पांच़ 21
21
बच़ै दै बिन्यामीनी मर्धा लै बेटल़ी
1ज़ांऊं सोभै इज़राईली मिज़पा कठा हुऐ, तिन्नैं खाऐ सोभी बिधाता सेटा सोह, “हाम्हां निं आपणीं एकी शोहरीओ बैह बी बिन्यामीन गोत्रा आल़ै संघै करनअ।” 2तेखअ डेऊऐ जुधा बाद सोभै इज़राईली बेतेल संघा रहै तिधी उडै तैणीं बिधाता सेटा बेशी। तिंयां लागै तिधी हिक्का पटाक्की करै ज़ोरै-ज़ोरै लेरा लांदै। 3लेरदी-लेरदी करा तै तिंयां इहअ बोली, “हे इज़राईले परमेशर बिधाता, हाम्हां इज़राईली मांझ़ै अह इहअ किल्है हुअ? बिन्यामीन गोत्र किल्है च़ाल्लअ इज़राईली मांझ़ा का पठी लुक्की।”
4दुजै धैल़ै दोत्ती उझ़ुई बणाईं तिधी इज़राईली एक बेदी संघा किअ हूम बल़ीदान अर मेल़-ज़ोल़ो बल़ीदान। 5तेखअ पुछ़अ इज़राईली सैणैं सारी परज़ा का, “इज़राईली गैरा गोत्रा मांझ़ै कुंण एही टोली किनी आसा ज़ुंण मिज़पा बिधाता सम्हनै सभा दी नांईं आथी तै? तिधी आसा सोभी सोह खाई इहअ बोलअ द, ‘ज़ुंण मिज़पा लै बिधाता सेटा नांईं एछे, सह पाणअ मारी।’”
6बिन्यामीन गोत्रा संघै ज़ुंण हुअ, तेता पचताऐ पिछ़ू तेखअ सोभ इज़राईली संघा लागै इहअ बोल्दै, “आझ़ शोठुअ इज़राईला का एक गोत्र चुटी करै पोर्ही। 7बिन्यामीन गोत्रे ज़ुंण जुधा का बच़ै दै आसा, तिन्नां लै हुअ हाम्हां बेटल़ीओ इंतज़ाम करनअ! आप्पू डाहै हाम्हैं इहै सोह खाई कि हाम्हां निं बिन्यामीन गोत्रा संघै आपणीं एकी शोहरीओ बैह बी करनअ?”
8ज़ांऊं इज़राईली पुछ़-ज़ाच़ किई कि मिज़पा बिधाता सम्हनै सभा लै कहा टोलीए लोग निं डेऊऐ, तेखअ लागअ तिन्नां का थोघ कि गलाद मुल्खे जबेश नगरी का निं कोहै डेऊअ त। 9तिन्नैं गणै तिधी सोभै तेखअ भाल़अ कि गलाद मुल्खे जबेश का निं तिधी कोहै थिअ।
10तेखअ छ़ाडै इज़राईली सारी टोली बारा हज़ार शूरबीर इहअ हुकम करी, “डेओआ, गलादे जबेश नगरी पाआ बेटल़ी-माठै संघी सोभी मारी। 11बैही दी बेटल़ी अर मर्धा पाऐ सोभी मारी अर कुंआरी शोहरी दैऐ ज़िऊंदी रहणैं।” #गण. 31:17
12सोभी मारी भेटी तिन्नां गलाद मुल्खे जबेश नगरीए लोगा मांझ़ै च़ार शौ कुंआरी शोहरी, तेखअ आणी तिंयां कनान देशै शिलोह नगरीए ज़िधी तिन्नैं डेरै तै पाऐ दै।
13तेखअ दैनअ सारी इज़राईली टोली बिन्यामीन गोत्रा आल़ै लै समाद ज़ुंण रेमोन नाओंए टोल्हा सेटा थिऐ अर संघा किअ तिन्नां संघै जुध खतम। 14तेखअ फिरै बिन्यामीन गोत्रा आल़ै तिधा का बापस अर होरी इज़राईली दैनी तिन्नां लै तिंयां शोहरी ज़ुंण गलादी जबेशे लोगा मांझ़ा का ज़िऊंदी आणी ती, पर तिंयां बी थिई तिन्नां लै थोल़ी।
