जोहन्ना 7
7
ईशू अर तेऊए भाई
1इना गल्ला हणैं का बाद रहअ ईशू गलील मुल्खै ई हांढदअ लागी, यहूदी सैणैं च़ाहा तै ईशू मारनअ, तै निं सह यहूदा मुल्खा लै डेऊअ। 2#लेब. 23:34यहूदी मणछे छ़ानींओ थैर त नेल़, 3एते तैणीं बोलअ तेऊए होरी भाऊ इहअ, “इधा का डेऊ यहूदा मुल्खै छ़ानींए थैरा लै, ताकि ज़ुंण काम तूह करा तिन्नां च़मत्कारा तेरै च़ेल्लै बी भाल़े। 4किल्हैकि इहअ निं कोहै हंदअ ज़ुंण पिठी पिछ़ू काम करा अर मशूर निं हणअ च़ाहंदअ। ज़ुंण च़मत्कारे काम तूह करा तिन्नां रहैऊ संसारै सोभी का।” 5(किल्हैकि तेऊए भाऊ बी निं तेऊ दी विश्वास करदै तै)।
6ईशू दैनअ तिन्नां लै ज़बाब, “मेरअ बगत निं अज़ी आअ, अह सारअ बगत आसा थारअ। 7अह संसार निं तम्हां संघै दुशमण हई सकदअ। पर मुंह संघै डाहा ज़ीद इहअ करै कि हुंह दैआ तेऊए खलाफ शाजत कि एऊए काम आसा बूरै। 8तम्हैं डेओआ थैरा लै, हुंह निं एऊ थैरा लै तै डेऊंदअ कि मेरअ बगत निं अज़ी पूरअ हुई।” 9तिन्नां का एही गल्ला करी रह सह गलील मुल्खै तिधी।
छ़ानींए थैरा दी ईशू
10पर ज़ांऊं तेऊए भाई थैरा लै डेऊऐ, सह डेऊअ पिछ़ू आपणैं साबै आप्पू बी थैरा लै, पर प्रगटअ निं डेऊअ। 11यहूदी मणछ लागै पुछ़दै कि सह किधी आसा? 12संघा लागी लोगा मांझ़ै पिठी पिछ़ू ईशूए बारै कई गल्ला हंदी, कई लागै बोल्दै, “सह आसा भलअ मणछ।” कई बोलअ इहअ, “अह हआ लोगा शकाऊंदअ लागअ द।” 13तैबी निं यहूदी मणछे डरै कोही बी एते बारै खुल्है आम गल्ला किई।
थैरा दी ईशूए शिक्षा
14ज़ांऊं छ़ानींए थैरे आधी धैल़ी-बिति अर ईशू लागअ भबने खोल़ै पुजी लोगा लै शिक्षा दैंदअ। 15एता भाल़ी हुऐ यहूदी सैणैं रहैन अर तिंयां लागै बोल्दै, “एऊ बाझ़ी पहल़ै एतरी बिद्या किधा का शिखल़ी?”
16ईशू दैनअ तिन्नां लै ज़बाब, “ज़ुंण समाद हुंह खोज़ा अह निं मेरअ आथी पर अह आसा तेऊओ ज़ुंणी हुंह संसारा लै आसा छ़ाडअ द। 17ज़ै कुंण परमेशरे मरज़ी दी रहे, तेऊ हेरनी ईंयां गल्ला समझ़ी कि ईंयां परमेशरा बाखा आसा कि मंऐं आप्पू बाखा खोज़ी?
18 “ज़ुंण आप्पू बाखा किज़ै बोला, सह च़ाहा आपणीं बड़ैई करनी, पर ज़ुंण आपणैं छ़ाडणैं आल़ेए बड़ैई च़ाहा करनी, सह हआ हर गल्ला दी शुचअ अर तेऊ दी निं कोई पाप बूराई हंदी। 19परमेशरे गूर मोसा कै तम्हां लै बधान निं दैनअ त? तैबी निं तम्हैं सोभ तैहा बिधीए साबै करदै। तम्हैं किल्है च़ाहा मुंह मारनअ?”
20यहूदी सैणैं दैनअ ईशू लै ज़बाब, “ताह दी आसा भूत, तूह कुंणी आसा लाअ द मारी?”
