जोहन्‍ना 2

गलील मुल्खे काना गराऊंऐं पैहलअ च़मत्कार

1तेखअ चिऊथै धैल़ै त गलील मुल्खै काना गराऊंऐं कसरअ बैह, ईशूए ईज बी थिई तिधी बैहा लै डेऊई दी। 2ईशू अर तेऊए च़ेल्‍लै लै बी त बैहा लै छ़ांदअ। 3ज़ांऊं बरातू लै दाखे रसे कामीं पल़ी। ईशूए ईज लागी बोल्दी, “घअरा आल़ै का निं दाखो रस रहअ।”

4ईशू बोलअ तैहा लै इहअ, “ईजै, ताह निं एते फिकर करने ज़रुरत आथी?

“अज़ी निं मेरअ बगत आई।”

5तेखअ बोलअ ईशूए ईजै दासा लै, “ज़िहअ-ज़िहअ अह तम्हां लै बोले, तिहअ-तिहअ करै।”

6तिधी थिऐ यहूदी मणछे हाथा-खूरा धोई शुचै हणें रबाज़े साबै पात्थरे छ़ह घल़ै डाहै दै, ज़ेथ भितरी दूई-दूई, चअन-चअन मण एछा त। 7ईशू बोलअ तिन्‍नां लै, “इना घल़ै दी भरा पाणीं।” तिन्‍नैं भरै तिंयां घल़ै टिरा बहूंदै। 8तेखअ बोलअ ईशू तिन्‍नां दासा लै, “ऐबै निंयां एता का काढी शैहणा सेटा।” तिन्‍नैं बी किअ तेखअ तिहअ ई।

9ज़ांऊं शैहणै सह पाणीं च़ाखअ, सह थिअ दाखो रस गअ द बणी, पर तेऊ का निं थोघ त कि अह किधा का आणअ। पर तिन्‍नां दासा का थिअ थोघ ज़ुंणी सह पाणीं काढअ त। तेखअ शादअ शैहण गरांईं लाल़अ अर तेऊ लै बोलअ, 10“सोभ मणछ दैआ पैहलै बधिया दाखो रस अर ज़ांऊं लोग झुटी करै रज्ज़ा, ताऊं दैआ सह फिक्‍कअ ज़िहअ। पर तंऐं आसा डाहअ द सोभी का बधिया दाखो रस अज़ी बी पिछ़ू!”

11ईशू किई गलील मुल्खे काना गराऊंऐं अह पैहलअ नछ़ैण रहैऊई करै आपणैं प्रतप्पा प्रगट अर तेऊए च़ेल्‍लै बी हुअ तेऊ दी विश्वास कि अह आसा मसीहा।

12तेखअ डेऊऐ ईशूए ईज, भाई अर तेऊए च़ेल्‍लै कफरनहूम नगरी लै अर थोल़ै धैल़ै रहै तिंयां तिधी।

ईशू दरल़ाऊऐ परमेशरे भबना का बपारी

(मोत्ती 21:12,13; मार्कुस 11:15-17; लूका 19:45,46)

13यहूदी मणछो ऊवार्णैओ थैर थिअ नेल़ अर ईशू डेऊअ एरुशलेम नगरी लै। 14तेऊ भाल़अ भबनै बल्द, भेडा-बाकरी, पालल़ी बेच़णैं आल़ै ढब्बै-धेल्‍लै बदल़ी लैण-दैण करनै आल़ै बपारी बेठै दै। 15ईशू राशीओ छिऊंटअ बणाअं अर भेडा-बाकरी, पालल़ी, बल्द दरल़ाऊऐ भबना का बागा लै। तिन्‍नें ढब्बै-धेल्‍लै छिंगै अर तिन्‍नें थल़्ही पाई ढोल़ी। 16पालल़ी आल़ै लै बोलअ, “इना काढा इधा का पोर्ही, मेरै बाब परमेशरे भबना निं बपारीओ घअर बणाआं।”

17तेखअ फिरी तेऊए च़ेल्‍लै आद कि पबित्र शास्त्रा दी आसा लिखअ द, “तेरै पबित्र भबना लै झ़ूरा हुंह इहअ कि मेरै दिलै हआ आग लागी दी, हे परमेशर तेरै एऊ भबने तैणीं दैणैं मुंह आपणैं प्राण बी।”#भज. 69:9

18ऐहा गल्‍ला भाल़ी यहूदी सैणैं ईशू लै बोलअ, “तूह इहअ करी हाम्हां का कुंण ज़िहै नछ़ैणां रहैऊंदअ आसा लागअ द?”

19ईशू दैनअ ज़बाब, “एऊ भबना पाआ ढोल़ी, मुंह करनअ अह चिऊथै धैल़ै खल़अ।”

20यहूदी सैणैं बोलअ, “एऊ भबना बणाणां लै आसा लागी दी छयाल़ी साला! ताह कै अह चिऐ धैल़ै लै करनअ खल़अ?” 21ईशू बोलअ त आपणीं देही लै भबन पर तिन्‍नैं निं अह गल्‍ल समझ़ी। 22तैही ज़ेभै ईशू मरी करै चिऊथै धेल्‍लै ज़िऊंदअ हुअ, तेभै फिरी तेऊए च़ेल्‍लै बी आद कि अह गल्‍ल बोली ती तेऊ, अर तेखअ किअ तिन्‍नैं पबित्र शास्त्र अर ईशूए गल्‍ला दी विश्वास।

ईशू का आसा मणछे दिला-मन्‍नों थोघ

23ज़धू ईशू ऊवार्णे थैरा लै एरुशलेम नगरी थिअ, कई लोगै किअ तिन्‍नां स्वर्गे नछ़ैण अर च़मत्कारा भाल़ी तेऊए नाओंआं दी विश्वास। 24पर ईशू निं आप्पू तिन्‍नें भरोस्सै रही। किल्हैकि तेऊ का थिअ तिन्‍नें सभाबो थोघ। 25तेऊ का निं ऐहा गल्‍ला खोज़णें ज़रुरत आथी ती किल्हैकि तेऊ का थिअ आप्पै थोघ कि मणछे मन्‍नैं किज़ै आसा?

Currently Selected:

जोहन्‍ना 2: OSJ

Highlight

Copy

Compare