15तेखअ पचताऐ इज़राईली बिन्यामीन गोत्रा पिछ़ू इहअ करै कि बिधाता चोल़अ इज़राईलीओ एक्कअ। 16तेखअ बोलअ सारी इज़राईली टोलीए सैणैं इहअ, “बिन्यामीन गोत्रे सोभ बेटल़ी हुई बरैबाद। ऐबै ज़ुंण बेटल़ी बाझ़ी एही रहै, तिन्नां लै बेटल़ीओ इंतज़ाम केऊ साबै करनअ? 17ज़ै तिन्नें आद-लुआद नांईं होए, इहअ करै हणअ इज़राईली मांझ़ा का एक गोत्र सदा लै खतम। 18पर आपणीं शोहरीओ बैह निं हाम्हैं तिन्नां संघै करी सकदै किल्हैकि हाम्हैं आसा इहै सोह खाऐ दै कि तेऊ मणछा लै लागणअ फिटक ज़ुंण बिन्यामीन गोत्रा संघै आपणीं शोहरीओ बैह करे।”
19तेखअ सोठअ तिन्नैं इहअ, “बिधाते पबित्र ज़ैगा शिलोह आसा हर साल हणैं आल़अ थैर नेल़।” शिलोह थिअ बेतेल उतर दिशा बाखा, लबोन नगरी दखण बाखा अर तैहा बाता का पुर्बा बाखा ज़ुंण बेतेला का शकेम बाखा लै डेओआ।
20इज़राईली सैणैं खोज़अ बिन्यामीनी का, “तम्हैं रहा दाखे बागा दी लुक्की ताखुई भाल़ै लागी। 21ज़ांऊं शिलोहे शोहरी थैरे बगती नाच़दी बागा लै निखल़े, तम्हैं निखल़ै दाखे बागा का संघा ढाकै तिन्नां शोहरी मांझ़ै एक-एक शोहरी आप्पू लै अर तेखअ निंयैं तिन्नां ज़ोरा-ज़ोरी ढुआल़ आपणैं मुल्खा लै। 22ज़ै तिन्नें ईज-बाब तम्हां रोक्कदै एछे, तिन्नां लै बोलमै हाम्हैं इहअ, ‘ज़ीबाण, इना बिन्यामीनी दैआ इना शोहरी निंणै। किल्हैकि हाम्हैं जबेशी संघै जुधा का निं हाम्हैं इना एतरी शोहरी आणी बोल़ै कि बच़ै दै बिन्यामीनी लै एक-एक सोभी लै होए। तम्हां लै निं किछ़ी गल्लो दोश आथी, तम्हैं निं हथू आपणीं शोहरी तिन्नां लै दैनी आथी। तिन्नैं पाई थारी शोहरी तम्हां का च़ोरी।’”
23बाकी बिन्यामीन गोत्रा आल़ै किअ इहअ ई, तिन्नैं छ़ांटी सोभी आप्पू-आप्पू लै ज़ुआन-ज़ुआन बेटल़ी ज़ुंण शिलोह नाच़दी ती लागी दी। संघा निंईं तिंयां आपणैं मुल्खा लै। तिन्नैं च़िणीं आपणीं नगरी भिई संघा लागै तिधी रहंदै। 24होर इज़राईली बी डेऊऐ आपणैं-आपणैं गोत्र अर टोलीए साबै आपणैं घअरा लै ज़िधी-ज़िधी तिंयां बस्सै दै तै।
25तेऊ ज़मानै ज़धू इज़राईली मांझ़ै राज़अ नांईं त हंदअ, तिंयां करा तै ज़िहअ तिन्नां का भलअ ज़ाण्हिंआं त तिहअ।
Currently Selected:
पांच़ 21: OSJ
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
