आयूब 40
40
हुंह आसा बिधाता ज़हा का सारअ बल आसा
1तेखअ बोलअ बिधाता आयूबा लै इहअ,
2“आयूब, तंऐं किई मुंह परमेशरा संघै हठ ज़हा का सारअ बल आसा,
ऐबै लाई तंऐं छ़ाड़ छ़ाडी कि तंऐं ज़बाब लाअ दैई?”
3आयूबै दैनअ बिधाता लै ज़बाब,
4“हे बिधाता, हुंह निं ताह सेटा किछ़ बी आथी,
मंऐं ताल्है किज़ै ज़बाब लाअ दैई?
ऐबै निं हुंह किछ़ै बोल्दअ।
5मंऐं हेरअ बतेर्हअ बोली।
ऐबै निं मुखा बोल़णा लै किछ़ै रहअ।”
6तेखअ बोलअ बिधाता ढिश-बागरी जैंदरा का आयूबा लै इहअ,
7“ऐबै उझ़ू आज़रअ खल़अ
संघा दै मेरी गल्लो ज़बाब।
8तूह कै इहअ च़ाहा बोल़णअ कि मेरअ नसाफ निं शुचअ आथी?
तूह कै इहअ बोला कि हुंह आसा गलत अर तूह आसा शुचअ।
9तूह कै मुंह ज़िहअ बलबान आसा?
तेरै बोल कै मुंह ज़ेही गुल़ूबिज़ल़ूए छ़ेल़ छ़ाडा?
10ज़ै इहअ आसा, तै उझ़ू इज़ती संघै शाना दी खल़अ,
तै रहैऊ कि तूह आसा महान ताकि लोग तेरअ अदर करे।
11तिन्नां बाखा भाल़ ज़ुंण घमंडी आसा,
आपणअ रोश्श दै तिन्नां लै तरैल़ी संघा कर तिन्नां निऊंऐं।
12हाँ, फेर भाल़ तिन्नां बाखा संघा कर तिन्नां निऊंऐं,
कदुष्ट ज़िधी खल़ै आसा, तिन्नां बदल़ तिधा का धरनीं।
13तिन्नां सोभी दाब धरनीं माट्टै जैंदरी,
तिन्नां डाह जम्परी बान्हीं।
14तै मनूं सोभी का आजी ताह हुंह आप्पै,
अर इहअ कि तूह सका आपणैं ज़ोरै ज़िती।
15पाणीं नेल़ रहणैं आल़ै तेऊ दैंत्तर ज़ीबा भाल़,
ज़ुंण मंऐं ताह ई संघै बणाअं त,
सह खा बल्दा ज़िहअ घाह।
16तेऊ भाल़ किहअ ज़ोर आसा अर
तेऊए पेटे नसा दी भाल़ किहअ बल आसा!
17तेऊओ लिंघणअ आसा केल़ुई ज़िहअ,
तेऊए ज़ांघे नसा आसा बेघै पाक्की।
18तेऊए हाडकै आसा कांस्सै ज़िहै,
तेऊए पिल्ली आसा लोहे खुंढै ज़ेही।
19होरी सोभी ज़ीबा का नुआहरी गल्ल आसा तेऊ दी एही कि
तेऊ सका सिधअ सह ई परमेशर हारी ज़ुंणी सह बणाअं द आसा।
20तेऊए पेटै खाणां लै भेटा धारा घाह,
ज़ेथ बणें ज़ीबै खलैर हआ पाअ द।
21सह रहा कंऊंले फूले बूटे झ़ाकल़ा हेठै सुत्ती अर
सअरै नगाल़ै हेठै डुघी च़िक्करै जैंदरी लुक्की।
22सह रहा बडै-बडै कांडे झ़ाकल़े छ़ैल्ली अर
फेर-फिरदै मधनूंए बूटा जैंदरी।
23तेऊ निं दरैऊआ एछणें डअर बी हंदी,
जरदण नदी बी तेऊए गल़ै तैणीं पुजे, सह निं चूँ करदअ।
24तेऊए आछी छ़ार पाई निं तेऊ कोहै ढाकी सकदअ।
नां कुंण तेऊए नाकै नकेल लाई सकदअ।”
Currently Selected:
आयूब 40: OSJ
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