21ईशू दैनअ तिन्नां लै ज़बाब, “मंऐं किअ एक च़मत्कारो काम, अर तम्हैं हआ तेता लै रहैन। 22तैही आसा परमेशरे गूर मोसा तम्हां लै खतैर करनैओ हुकम दैनअ द। अह निं आथी मोसा गूरा करै, पर अह आसा दादा-बाबा ओर्ही रबाज़ अर मणछो खतैर करा तम्हैं बशैघे धैल़ी!#7:22 मूल. 17:10-13; लेब. 12:3
23 “ज़ै तम्हैं बशैघे पबित्र धैल़ी दी मणछो खतैर करा कि मोसा गूरो बधान निं लोल़ी टल़अ, तै तम्हैं मुल्है ऐहा गल्लो दोश किल्है लाआ कि बशैघे धैल़ी किअ एक बमार मणछ बमारी का बिलकुल ठीक? 24कहा मणछे मुंहां भाल़ी नसाफ निं करा, पर धर्मां दी रही करै करा नसाफ।”#7:24 ईशा. 11:3; जोह. 8:15
कै ईशू ई आसा मसीहा?
25तेखअ एरुशलेम नगरी रहणैं आल़ै कई लोग लागै आप्पू मांझ़ै गल्ला करदै, “अह सह ई निं आथी, ज़हा मारना लै लोल़ै आसा लागै दै? 26पर भाल़ा, अह आसा खुल्है आम गल्ला करदअ लागअ द! एऊ का निं कुंण खोज़दअ बी आथी! कि इहअ हुअ होए कि ज़ुंण सैणैं एऊ मारनअ च़ाहा, तिन्नां बी गअ होए थोघ लागी कि अह आसा मसीहा? 27एऊओ थोघ ता आसा हाम्हां का कि अह किधो आसा, पर ज़ेभै मसीहा एछणअ, तेभै निं कोही का थोघ हणअ कि सह किधा का आसा।”
28तेखअ बोलअ ईशू भबने खोल़ै शिक्षा दैंदी ज़ोरै-ज़ोरै, “मेरअ ता आसा तम्हां का थोघ अर इहअ बी आसा थोघ कि हुंह किधा का आसा। हुंह निं आप्पै आथी आअ द, पर ज़ुंणी हुंह संसारा लै आसा छ़ाडअ द, सह आसा शुचअ, तेऊओ थोघ निं तम्हां का आथी। 29पर मुखा आसा तेऊओ थोघ, किल्हैकि हुंह आसा तेऊ का आअ द अर तेऊ ई आसा हुंह संसारा लै छ़ाडअ द।”
30ऐहा गल्ला पिछ़ू च़ाहा तै यहूदी सैणैं तेऊ कैद करनअ, पर कोहै निं तेऊ कैद करना लै आजू निखल़अ, किल्हैकि तेऊओ बगत निं अज़ी आअ त।
31तेतरै खास्सै मणछा मांझ़ै किअ कई लोगै विश्वास अर तेखअ लागै तिंयां बोल्दै, “मसीहा ज़ेभै एछणअ, तेऊ कै एता का खास्सै स्वर्गे नछ़ैण अर च़मत्कार रहैऊंणै ज़ुंण एऊ रहैऊऐ?”
ईशू कैद करने कोशिश
32फरीसी शूणैं च़ुप्प-च़ुप्पै ईशूए बारै लोग इना गल्ला करदै। तेखअ छ़ाडै बडै प्रोहतै अर फरीसी ईशू ढाकणा लै सपाही। 33ऐहा गल्ला लै बोलअ ईशू, “हुंह आसा तम्हां संघै थोल़ी घल़ी अर तेखअ डेऊणअ मुंह तेऊ सेटा लै फिरी ज़ुंणी हुंह संसारा लै आसा छ़ाडअ द। 34तम्हैं लागणै मुंह लोल़ै पर तम्हां निं हुंह भेटणअ। ज़िधा लै हुंह च़ाल्लअ, तिधी निं तम्हैं एछी सकदै।” 35यहूदी सैणैं लागै आप्पू मांझ़ै गल्ला करदै, “अह इहअ किधा लै डेऊणअ कि अह निं हाम्हां भेटी च़ाल्लअ। अह तिन्नां यूनानी सेटा लै किनी डेऊणअ ज़ुंण सारै दी छिंघुई आसा बस्सै दै अर तिन्नां का बी खोज़े अह इना नऊंईं गल्ला? 36अह एऊ किज़ै गल्ल बोली, ‘तम्हैं हणैं मुंह लोल़ै, अर तम्हां निं हुंह भेटणअ आथी, अर ज़िधी हुंह आसा तिधी निं तम्हैं एछी सकदै?’”
