जेरमयाह 40
40
1बिधाता किई मुंह जेरमयाह संघै तधू गल्ला ज़धू हुंह दलपति नबूज़रदानै मैहलै पहरीए खोल़ै का निंयं अर रामाह नगरी पजैल़ी हुंह आज़ाद किअ। नबूज़रदाना भेटअ हुंह शांघल़ी करै बान्हअ द अर मुंह संघै तै यहूदा मुल्ख अर राज़धानी एरुशलेम नगरीए होर बी खास्सै कैदी, तिंयां निंयैं तेऊ कैद करी बाबेल देशा लै।
2दलपति नबूज़रदाना ज़ांऊं हुंह भेटअ, तेऊ निंयं हुंह पोर्ही ज़ुदअ ज़िहअ संघा बोलअ मुल्है इहअ, “जेरमयाह, यहूदा मुल्ख अर एरुशलेम नगरीओ ज़ुंण अह बनाश हुअ, सह आसा तेरै परमेशर बिधाता बोलअ द। 3बिधाता किअ तिहअ ई ज़िहअ तेऊ बोलअ द। अह बनाश हुअ तै कि थारै लोगै किअ खास्सअ पाप अर तिन्नैं निं ज़िहअ तेऊ बोलअ तिहअ किअ। 4आझ़ लाअ मंऐं तूह तेरै हाथा-खूरा का ईंयां शांघल़ी पोर्ही खोल्ही आज़ाद करी। ज़ै तूह च़ाहा तै च़ाल्ल तूह मुंह संघै बाबेल देशा लै। ज़ै तूह नांईं च़ाल्लअ, तै रह इधी। अह सारअ देश आसा ताह सम्हनै, ज़िधा लै तेरअ दिल बोला तूह डेऊ तिधा लै।”
5मंऐं निं किछ़ ज़बाब दैनअ, तेतरी हेरअ नबूज़रदानै भिई इहअ बोली, “तूह डेऊ आहीकामे शोहरू शापाने पोचै गदाली सेटा लै फिरी। बाबेल देशे राज़ै बणाअं सह यहूदा मुल्खे सोभी नगरी लै राज़पाल। तूह सका तेऊ संघै रही आपणैं लोगा जैंदरी रही। नांई, डेऊ ज़िधा लै तूह च़ाहा तिधा लै।”
नबूज़रदान दलपति दैनी मुल्है बाता लै रोटी अर पाणीं, होर बी दैनी तेऊ मुल्है कई च़िज़ा भैंट। तेखअ दैनअ तेऊ मुंह डेऊणैं। 6हुंह डेऊअ मिज़पा नगरी आहीकामे शोहरू गदाली सेटा लै कि आपणैं लोगा जैंदरी रहूं ज़ुंण बच़ै दै थिऐ।
गदाली बणाअं यहूदा मुल्खो राज़पाल
(2 राज़ै 25:22-24)
7कई यहूदी कार-करिंदै, दलपति अर सपाही निं बाबेल देशे सैना आजू झ़ुकै। ज़ांऊं इना का थोघ लागअ कि आहीकामो शोहरू गदाली बणाअं बाबेल देशे राज़ै तिन्नां मणछा प्रैंदै राज़पाल ज़ुंण बाख गरीब थिऐ अर तिंयां ज़ुंण बाबेल देशा लै कैद करी नांईं निंयैं। 8नतानियो शोहरू इशमाईल, कोराहो शोहरू जोहनान, जोनातान, नतपाह नगरी का एपीए आद-लुआद तनमेथो शोहरू सरयाह अर मकात नगरी का जजनिया। ईंयां आऐ आपणैं सोभी आदमी संघी मिज़पा नगरी गदाली सेटा मिलदै।
9शापाने पोचै आहीकामे शोहरू गदाली बोलअ तिन्नां लै, “मेरी रही तम्हां लै ज़बान कि तम्हां लै निं किछ़ हंदअ। एता का निं तम्हैं एही डअर डाही कि बाबेल देशे कार-करिंदै तम्हां लै किज़ै करे! ज़ै हाम्हैं आप्पू मांझ़ै मिल़ी-ज़ुल़ी ज़िहअ राज़अ नबूकदनेसर बोले तिहअ करदै रहे तै निं किछ़ै बूरअ हणअ। 10हुंह रहूं आप्पू इधी मिज़पा नगरी, ज़ेभै बाबेल देशे अफसर इधी एछे, तिन्नां का करूं हुंह तम्हां बाखा आप्पै गल्ला। पर तम्हैं काढै दाखे फसल, ज़ेठै-शाल़्है धैल़ै जैतूनो तेल संघा डाहै तेते कुप्पै भरी भढारै। तम्हैं बस्सै तिन्नां गराऊंऐं ज़ेथ तम्हैं कबज़अ करे।”
11ज़ांऊं इना गल्लो थोघ मोआब, अमोन, एदोम अर होरी सोभी देशै बस्सै दै यहूदी का थोघ लागअ कि इहअ-इहअ हुअ! यहूदा मुल्खे राज़े आछिए छैरै काढै पोर्ही अर सह निंयं बान्हीं करै बाबेल देशा लै! बाबेल देशे राज़ै बणाअं आहीकामो शोहरू अर शापानो पोचअ गदाली यहूदा मुल्खो राज़पाल। 12तिंयां आऐ तिन्नां-तिन्नां ज़ैगा छ़ाडी यहूदा मुल्खा लै फिरी ज़ेथ तिंयां छिंघुऐ दै थिऐ। तिंयां पुजै मिज़पा नगरी गदाली सेटा लै संघा झाल़ै तिन्नैं खास्सै फल़-फल़ूट अर दाखो रस।
गदाली पाअ मारी
(2 राज़ै 25:25,26)
13तेखअ हुअ इहअ कि यहूदी सैनो दलपति कोराहो शोहरू जोहनान ज़ुंण बाबेल देशे सैना आजू नांईं झ़ुकअ त सह थिअ अज़ी तैणीं सऊंऐं मुल्खै लुक्कअ द। सह आअ आपणैं आदमी संघी मिज़पा नगरी गदाली सेटा लै। 14तिन्नैं बोलअ गदाली लै इहअ, “ताखा थोघ बी आसा कि अमोनीए राज़ै बाली आसा नतानियो शोहरू इशमाईल ताह मारदअ छ़ाडअ द?” पर आहीकामे शोहरू गदाली निं तेऊए गल्ला दी विश्वास किअ।
15तेखअ किई कोराहे शोहरू जोहनानै गदाली संघै होरी का लुक्की च़ुप्प-च़ुप्पै गल्ला, “हुंह एछूं नतानिये शोहरू इशमाईला मारी अर एतो निं कोही का थोघ लागणअ कि सह कुंणी मारअ। तंऐं किल्है लाई ज़बरी तेऊए हाथै आपणीं हत्या दैई हणैं? ज़ुंण यहूदी ताह सेटा झाल़्हुऐ दै आसा, तिन्नां किल्है दैणअ भिई छिंघणैं? इहअ करै हणीं तिन्नां मणछा लै आफ़त ज़ुंण यहूदा मुल्खै बच़ै दै आसा।”
16पर आहीकामे शोहरू गदाली बोलअ कोराहे शोहरू जोहनाना लै, “इहअ निं करी आथी! इशमाईले बारै तेरी ईंयां गल्ला आसा झ़ुठी!”
Currently Selected:
जेरमयाह 40: OSJ
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
