जोहन्‍ना 9

ज़ल्मां ओर्ही कांणअ मणछ ठीक करनअ

1तिधा का डेऊंदी बारी भाल़अ ईशू एक मणछ। सह ज़ल्मां ओर्ही कांणअ। 2तेऊए च़ेल्‍लै पुछ़अ तेऊ का, “हे गूरू, कुंणी आसा किअ द पाप कि अह कांणअ पैईदा, एऊ कांणै मणछै कि एऊए ईज-बाब?”

3ईशू दैनअ तिन्‍नां लै ज़बाब, “नां एऊ पाप किअ अर नां एऊए ईज-बाब। पर अह हुअ एते तैणीं कि परमेशरो काम एऊ दी प्रगट होए। 4ज़ुंणी हुंह छ़ाडअ द आसा, तेऊओ काम आसा धैल़ी ई धैल़ी करनअ ज़रूरी। सह राच आसा एछणैं आल़ी तेथ निं कोहै काम करी सकदअ। 5ज़ेभै तैणीं हुंह एऊ संसारै आसा, तेभै तैणीं आसा हुंह संसारा लै प्रैश्शअ।”#9:5 जोह. 8:12

6इहअ बोली थुक्‍कअ ईशू धरनीं अर तेता करै मुछ़अ माट्टअ, संघा बोलअ सह माट्टअ तेऊ कांणै मणछे आछी मल़ी तेऊ लै, 7“डेऊ, शिलोहे सअरा दी धो आपणअ मुंह।” मतलब, “छ़ाडअ द।” तेऊ कांणै बी किअ तिहअ ई, ज़ांऊं तेऊ सअरा दी मुंह धोअ अर सह फिरअ शरैछी आछी बापस।#ईशा. 35:5

8तेखअ तेऊ ओरी-पोरी रहणैं आल़ै ज़ुंणी सह कांणअ पैहलै त भाल़अ द तिंयां लागै आप्पू मांझ़ै गल्‍ला करदै, “अह सह ई कांणअ निं आथी ज़ुंण एसी बाती भिख मांगदअ हआ त?” 9कई बोलअ इहअ, “हाँ हेरे, अह आसा सह ई।” कई बोलअ इहअ, “अह निं आथी, पर अह आसा तेऊ ज़िहअ हेरनअ कुंण होर।”

पर तेऊ ज़ुंण कांणअ त, तेऊ बोलअ आप्पै, “हुंह आसा सह ई ज़ुंण पैहलै कांणअ त।”

10तेखअ लागै तिंयां लोग तेऊ पुछ़दै, “ताखा किहअ करै लागअ शुझदअ?”

11तेऊ मणछै दैनअ तिन्‍नां लै ज़बाब, “एकी ईशू नाओंए मणछै मुछ़अ माट्टअ अर सह मल़अ मेरी आछी संघा बोलअ मुल्है कि डेऊ, शिलोहे सअरा दी धो आपणअ मुंह। हुंबी डेऊअ अर आछी धोई करै लागअ मुखा शुझणअ।”

12तिन्‍नैं पुछ़अ तेऊ मणछा का, “सह किधी आसा?”

तेऊ बोलअ, “मुखा निं थोघै।”

कांणअ मणछ फरीसी सेटा लै निंणअ

13ज़ुंण सह मणछ पैहलै कांणअ त लोगै निंयं सह फरीसी सेटा लै। 14ज़हा धैल़ी ईशू माट्टअ मुछ़ी तेऊए आछी लाअ, सह थिई बशैघे धैल़ी। 15फरीसी पुछ़अ कांणै मणछा का, “ताखा किहअ करै लागअ शुझदअ?” तेऊ खोज़अ तिन्‍नां का, “तेऊ लाअ मेरी आछी माट्टअ अर ज़ांऊं मंऐं आछी धोई अर मुखा लागअ शुझदअ।”

16ऐहा गल्‍ला शूणीं बोलअ फरीसी, “अह ईशू निं परमेशरो आथी। किल्हैकि अह निं बशैघे धैल़ी मंदअ आथी।” तेखअ बोलअ तिन्‍नैं होरी, “पापी मणछ किधी सका इहै नछ़ैण, च़मत्कार रहैऊई?” इहअ करै पल़ी ऐहा गल्‍ला लै तिन्‍नां मांझ़ै फूट।

17तिन्‍नैं पुछ़अ तेऊ कांणै का भिई, “ज़ुंणी तेरी कांणी आछी ठीक किई, तेऊ मणछे बारै तेरी कै राऐ आसा?”

कांणै बोलअ तिन्‍नां लै, “सह आसा परमेशरो गूर।”

18पर यहूदी सैणैं निं विश्वास हुअ कि अह त पैहलै कांणअ अर ऐबै लागअ एऊ का शुझदअ। तिन्‍नैं पुछ़अ तेऊए ईजा-बाबा का, 19“अह कै थारअ शोहरू आसा ज़हा लै तम्हैं इहअ बोला कि अह त हुऐ ज़ल्मां ओर्ही कांणअ? ऐबै किहअ करै लागअ एऊ का शुझदअ?”

