जेरमयाह 24
24
दूई च़ठै अर फेडू
1बाबेल देशे राज़ै नबूकदनेसरै यहूदा मुल्खो राज़अ जेहोकीमो शोहरू जकोनया राज़धानी एरुशलेम नगरी का बाबेल देशा लै कैद करी। तेऊ संघै निंयैं तेऊए सोभ कार-करिंदै, लुहार, छदाण बी ज़बरी कैद करी। ज़धू तिंयां डेऊऐ, बिधाता रहैऊऐ मुखा दूई च़ठै अर तेथ तै फेडू। तिंयां च़ठै तै बिधाते भबना आजू।#2 राज़. 24:12-16; 2 इति. 36:10 2एकी च़ठै दी थिऐ पैहलकै भ्रहे पाक्कै फेडू। दुजै च़ठै दै थिऐ निक्कै फेडू, तिंयां निं खाणैं जोगी आथी तै।
3तेखअ बोलअ बिधाता मुल्है इहअ, “जेरमयाह, ताखा किज़ै शुझुऐ?”
मंऐं बोलअ, “मुखा शुझिआ फेडू, पैहलकै भ्रहे फेडू आसा बेघै बधिया, पर होर दुजै च़ठै दी आसा फेडू बेघै निक्कै, तिंयां निं खाणैं जोगी आथी।”
4तेखअ बोलअ बिधाता मुल्है इहअ, 5“हुंह इज़राईलो परमेशर बिधाता बोला इहअ कि ज़ुंण यहूदी बाबेल देशा लै कैद करी निंयैं, तिंयां आसा बित्तै पाक्कै फेडू ज़िहै। तिंयां छ़ाडै ऐहा ज़ैगा का तेथ देशा लै मंऐं अर तिन्नां लै करनी मुंह झींण। 6हुंह हणअ आप्पै तिन्नां भाल़अ लागअ द अर तिंयां आणनैं मुंह ऐहा ज़ैगा लै बापस फरेऊई। तिंयां बढेरनै मुंह उझै, तिन्नां निं हुंह गोधी का पेच़दअ आथी। 7मुंह पाणीं तिन्नें दिलै एही च़ाह कि तिन्नां का थोघ लागे कि हुंह आसा बिधाता। तेखअ हणैं तिंयां मेरी परज़ा अर हुंह हणअ तिन्नों परमेशर। किल्हैकि तिंयां फिरनैं मुंह बाखा तत्त-दिला का।
8“यहूदा मुल्खे राज़ै सिदकिया अर तेऊ संघै होरी कार-करिंदै अर राज़धानी एरुशलेम बाकी लोगे गल्ल ज़ुंण अज़ी ऐहा ज़ैगा आसा बस्सै दै अर ज़ुंण मिसर देशै आसा बस्सै दै, तिन्नां संघै करनअ मुंह तिहअ बभार ज़िहअ निक्कै फेडू संघै करा ज़ुंण खाणां लै बेघै निक्कै हआ। 9तिन्नां लै पाणीं मुंह एही आफ़त कि संसारे सोभ देश डरनै तिन्नां गल्ला शूणीं। लोगा करनै तिंयां हास्सणैं अर सुहांगा लै। तिंयां रहणैं देशै-देशै हांढदै लागी अर हर ज़ैगा काढणअ लोगा फिटक दैणा लै तिन्नों नाअं। 10तिन्नां संघै दैणअ मुंह जुध हणैं कि तिंयां तलबारा करै मरे, तिन्नां जैंदरी पाणीं मुंह नबिज़री बमारी ज़ेभै तैणीं कि तिंयां ऐहा ज़ैगा का सोभ खतम निं होए, ज़ुंण ज़ैगा मंऐं तिन्नें दादा-बाबा लै थिई दैनी दी।”
Currently Selected:
जेरमयाह 24: OSJ
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
