देशो एक बधिया च़ोल़अ दूई शौ च़ंदीए#7:21 दूई शौ च़ंदीए कोई दूई किलू च़ंदी सिक्कै अर पज़ाह सिक्कै बराबर गर्की एक सुन्नें फाल़ी। हुंह लाल़छ़ुअ तिन्नां च़िज़ा लै संघा डाही मंऐं तिंयां आप्पू लै। तिंयां च़िज़ा आसा मंऐं आपणैं डेरै भितरी धरनीं खाढै डाही दी दाबी अर सोभी का थाल्लै आसा तेथ च़ंदी डाही दी।”
22ज़ैहसू छ़ाडै तेभी दूत अर तिंयां डेऊए ठुर्ही अकाने खिम्भा भितरा लै। ज़िहअ तेऊ खोज़अ त, तिंयां च़ोरी डाही दी च़िज़ा भेटी तिन्नां तेही ई खाढै दाबी डाही दी अर सोभी का थाल्लै ती च़ंदी डाही दी। 23तिन्नैं आणी तिंयां सोभै च़िज़ा तेऊए डेरै का बागै ज़ैहसू अर सोभी इज़राईली सम्हनै संघा डाही बिधाते करारे मणशू आजू धरनीं। 24तेखअ डेऊअ ज़ैहसू सोभी इज़राईली संघा निंईं आकोर नाओंए खागा लै, जेराह खिंबे अकान निंयं तिन्नैं आप्पू संघै। सह च़ोल़अ, च़ंदी अर सुन्नअ बी निंयं। तेऊए शोहरू-शोहरी, डागै-चैणैं, गाधे हेल़्ह, तेऊओ खिम्भ अर सोभ समान बी निंयैं झाल़ी ज़ेतो सह मालक थिअ। 25तिधी पुजी बोलअ ज़ैहसू अकाना लै, “तंऐं हाम्हां लै अह आफ़त किल्है आणी? ऐबै आणी बिधाता सह आफ़त ताल्है!” तेखअ दैनअ सोभी इज़राईली अकान अर तेऊए टबरा लै पात्थरो ढो संघा पाऐ तिंयां मारी अर तिन्नें सोभी समाना संघी पाई तिन्नें ल्हासा आगी दी दहई। 26तेखअ डाहअ तिन्नैं तेऊ प्रैंदै पात्थरो बडअ रूल़ लाई, सह रूल़ आसा आझ़ तैणीं तैहा ज़ैगा तिहअ ई। तिधा का आसा तैहा ज़ैगा नाअं आफ़तो खाग पल़अ द।#ज़ैह. 2:15
इहअ करै हुअ खिरी इज़राईली लै बिधातो रोश्श फांभअ।
Currently Selected:
ज़ैहसू 7: OSJ
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