20तेऊए ईज-बाब दैनअ ज़बाब, “हाम्हां का आसा थोघ कि अह आसा म्हारअ शोहरू अर अह त हुऐ ज़ल्मां ओर्ही कांणअ। 21पर ऐहा गल्‍लो निं हाम्हां का थोघ आथी कि एऊ का किहअ करै लागअ शुझदअ अर नां हाम्हां का इहअ थोघ आथी कि अह कुंणी किअ कांणै का ठीक। अह आसा आप्पै सैणअ एऊ ई का पुछ़ा, अह सका आपणैं बारै आप्पै खोज़ी।”

22एही गल्‍ला बोली तेऊए ईज-बाब तै कि तिन्‍नां लागा ती यहूदी का डअर। किल्हैकि यहूदी त एक्‍कअ हेरअ द करी कि ज़ुंण बी ईशू लै मसीहा बोले तेऊ निं सभागृहा एछणैं दैणअ। 23तैही बोला तेऊए ईज-बाब इहअ, “अह आसा सैणअ एऊ ई का पुछ़ा।”

24तेखअ शादअ तिन्‍नैं दुजी बारी सह कांणअ मणछ अर तेऊ लै बोलअ, “ऐहा गल्‍लो डाह धैन परमेशर आसा भाल़अ लागअ द, शुची-शुची गल्‍ला खोज़! हाम्हां का आसा थोघ कि सह मणछ आसा पापी।”

25तेऊ दैनअ तिन्‍नां लै ज़बाब, “मुखा निं ऐहा गल्‍लो थोघ आथी कि सह पापी आसा किई नांईं। पर ऐहा गल्‍लो थोघ आसा मुखा ज़रूर कि हुंह त पैहलै कांणअ अर ऐबै लागअ मुखा शुझदअ।”

26तिन्‍नैं पुछ़अ तेऊ का भिई इहअ, “तेऊ ताल्है किज़ै किअ? तेरी आछी किहअ करै किई ठीक?”

27तेऊ बोलअ तिन्‍नां लै, “मंऐं हेरअ तम्हां का खोज़ी अर तम्हैं हेरअ शूणीं, ऐबै दुजी बारी किज़ू लै च़ाहा शुणनअ? तम्हैं बी तेऊए च़ेल्‍लै किनी च़ाहा हणअ?”

28तेखअ लागै तिंयां तेऊ लै गाल़ी दैंदै, “तूह ई आसा तेऊओ च़ेल्‍लअ, हाम्हैं आसा मोसा गूरे च़ेल्‍लै। 29हाम्हां का आसा थोघ कि परमेशरै किई मोसा संघै गल्‍ला, पर एऊ मणछो निं हाम्हां का थोघै कि अह किधो आसा।”

30कांणै दैनअ तिन्‍नां लै ज़बाब, “अह ता रहैनीए गल्‍ल आसा कि तम्हां का निं थोघै कि सह किधो आसा, तैबी किई तेऊ मेरी आछी ठीक। 31हाम्हां का आसा थोघ कि परमेशर निं पापी मणछे शुणदअ। पर ज़ै कुंण परमेशरो भगत होए अर तेऊए मरज़ी दी करे, सह शूणां तेऊओ।#सैणीं. 15:19

32“संसार शुरू हणैं ओर्ही निं कोही कधू इहअ शूणअ कि ज़ल्मां ओर्ही कांणअ मणछ किअ होए कुंणी ठीक! 33ज़ै सह मणछ परमेशरो नांईं आथी तै निं सह किछ़ै करी सकदअ त!”

34तिन्‍नैं बोलअ तेऊ लै, “तूह, आसा पापा दी हुअ द, तंऐं कै लाऐ हाम्हैं सखाऊई?” तेखअ काढअ सह तिन्‍नैं बागा लै।

आत्मां दी कांणै हणअ

35ईशू का गअ इना गल्‍लो थोघ लागी अर ज़ांऊं तेऊ सह कांणअ मणछ भेटअ, तेऊ का पुछ़अ, “कै तूह परमेशरे पूता दी विश्वास करा?”

36तेऊ दैनअ ज़बाब, “हे मालक, सह परमेशरो पूत कुंण आसा कि ज़हा दी हुंह विश्वास करूं?”

37ईशू बोलअ तेऊ लै, “तंऐं आसा सह भाल़अ द, सह आसा हुंह ज़ुंण ताह संघै गल्‍ला करदअ आसा लागअ द।”

38तेखअ बोलअ तेऊ मणछै, “हे प्रभू, हुंह करा विश्वास।” तेखअ टेक्‍कअ तेऊ ईशू सेटा माथअ।

39तेखअ बोलअ ईशू तेऊ लै, “हुंह आसा आअ द एऊ संसारा लै नसाफ करदअ ताकि ज़ुंण कांणै आसा तिन्‍नां का शुझदअ लागे अर ज़हा का शुझिआ, तिंयां होए कांणै।”

40ज़ुंण फरीसी तेऊ संघा तै तिन्‍नैं बोलअ इना गल्‍ला शूणीं ईशू लै, “तेरअ कै मतलब आसा हाम्हैं बी कै कांणै आसा?”

41ईशू बोलअ तिन्‍नां लै, “ज़ै तम्हैं कांणै हंदै ता, तै नांईं तै तम्हैं पापी हणैं। पर तम्हैं बोला इहअ कि तम्हां का शुझिआ! इहअ करै निं थारै पाप माफ हणैं।”

Currently Selected:

जोहन्‍ना 9: OSJ

Highlight

Copy

Compare