ज़िन्दगी दैणैं आल़ै पाणींए गाडा
37तेखअ थैरे खिरीए धैल़ै, ज़ुंण सोभी का बडअ धैल़अ आसा, ईशू लागअ लोगा मांझ़ै खल़्हुई करै ज़ोरै-ज़ोरै बोल्दअ, “ज़ै कुंण नचिशअ होए, सह एछै मुंह सेटा।#7:37 ईशा. 55:1 38ज़िहअ पबित्र शास्त्रा दी आसा लिखअ द, ‘ज़ुंण मुंह दी विश्वास करे, तेऊए दिला का बगणीं ज़िन्दगी दैणैं आल़ै पाणींए गाडा।’”
39ईशू बोली ती ईंयां गल्ला पबित्र आत्में बारै दी, ज़ुंण विश्वास करनै आल़ै लै एछणैं आल़ी ती। किल्हैकि पबित्र आत्मां निं अज़ी बी आई ती। किल्हैकि ईशू निं अज़ी बी आपणैं प्रतप्पा दी पुजी त।
40तेखअ बोलअ लोगा मांझ़ै कई इना गल्ला शूणीं इहअ, “अह आसा सच्च़ी परमेशरो सह ई गूर ज़हा हाम्हैं न्हैल़ै आसा लागै दै।” 41तेखअ होरी बोलअ इहअ, “अह आसा मसीहा।” पर कई बोलअ इहअ, “अह निं मसीहा हई सकदअ। किल्हैकि मसीहा निं गलील मुल्खा का एछणअ। 42पबित्र शास्त्रा दी आसा इहअ लिखअ द, ‘मसीहा एछणअ राज़ै दाबेदे खिंबा का अर बेतलेम नाओंऐं गराऊंआं का ज़िधी राज़अ दाबेद रहा त?’”#ईशा. 11:1; मिक. 5:2
43ऐहा गल्ला लै पल़ी लोगा आप्पू मांझ़ै फूट। 44तिन्नां मांझ़ै च़ाहा तै कई लोग ईशू कैद करनअ, पर तिन्नां मांझ़ै निं कोहै तेऊ कैद करना लै आजू निखल़ै।
यहूदी सैणैंओ विश्वास निं करनअ
45ज़ांऊं सपाही बडै प्रोहता अर फरीसी सेटा बापस फिरै, तिन्नैं पुछ़अ सपाही का, “तम्हैं किल्है निं सह कैद किअ?”
46सपाही तिन्नां लै बोलअ, “एऊ ज़ेही गल्ला निं आझ़ तैणीं कोही बी मणछ किई।”
47फरीसी पंथे लोगै बोलअ तिन्नां लै, “तम्हैं बी किनी गऐ तेऊ गल्ला दी एछी? 48अफसर अर फरीसी मांझ़ै कहा एकी बी आसा तेऊ दी विश्वास? 49पर ईंयां ज़हा का बधानो थोघ निं आथी, ईंयां आसा परमेशरे सज़ा हेठै।”
50निकूदमास ज़ुंण पैहलै ईशू सेटा लै आअ त अर सह बी थिअ तिन्नां संघै तिधी, तेऊ बोलअ तिन्नां लै इहअ, 51“म्हारै बधाने साबै निं कोही मणछा लै तेभै तैणीं दोश लागदअ ज़ेभै तैणीं पैहलै तेऊए शूणीं समझ़ी नां लए कि तेऊ कै किअ।” 52तिन्नैं दैनअ तेऊ लै ज़बाब, “तुबी गलील मुल्खा का आसा? शास्त्रा दी लोल़ अर भाल़ कि गलील मुल्खा का निं कोहै परमेशरो गूर निखल़ी सकदअ।” 53तेखअ लागै सोभै आपणैं-आपणैं घअरा लै हांढदै।
Currently Selected:
जोहन्ना 7: OSJ
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
